ലണ്ടന്: വാടകക്കാര്ക്ക് കൂടുതല് അവകാശങ്ങള് ഉറപ്പാക്കുന്ന പുതിയ നിയമം പ്രാബല്യത്തില് വന്നതോടെ ബ്രിട്ടനിലെ വാടകവീടുകളില് വളര്ത്തുമൃഗങ്ങളെ താമസിപ്പിക്കുന്നതിനുള്ള നിയന്ത്രണങ്ങളില് ഇളവ്. മെയില് പ്രാബല്യത്തില് വന്ന റെന്റേഴ്സ് റൈറ്റ്സ് ആക്ട് പ്രകാരം, ന്യായമായ കാരണമില്ലാതെ വളര്ത്തുമൃഗങ്ങളെ കൂടെ താമസിപ്പിക്കുന്നതില്നിന്ന് വാടകക്കാരെ വിലക്കാന് വീട്ടുടമകള്ക്ക് കഴിയില്ല. വളര്ത്തുമൃഗത്തെ കൂടെ താമസിപ്പിക്കാനുള്ള വാടകക്കാരന്റെ അപേക്ഷ വീട്ടുടമ ന്യായമായ രീതിയില് പരിഗണിക്കണമെന്നും മതിയായ കാരണമില്ലാതെ നിരസിക്കരുതെന്നുമാണ് നിയമം വ്യവസ്ഥ ചെയ്യുന്നത്. എന്നാല്, വളര്ത്തുമൃഗങ്ങളെ താമസിപ്പിക്കാനുള്ള അനുമതി എല്ലാ സാഹചര്യങ്ങളിലും ഉറപ്പാണെന്ന് ഇതിന് അര്ഥമില്ലെന്ന് പ്രോപ്പര്ട്ടി ഏജന്റുമാര് ചൂണ്ടിക്കാട്ടുന്നു.
പുതിയ നിയമം പ്രാബല്യത്തില് വന്നതിന് പിന്നാലെ വളര്ത്തുമൃഗസൗഹൃദ വാടകവീടുകള്ക്കായുള്ള ഓണ്ലൈന് തിരച്ചിലില് ഗണ്യമായ കുറവുണ്ടായി. മെയ്-ജൂണ് മാസങ്ങളില് ഇത്തരം വീടുകള്ക്കായുള്ള തിരച്ചില് മുന്വര്ഷത്തെ അപേക്ഷിച്ച് 50 ശതമാനം കുറഞ്ഞതായി പ്രോപ്പര്ട്ടി വെബ്സൈറ്റായ റൈറ്റ്മൂവിന്റെ കണക്കുകള് വ്യക്തമാക്കുന്നു. വളര്ത്തുമൃഗങ്ങളെ താമസിപ്പിക്കാന് ഇനി വീട്ടുടമയുടെ അനുമതി ആവശ്യമില്ലെന്ന തെറ്റിദ്ധാരണ ചില വാടകക്കാര്ക്കിടയിലുണ്ടെന്നും ഏജന്റുമാര് പറയുന്നു.
വീടിന്റെ വലുപ്പം, വളര്ത്തുമൃഗങ്ങളുടെ എണ്ണം, മറ്റ് താമസക്കാരുടെ ആരോഗ്യപ്രശ്നങ്ങള് തുടങ്ങിയവ പരിഗണിച്ച് അപേക്ഷ നിരസിക്കാന് വീട്ടുടമയ്ക്ക് അവകാശമുണ്ട്. മറ്റ് വാടകക്കാര്ക്ക് വളര്ത്തുമൃഗങ്ങളുമായി ബന്ധപ്പെട്ട അലര്ജി ഉണ്ടാവുക, വലിയ മൃഗത്തെ താമസിപ്പിക്കാന് കഴിയാത്തവിധം വീട് ചെറുതാവുക, ഒന്നിലധികം വളര്ത്തുമൃഗങ്ങളെ ഉള്ക്കൊള്ളാനുള്ള സൗകര്യമില്ലാതിരിക്കുക തുടങ്ങിയവ ന്യായമായ കാരണങ്ങളായി പരിഗണിക്കാം. നിയമം അനുവദിക്കാത്ത മൃഗങ്ങളെയാണ് വളര്ത്തുന്നതെങ്കിലും വീട്ടുടമയ്ക്ക് അനുമതി നിഷേധിക്കാം. വീട്ടുടമ ലീസ്ഹോള്ഡറായിരിക്കുകയും കെട്ടിടത്തിന്റെ ഫ്രീഹോള്ഡര് വളര്ത്തുമൃഗങ്ങളെ അനുവദിക്കാതിരിക്കുകയും ചെയ്യുന്ന സാഹചര്യത്തിലും വാടകക്കാരന്റെ അപേക്ഷ നിരസിക്കാനാകും.
