ലണ്ടന്‍: ബ്രിട്ടനില്‍ ഈ ആഴ്ച വീണ്ടും മഴ ശക്തമാകുമെന്ന് കാലാവസ്ഥാ പ്രവചനം. ചില പ്രദേശങ്ങളില്‍ ഇടിമിന്നലോടുകൂടിയ കനത്ത മഴയ്ക്കും പ്രാദേശിക വെള്ളപ്പൊക്കത്തിനും സാധ്യതയുണ്ട്. ചൊവ്വാഴ്ച മുതല്‍ മഴയുടെ സാധ്യത വര്‍ധിക്കുമെന്നും ബുധനാഴ്ചയോടെ ഇംഗ്ലണ്ട്, വെയില്‍സ്, നോര്‍ത്തേണ്‍ അയര്‍ലന്‍ഡ് എന്നിവിടങ്ങളില്‍ മഴ കൂടുതല്‍ വ്യാപകമാകുമെന്നും പ്രവചനമുണ്ട്. അതേസമയം തെക്കന്‍ യൂറോപ്പില്‍നിന്നുള്ള ചൂടുള്ള വായു വീണ്ടും ബ്രിട്ടനിലേക്ക് എത്തുന്നതോടെ തെക്കന്‍ മേഖലകളില്‍ താപനില ഉയരും. ആഴ്ചയുടെ മധ്യത്തോടെ തെക്കന്‍ ഇംഗ്ലണ്ടില്‍ 28 മുതല്‍ 29 ഡിഗ്രി സെല്‍ഷ്യസ് വരെയും ചിലയിടങ്ങളില്‍ 30 ഡിഗ്രിക്ക് അടുത്തും താപനില രേഖപ്പെടുത്താന്‍ സാധ്യതയുണ്ട്. എന്നാല്‍ ഈ ചൂട് അധികനാള്‍ നീണ്ടുനില്‍ക്കില്ലെന്നാണ് വിലയിരുത്തല്‍. തിങ്കളാഴ്ച രാജ്യത്തിന്റെ ഭൂരിഭാഗം പ്രദേശങ്ങളിലും വരണ്ട കാലാവസ്ഥ തുടരും. ചൊവ്വാഴ്ച തെക്കുപടിഞ്ഞാറന്‍ ഭാഗത്തുനിന്നെത്തുന്ന ന്യൂനമര്‍ദത്തിന്റെ സ്വാധീനത്തില്‍ തെക്കന്‍ ഇംഗ്ലണ്ടിലും തെക്കന്‍ വെയില്‍സിലും മഴയ്ക്കും ചാറ്റല്‍മഴയ്ക്കും സാധ്യതയുണ്ട്. ബുധനാഴ്ചയോടെ ഇംഗ്ലണ്ട്, വെയില്‍സ്, നോര്‍ത്തേണ്‍ അയര്‍ലന്‍ഡ് എന്നിവിടങ്ങളില്‍ മഴ വ്യാപകമാകും. സ്‌കോട്ലന്‍ഡിലെ ഭൂരിഭാഗം പ്രദേശങ്ങളിലും താരതമ്യേന വരണ്ട കാലാവസ്ഥയായിരിക്കും.

ബുധനാഴ്ച വൈകുന്നേരം മുതല്‍ വെള്ളിയാഴ്ച വരെ ഇടിമിന്നലോടുകൂടിയ ശക്തമായ മഴയ്ക്കും ചിലയിടങ്ങളില്‍ ആലിപ്പഴവര്‍ഷത്തിനും സാധ്യത വര്‍ധിക്കും. തെക്കന്‍ ഇംഗ്ലണ്ടിലും വെയില്‍സിലുമാണ് കൂടുതല്‍ ജാഗ്രത ആവശ്യമായി വരിക. നീണ്ട വരണ്ട കാലാവസ്ഥയെ തുടര്‍ന്ന് മണ്ണ് കട്ടിയുള്ള നിലയിലായതിനാല്‍ കുറഞ്ഞ സമയത്തിനുള്ളില്‍ വലിയ തോതില്‍ മഴ ലഭിച്ചാല്‍ വെള്ളം മണ്ണിലേക്ക് ആഗിരണം ചെയ്യാതെ വേഗത്തില്‍ ഒഴുകിപ്പോകാന്‍ സാധ്യതയുണ്ട്. ഇത് ചില പ്രദേശങ്ങളില്‍ പെട്ടെന്നുള്ള വെള്ളപ്പൊക്കത്തിനും കാരണമായേക്കാം. നിലവില്‍ രാജ്യവ്യാപകമായി മഴയോ കാറ്റോ സംബന്ധിച്ച മെറ്റ് ഓഫിസിന്റെ ഔദ്യോഗിക കാലാവസ്ഥാ മുന്നറിയിപ്പുകളൊന്നും നിലവിലില്ല. എന്നാല്‍ ഇടിമിന്നലോടുകൂടിയ ശക്തമായ മഴയ്ക്കുള്ള സാധ്യത നിലനില്‍ക്കുന്നതിനാല്‍ കാലാവസ്ഥാ പ്രവചനങ്ങളില്‍ മാറ്റമുണ്ടാകാമെന്നും അധികൃതര്‍ മുന്നറിയിപ്പ് നല്‍കുന്നു.

മഴയെത്തിയാലും വരള്‍ച്ച മാറാന്‍ സമയമെടുക്കും

പുതിയ മഴ വരള്‍ച്ച ബാധിച്ച പ്രദേശങ്ങള്‍ക്ക് ആശ്വാസമാകുമെങ്കിലും ഇംഗ്ലണ്ടിലെ ജലക്ഷാമം ഉടന്‍ അവസാനിക്കില്ലെന്നാണ് വിലയിരുത്തല്‍. ഓഗസ്റ്റ് 20 വരെയുള്ള കണക്കനുസരിച്ച് ഈ മാസം ഇംഗ്ലണ്ടില്‍ ലഭിച്ച മഴ ദീര്‍ഘകാല ശരാശരിയുടെ 17 ശതമാനം മാത്രമാണ്. രാജ്യത്തിന്റെ ഏകദേശം 71 ശതമാനം ഭൂവിസ്തൃതിയും ഇപ്പോഴും വരള്‍ച്ചാ സാഹചര്യത്തിലാണെന്നാണ് കണക്ക്. പല നദികളിലെയും ജലപ്രവാഹം സാധാരണ നിലയേക്കാള്‍ താഴെയാണ്. തെക്കന്‍, കിഴക്കന്‍ ഇംഗ്ലണ്ടിലെ ഏകദേശം നാലിലൊന്ന് നിരീക്ഷണ കേന്ദ്രങ്ങളിലും ജലനിരപ്പ് അതീവ താഴ്ന്ന നിലയിലാണ്. ജലസംഭരണികളിലെ സ്ഥിതിയും ആശ്വാസകരമല്ല. ഓഗസ്റ്റ് 18ന് ഇംഗ്ലണ്ടിലെ പ്രധാന ജലസംഭരണികളിലെ ശരാശരി സംഭരണനില 62.6 ശതമാനം മാത്രമായിരുന്നു. ഏഴ് പ്രധാന ജലസംഭരണികളില്‍ ജലനിരപ്പ് അസാധാരണമായി താഴ്ന്ന നിലയിലാണ്. 2026 ജൂലൈ ഇംഗ്ലണ്ടില്‍ രേഖകള്‍ ആരംഭിച്ചതിനുശേഷമുള്ള ഏറ്റവും വരണ്ട ജൂലൈയായിരുന്നുവെന്നാണ് കണക്ക്. ആ മാസം രാജ്യത്ത് ലഭിച്ചത് വെറും 6.5 മില്ലിമീറ്റര്‍ മഴയാണ്. ഇത് ദീര്‍ഘകാല ശരാശരിയുടെ 10 ശതമാനം മാത്രമാണ്. തെക്കന്‍ ഇംഗ്ലണ്ടില്‍ ലഭിച്ച മഴ 1.9 മില്ലിമീറ്റര്‍ മാത്രമായിരുന്നു. അതിനാല്‍ ഈ ആഴ്ച ലഭിക്കുന്ന മഴ നദികളിലെയും മണ്ണിലെയും ജലനില മെച്ചപ്പെടുത്താന്‍ സഹായിക്കുമെങ്കിലും വരള്‍ച്ച പൂര്‍ണമായി മാറാന്‍ തുടര്‍ച്ചയായും ഗണ്യമായും മഴ ലഭിക്കേണ്ടിവരുമെന്നാണ് വിദഗ്ധരുടെ വിലയിരുത്തല്‍.

മഴയ്‌ക്കൊപ്പം 30 ഡിഗ്രിയോട് അടുത്ത് ചൂടും

മഴ ശക്തമാകുന്നതിനിടയിലും തെക്കന്‍ യൂറോപ്പില്‍നിന്നുള്ള ചൂടുള്ള വായു എത്തുന്നതോടെ ബുധനാഴ്ച തെക്കന്‍ ഇംഗ്ലണ്ടില്‍ താപനില 28 മുതല്‍ 29 ഡിഗ്രി സെല്‍ഷ്യസ് വരെ ഉയര്‍ന്നേക്കാം. ചില പ്രദേശങ്ങളില്‍ ഇത് 30 ഡിഗ്രിക്ക് അടുത്തെത്താനും സാധ്യതയുണ്ട്. സ്‌കോട്ലന്‍ഡിലും നോര്‍ത്തേണ്‍ അയര്‍ലന്‍ഡിലും ഏകദേശം 20 ഡിഗ്രിയായിരിക്കും താപനില. എന്നാല്‍ ഓഗസ്റ്റ് അവസാനിക്കുന്നതിന് മുമ്പ് ബ്രിട്ടനില്‍ വീണ്ടും ഔദ്യോഗിക ഉഷ്ണതരംഗത്തിനാവശ്യമായ താപനില രേഖപ്പെടുത്താനുള്ള സാധ്യത കുറവാണെന്നാണ് നിലവിലെ പ്രവചനം. അതേസമയം ഈ വര്‍ഷത്തെ ശരത്കാലത്തും ശൈത്യകാലത്തിന്റെ തുടക്കത്തിലും ബ്രിട്ടനില്‍ കൂടുതല്‍ മഴയും കൊടുങ്കാറ്റുകളും ഉണ്ടാകാനുള്ള സാധ്യതയിലേക്കും കാലാവസ്ഥാ ഘടകങ്ങള്‍ വിരല്‍ചൂണ്ടുന്നുണ്ട്. പസഫിക് സമുദ്രത്തിലെ എല്‍ നിനോ സാഹചര്യം ശക്തമായാല്‍ വടക്കുപടിഞ്ഞാറന്‍ യൂറോപ്പില്‍, പ്രത്യേകിച്ച് ബ്രിട്ടനില്‍, കൂടുതല്‍ ഈര്‍പ്പമുള്ളതും കൊടുങ്കാറ്റുകള്‍ കൂടുതലുള്ളതുമായ കാലാവസ്ഥയ്ക്ക് സാധ്യതയുണ്ടെന്നാണ് വിലയിരുത്തല്‍.