ലണ്ടന്‍: ലണ്ടന് പുറത്തുള്ള പ്രദേശങ്ങളില്‍ ശരാശരി പ്രതിമാസ വാടക ആദ്യമായി 1,400 പൗണ്ട് മറികടന്നു. പ്രോപ്പര്‍ട്ടി പോര്‍ട്ടലായ റൈറ്റ്മൂവിന്റെ ഏറ്റവും പുതിയ കണക്കുകള്‍ പ്രകാരം നിരക്ക് 1,418 പൗണ്ടിലെത്തി. കഴിഞ്ഞ വര്‍ഷങ്ങളിലെ കുത്തനെയുള്ള വര്‍ധനയ്ക്കുശേഷം വാര്‍ഷിക വാടക വളര്‍ച്ചയുടെ വേഗം കുറഞ്ഞ സാഹചര്യത്തിലാണ് ഈ പുതിയ ഉയരം. ലണ്ടന് പുറത്ത് മുന്‍ പാദത്തെ അപേക്ഷിച്ച് വാടകയില്‍ 1.5 ശതമാനം വര്‍ധനയുണ്ടായി. വാര്‍ഷിക വര്‍ധന 2.4 ശതമാനമാണ്. 2021 മുതല്‍ 2023 വരെയുള്ള കാലയളവില്‍ ഏകദേശം 10 ശതമാനത്തോളം വര്‍ധന രേഖപ്പെടുത്തിയതുമായി താരതമ്യം ചെയ്യുമ്പോള്‍ ഇപ്പോഴത്തെ വളര്‍ച്ച മന്ദഗതിയിലാണ്. അതേസമയം, ലണ്ടനില്‍ വാടക വര്‍ധനയുടെ സമ്മര്‍ദം തുടരുകയാണ്. പരസ്യപ്പെടുത്തുന്ന വീടുകളുടെ ശരാശരി പ്രതിമാസ വാടക 2,825 പൗണ്ടിലെത്തി. വാര്‍ഷിക വര്‍ധന 3.2 ശതമാനമായി ഉയര്‍ന്നു. വാടകയ്ക്ക് ലഭ്യമായ വീടുകളുടെ എണ്ണവും ആവശ്യക്കാരുടെ എണ്ണവും തമ്മിലുള്ള അന്തരമാണ് നിരക്കുകളെ സ്വാധീനിക്കുന്നത്.

ദേശീയതലത്തില്‍ വാടകയ്ക്ക് ലഭ്യമായ പ്രോപ്പര്‍ട്ടികളുടെ എണ്ണം ഒരു വര്‍ഷം മുമ്പുള്ളതിനേക്കാള്‍ രണ്ടു ശതമാനം കുറഞ്ഞു. വാടകവീടുകള്‍ക്കുള്ള ആവശ്യത്തിലും സമാനമായ കുറവുണ്ടായി. എന്നാല്‍ ലണ്ടനില്‍ ലഭ്യമായ വാടകവീടുകളുടെ എണ്ണം ഒമ്പതു ശതമാനം കുറഞ്ഞപ്പോള്‍ ആവശ്യക്കാരുടെ എണ്ണത്തിലെ കുറവ് ആറു ശതമാനമാണ്. വീടുകളുടെ ലഭ്യതയില്‍ കൂടുതല്‍ ഇടിവുണ്ടായത് വാടകക്കാര്‍ക്കിടയിലെ മത്സരം തുടരാന്‍ കാരണമാകുന്നു. വാടകക്കാരുടെ അവകാശങ്ങള്‍ ശക്തിപ്പെടുത്തുന്നത് വീട്ടുടമകളെ വീടുകള്‍ വിറ്റ് വാടക വിപണിയില്‍നിന്ന് പിന്മാറാന്‍ പ്രേരിപ്പിക്കുമെന്ന ആശങ്ക ഉയര്‍ന്നിരുന്നു. എന്നാല്‍ അത്തരമൊരു വ്യാപക പിന്മാറ്റം നടക്കുന്നുവെന്ന് തെളിയിക്കുന്ന കാര്യമായ തെളിവുകള്‍ നിലവില്‍ ലഭ്യമല്ലെന്നാണ് റിപ്പോര്‍ട്ട് സൂചിപ്പിക്കുന്നത്.