തിരുവനന്തപുരം കോര്പറേഷന് മുട്ടട വാര്ഡിലെ കോണ്ഗ്രസ് സ്ഥാനാര്ത്ഥി വൈഷ്ണ സുരേഷിന് മത്സരിക്കാം. വോട്ടര് പട്ടികയില് നിന്ന് ഒഴിവാക്കിയ നടപടി ഹൈക്കോടതി നിര്ദേശ പ്രകാരം സംസ്ഥാന തിരഞ്ഞെടുപ്പ് കമ്മീഷന് തിരുത്തി. വൈഷ്ണയുടെ പേര് വോട്ടര്പട്ടികയില്നിന്ന് ഒഴിവാക്കിയ നടപടി റദ്ദാക്കിയതോടെ മുട്ടടയില് വൈഷ്ണയ്ക്ക് മത്സരിക്കാനുള്ള തടസങ്ങള് നീങ്ങി. വൈഷ്ണയുടെ പേര് തിരുവനന്തപുരം മുനിസിപ്പല് കോര്പറേഷന് 27-ാം വാര്ഡ്, മുട്ടട പാര്ട്ട് നമ്പര് 5ലെ വോട്ടര് പട്ടികയില് പുനഃസ്ഥാപിക്കാന് കമ്മീഷന് ഉത്തരവിട്ടു. ഇന്നു തന്നെ പേര് പുനസ്ഥാപിച്ച് കമ്മീഷനെ അറിയിക്കണമെന്നും കോര്പറേഷന് ഇലക്ടറല് രജിസ്ട്രേഷന് ഓഫീസര്ക്ക് നിര്ദേശം നല്കിയിട്ടുണ്ട് തിരഞ്ഞെടുപ്പ് കമ്മീഷന് പ്രസിദ്ധീകരിച്ച അന്തിമ വോട്ടര് പട്ടികയില് വൈഷ്ണയുടെ പേരില്ലാതെ വന്നതോടെയാണ് സ്ഥാനാര്ത്ഥിത്വം പ്രതിസന്ധിയിലായത്. കോര്പറേഷനിലെ ഏറ്റവും പ്രായം കുറഞ്ഞ സ്ഥാനാര്ഥിയെന്ന നിലയിലാണ് ഐടി ജീവനക്കാരിയായ വൈഷ്ണയെ കോണ്ഗ്രസ് അവതരിപ്പിച്ചത്. കോര്പറേഷന് പരിധിയിലെ ഏതെങ്കിലും വാര്ഡിലെ വോട്ടര് പട്ടികയില് പേരുണ്ടെങ്കില് മാത്രമേ മത്സരിക്കാന് കഴിയൂ. ഇതോടെ സ്ഥാനാര്ത്ഥിയെ മാറ്റി നിശ്ചയിക്കേണ്ട അവസ്ഥയിലായിരുന്നു കോണ്ഗ്രസ് നേതൃത്വം. വോട്ടര് പട്ടികയില് പേരുചേര്ക്കാന് നല്കിയ വിലാസത്തിലെ തെറ്റു ചൂണ്ടിക്കാട്ടിയാണ് തിരഞ്ഞെടുപ്പ് കമ്മീഷന് പട്ടികയില്നിന്ന് പേര് നീക്കിയത്. വൈഷ്ണയുടെ വിലാസം ശരിയല്ലെന്നും പട്ടികയില്നിന്ന് ഒഴിവാക്കണമെന്നുമാവശ്യപ്പെട്ട് സിപിഎം തിരഞ്ഞെടുപ്പ് കമ്മീഷന് നേരത്തേ പരാതി നല്കിയിരുന്നു. ഇതിന്റെ അടിസ്ഥാനത്തില് വൈഷ്ണയെ കമ്മീഷന് ഹിയറിങ്ങിനു വിളിപ്പിച്ചിരുന്നു. ബന്ധപ്പെട്ട രേഖകള് സമര്പ്പിച്ചെങ്കിലും അന്തിമ വോട്ടര് പട്ടികയില് നിന്ന് വൈഷ്ണയുടെ പേര് നീക്കുകയായിരുന്നു.
