ലണ്ടന്‍: ഇംഗ്ലണ്ടില്‍ ഇത്തവണ പതിവിലും നേരത്തേ ഇന്‍ഫ്ലുവന്‍സ വ്യാപിക്കുന്നതായി ആരോഗ്യവിദഗ്ധരുടെ മുന്നറിയിപ്പ്. രോഗവ്യാപനം ഇപ്പോഴും കുറഞ്ഞ തോതിലാണെങ്കിലും കേസുകള്‍ ഉയരുന്ന പ്രവണതയുണ്ടെന്ന് യുകെ ഹെല്‍ത്ത് സെക്യൂരിറ്റി ഏജന്‍സി വ്യക്തമാക്കി. കഴിഞ്ഞ നാല് ശൈത്യകാലങ്ങള്‍ക്ക് മുന്നോടിയായുള്ള സമാന കാലയളവുമായി താരതമ്യം ചെയ്യുമ്പോള്‍ സെപ്റ്റംബറില്‍ കൂടുതല്‍ ഫ്ലൂ കേസുകള്‍ റിപ്പോര്‍ട്ട് ചെയ്തിട്ടുണ്ട്. രോഗലക്ഷണങ്ങളുമായി അത്യാഹിത വിഭാഗങ്ങളില്‍ ചികിത്സ തേടുന്നവരുടെ എണ്ണവും പ്രതീക്ഷിച്ചതിനെക്കാള്‍ ഉയര്‍ന്നിട്ടുണ്ട്.
പ്രായമായവരും മറ്റ് ആരോഗ്യപ്രശ്നങ്ങളുള്ളവരും വാക്സിനേഷന്‍ വൈകിക്കരുതെന്ന് ഓക്സ്ഫഡ് വാക്സിന് ഗ്രൂപ്പ് ഡയറക്ടര്‍ പ്രൊഫസര്‍ സര്‍ ആന്‍ഡ്രൂ പൊള്ളാര്‍ഡ് നിര്‍ദേശിച്ചു. രോഗവ്യാപനം രൂക്ഷമാകുന്നതിന് മുമ്പ് വാക്സിന് സ്വീകരിക്കുന്നത് സംരക്ഷണം ലഭിക്കാന്‍ സഹായിക്കുമെന്നും അദ്ദേഹം പറഞ്ഞു. കുട്ടികള്‍ക്കും രോഗം ഗുരുതരമാകാന്‍ സാധ്യതയുള്ള വിഭാഗങ്ങള്‍ക്കും എന്‍എച്ച്എസ് മുഖേന സൗജന്യ ഫ്ലൂ വാക്സിന് ലഭ്യമാണ്. സൗജന്യ വാക്സിന് അര്‍ഹതയില്ലാത്തവര്‍ക്ക് ചില തൊഴിലിടങ്ങള്‍ വഴിയും സ്വകാര്യ ഫാര്‍മസികള്‍ മുഖേനയും വാക്സിനെടുക്കാം. സ്വകാര്യ ഫാര്‍മസികളില്‍ ഏകദേശം 20 പൗണ്ടാണ് നിരക്കെന്നും ചില അംഗത്വ പദ്ധതികളില്‍ 10 പൗണ്ടില്‍ താഴെ വാക്സിന് ലഭിക്കുമെന്നും റിപ്പോര്‍ട്ടില്‍ പറയുന്നു.
കാലാവസ്ഥയിലെ മാറ്റങ്ങള്‍, പ്രചരിക്കുന്ന വൈറസ് വകഭേദം, ജനങ്ങളുടെ പ്രതിരോധശേഷി, പരസ്പര സമ്പര്‍ക്കം തുടങ്ങിയവ രോഗവ്യാപനത്തിന്റെ തോതിനെ സ്വാധീനിക്കുന്ന ഘടകങ്ങളാണ്. വാക്സിന് സ്വീകരിച്ചശേഷം പ്രതിരോധം രൂപപ്പെടാന്‍ ഏതാനും ആഴ്ചകള്‍ വേണ്ടിവരുമെന്ന് ഗ്ലാസ്‌ഗോ സര്‍വകലാശാലയിലെ വൈറസ് ഗവേഷണ കേന്ദ്രത്തിലെ പകര്‍ച്ചവ്യാധി വിദഗ്ധ പ്രൊഫസര്‍ അന്റോണിയ ഹോ ചൂണ്ടിക്കാട്ടി. അതിനാല്‍ വാക്സിനെടുക്കാന്‍ ഉദ്ദേശിക്കുന്നവര്‍ അത് നേരത്തേ സ്വീകരിക്കണമെന്നാണ് നിര്‍ദേശം.
