റഗ്ബി: യു.കെയിലെ വാര്‍വിക്ക്‌ഷെയറിലുള്ള റഗ്ബിയില്‍ സമീപപ്രദേശങ്ങളിലെ പെട്രോള്‍ പമ്പുകള്‍ തമ്മിലുള്ള ഇന്ധനവില വ്യത്യാസം വാഹന ഉടമകള്‍ക്ക് അധിക സാമ്പത്തിക ബാധ്യതയാകുന്നു. ഏതാനും മൈലുകള്‍ മാത്രം അകലെയുള്ള പമ്പുകളില്‍ പെട്രോളിന് ലിറ്ററിന് 30 പെന്‍സും ഡീസലിന് 23 പെന്‍സുമാണ് വ്യത്യാസം. നഗരത്തിലെ ടെക്‌സാക്കോ പമ്പില്‍ പെട്രോളിന് ലിറ്ററിന് 169.9 പെന്‍സും ഡീസലിന് 196.9 പെന്‍സുമാണ് നിരക്ക്. സമീപത്തെ ബി.പി പമ്പിലാകട്ടെ പെട്രോളിന് 199.9 പെന്‍സും ഡീസലിന് 219.9 പെന്‍സുമാണ് ഈടാക്കുന്നത്.

ഈ നിരക്കുവ്യത്യാസം മൂലം വലിയ കുടുംബകാറുകളുടെ ടാങ്ക് നിറയ്ക്കുമ്പോള്‍ ഏകദേശം 20 പൗണ്ട് വരെ അധികമായി ചെലവാകുന്നതായാണ് റിപ്പോര്‍ട്ട്. ഒരേ പ്രദേശത്തെ പമ്പുകള്‍ക്കിടയിലെ വിലവ്യത്യാസത്തില്‍ പ്രദേശവാസികള്‍ കടുത്ത അമര്‍ഷത്തിലാണ്. ഹോര്‍മുസ് കടലിടുക്കിലെ തടസ്സങ്ങളും ഫെബ്രുവരിയില്‍ ആരംഭിച്ച ഇറാന്‍ യുദ്ധത്തെത്തുടര്‍ന്നുള്ള ആഗോള എണ്ണവില വര്‍ധനയും ഇന്ധനച്ചെലവ് ഉയരാന്‍ കാരണമായതായി റിപ്പോര്‍ട്ടുകള്‍ പറയുന്നു. യു.കെയില്‍ ഡീസല്‍ വില റെക്കോര്‍ഡ് നിരക്കിലെത്തിയതോടെ യാത്രാച്ചെലവ് കുടുംബബജറ്റുകളെയും ബാധിക്കുകയാണ്. ചെലവ് നിയന്ത്രിക്കാന്‍ പലരും യാത്രകള്‍ പരിമിതപ്പെടുത്തുകയും പൊതുഗതാഗതത്തെയും നടത്തത്തെയും ആശ്രയിക്കുകയും ചെയ്യുന്നുണ്ട്. കുറഞ്ഞ നിരക്കിലുള്ള പമ്പുകള്‍ കണ്ടെത്താന്‍ വിലതാരതമ്യ ആപ്പുകളും ഇളവുകള്‍ ലഭിക്കാന്‍ റിവാര്‍ഡ് പദ്ധതികളും ഉപയോഗിക്കുന്ന വാഹന ഉടമകളുമുണ്ട്.