ലണ്ടന്‍: ബ്രിട്ടനില്‍ തൊഴിലാളികളുടെ ശമ്പളവര്‍ധനയെക്കാള്‍ വേഗത്തില്‍ ക്ഷേമ ആനുകൂല്യങ്ങള്‍ക്കുള്ള ചെലവ് ഉയരുന്നതായി പഠനം. 2023 നവംബര്‍ മുതല്‍ 2025 നവംബര്‍ വരെയുള്ള കാലയളവില്‍ ബെനഫിറ്റ് ചെലവ് 25.8 ശതമാനം വര്‍ധിച്ചപ്പോള്‍, ജോലി ചെയ്യുന്നവരുടെ ശമ്പളത്തിലെ വളര്‍ച്ച 10.4 ശതമാനമായിരുന്നുവെന്നാണ് ടാക്സ് പെയേഴ്സ് അലയന്‍സിന്റെ കണക്കുകള്‍. ശമ്പളവര്‍ധനയുടെ ഇരട്ടിയിലധികമാണ് ക്ഷേമച്ചെലവിലെ വര്‍ധനനിരക്ക്.

കുറഞ്ഞ വരുമാനമുള്ളവര്‍ക്കും ഭിന്നശേഷിക്കാര്‍ക്കും പിന്തുണ നല്‍കുന്ന യൂണിവേഴ്സല്‍ ക്രെഡിറ്റ്, പേഴ്സണല്‍ ഇന്‍ഡിപെന്‍ഡന്‍സ് പേയ്മെന്റ്, ഹൗസിങ് ബെനഫിറ്റ് തുടങ്ങിയ ആനുകൂല്യങ്ങള്‍ക്കുള്ള ചെലവാണ് പഠനത്തില്‍ ചൂണ്ടിക്കാട്ടുന്നത്. ഈ കണക്കുകള്‍ പദ്ധതികളുടെ മൊത്തം ചെലവിലെ വര്‍ധനയെയാണ് സൂചിപ്പിക്കുന്നത്; ഓരോ ഗുണഭോക്താവിനും ലഭിക്കുന്ന തുക അതേ നിരക്കില്‍ ഉയര്‍ന്നുവെന്നല്ല.

ഇംഗ്ലണ്ടിലെയും വെയില്‍സിലെയും 526 പാര്‍ലമെന്റ് മണ്ഡലങ്ങളില്‍ 502 ഇടത്തും ശമ്പളവര്‍ധനയെക്കാള്‍ ഉയര്‍ന്ന നിരക്കിലാണ് ആനുകൂല്യച്ചെലവ് വര്‍ധിച്ചതെന്ന് സംഘടന പറയുന്നു. പരിശോധിച്ച ഭൂരിഭാഗം മണ്ഡലങ്ങളിലും സമാനമായ പ്രവണതയാണ് രേഖപ്പെടുത്തിയിരിക്കുന്നതെന്നാണ് പഠനത്തിന്റെ കണ്ടെത്തല്‍.

കണക്കുകളുടെ പശ്ചാത്തലത്തില്‍ ബെനഫിറ്റ് ചെലവ് നിയന്ത്രിക്കാന്‍ ലേബര്‍ സര്‍ക്കാര്‍ നടപടിയെടുക്കണമെന്ന് ടാക്സ് പെയേഴ്സ് അലയന്‍സ് ആവശ്യപ്പെട്ടു. സ്റ്റേറ്റ് പെന്‍ഷന്‍ ഉള്‍പ്പെടെയുള്ള ആനുകൂല്യങ്ങള്‍ക്കായി പ്രതിവര്‍ഷം ഏകദേശം 300 ബില്യന്‍ പൗണ്ടാണ് ചെലവാകുന്നത്. ദശകത്തിന്റെ അവസാനത്തോടെ ഇത് 400 ബില്യന്‍ പൗണ്ടിലെത്തുമെന്നാണ് പ്രവചനം.

ക്ഷേമച്ചെലവ് കുറയ്ക്കുന്നതിനും തൊഴില്‍ ചെയ്യാത്തവരെ തൊഴില്‍രംഗത്തേക്ക് എത്തിക്കുന്നതിനുമായി ആനുകൂല്യങ്ങളില്‍ നിയന്ത്രണം കൊണ്ടുവരാനുള്ള ശ്രമത്തിലാണ് സര്‍ക്കാര്‍. എന്നാല്‍, ചെലവ് ഉയരുന്ന പ്രവണത തുടരുന്നത് ഈ ശ്രമങ്ങള്‍ക്ക് വെല്ലുവിളിയാകുകയാണ്. ആനുകൂല്യങ്ങളെ ആശ്രയിക്കുന്നവര്‍ക്കുള്ള പിന്തുണയും പൊതുചെലവിന്റെ നിയന്ത്രണവും ഒരുമിച്ച് കൈകാര്യം ചെയ്യേണ്ട സാഹചര്യമാണ് സര്‍ക്കാരിനു മുന്നിലുള്ളത്.