ലണ്ടന്/കെന്റ്: യുകെയിലെ ജിസിഎസ്ഇ പരീക്ഷയില് മികച്ച വിജയം നേടി ഉന്നതവിദ്യാഭ്യാസ മന്ത്രി റോജി എം. ജോണിന്റെ ബന്ധുവായ ആല്വിന്. മന്ത്രിയുടെ സഹോദരി റിന്സി ജോണിന്റെ മകനാണ് കെന്റിലെ റെയിന്ഹാം മാര്ക്ക് ഗ്രാമര് സ്കൂള് വിദ്യാര്ഥിയായ ആല്വിന്. ആരോഗ്യപ്രശ്നങ്ങള് ഉള്പ്പെടെയുള്ള വെല്ലുവിളികളെ അതിജീവിച്ചാണ് ആല്വിന് ശ്രദ്ധേയമായ വിജയം സ്വന്തമാക്കിയത്. ജിസിഎസ്ഇ ഫലം പുറത്തുവന്നതിന് പിന്നാലെ അമ്മാവനായ മന്ത്രി റോജി എം. ജോണ് ആല്വിനെ ഫോണില് വിളിച്ച് അഭിനന്ദിച്ചു. തുടര്പഠനത്തിനും ഭാവിയിലെ ലക്ഷ്യങ്ങള്ക്കും മന്ത്രി ആശംസകള് നേര്ന്നു. മകന്റെ നേട്ടത്തിലുള്ള സന്തോഷവും അഭിമാനവും പങ്കുവച്ച് റിന്സി ജോണ് സമൂഹമാധ്യമത്തില് ഹൃദയസ്പര്ശിയായ കുറിപ്പും പങ്കുവച്ചു. പഠനകാലത്ത് ആല്വിന് ആരോഗ്യപരമായ വെല്ലുവിളികള് നേരിടേണ്ടിവന്നിരുന്നുവെന്നും അതിനിടയിലും ആത്മവിശ്വാസവും നിശ്ചയദാര്ഢ്യവും കൈവിടാതെ പരീക്ഷയെ നേരിട്ടതാണ് വിജയത്തെ കൂടുതല് ശ്രദ്ധേയമാക്കുന്നതെന്നും റിന്സി കുറിച്ചു. പരീക്ഷാഫലത്തിനൊപ്പം ആല്വിന്റെ സ്വഭാവം, വ്യക്തിത്വം, സ്കൂളിലെ നേട്ടങ്ങള് എന്നിവയെ അധ്യാപകരും പ്രത്യേകം പ്രശംസിച്ചതായി അവര് പറഞ്ഞു.
ഫലം പ്രഖ്യാപിച്ച ദിവസം സ്കൂളിലെ ഹെഡ്ടീച്ചറും ഹെഡ് ഓഫ് ഇയറും ആല്വിനെക്കുറിച്ച് അഭിനന്ദനപൂര്വം സംസാരിച്ചത് കുടുംബത്തിന്റെ അഭിമാനം ഇരട്ടിയാക്കിയെന്നും റിന്സി വ്യക്തമാക്കി. പരീക്ഷാഫലത്തില് മാത്രം ഒതുങ്ങുന്നതല്ല ആല്വിന്റെ നേട്ടമെന്നും വെല്ലുവിളികള്ക്കിടയിലും പ്രകടിപ്പിച്ച കരുത്തും ധൈര്യവും നിശ്ചയദാര്ഢ്യവുമാണ് ഏറ്റവും അഭിമാനകരമെന്നും അവര് കുറിച്ചു.
നാലുമക്കളുടെ കുടുംബത്തിലെ അഭിമാനനേട്ടം
20 വര്ഷത്തിലേറെയായി കെന്റില് താമസിക്കുന്ന അനസ്തറ്റിക് പ്രാക്ടീഷണര് കൂടിയായ റിന്സി ജോണിനും കുടുംബത്തിനും നാല് മക്കളാണ്-എഡ്വിന്, ഹെലന്, ആല്വിന്, മരിയ. എഡ്വിന് എയ്റോസ്പേസ് എന്ജിനീയറിങ് നാലാം വര്ഷ വിദ്യാര്ഥിയും ഹെലന് ബയോമെഡിക്കല് സയന്സ് രണ്ടാം വര്ഷ വിദ്യാര്ഥിയുമാണ്. മരിയ ഇയര് 8 വിദ്യാര്ഥിയാണ്. യുകെയില് ജനിച്ചുവളര്ന്ന മക്കളാണെങ്കിലും മലയാളവുമായുള്ള ബന്ധം ശക്തമായി നിലനിര്ത്താന് കുടുംബം പ്രത്യേകം ശ്രദ്ധിക്കുന്നുണ്ട്. വീട്ടിലെ സംസാരഭാഷ മലയാളമാണ്. കുടുംബാംഗങ്ങള് തമ്മില് മലയാളം സംസാരിക്കുന്നതും മലയാള സംസ്കാരത്തോടുള്ള അടുപ്പം നിലനിര്ത്തുന്നതും കുടുംബത്തിന്റെ പ്രത്യേകതയാണ്. റോജി എം. ജോണിന്റെയും റിന്സി ജോണിന്റെയും പിതാവ് ജോണ് എം.വിയും കൊച്ചുമകന്റെ വിജയത്തില് ഏറെ സന്തോഷത്തിലാണ്. മകളെ സന്ദര്ശിക്കുന്നതിനായി അദ്ദേഹം നിലവില് യുകെയിലുണ്ട്.
സിനിമാ സംവിധാനമാണ് ആല്വിന്റെ സ്വപ്നം
സിനിമയാണ് ആല്വിന്റെ പ്രധാന താല്പര്യം. മലയാളം ഉള്പ്പെടെയുള്ള സിനിമകള് കാണാന് ഇഷ്ടപ്പെടുന്ന ആല്വിന് ഭാവിയില് സിനിമാ സംവിധായകനാകാനാണ് ആഗ്രഹിക്കുന്നത്. ജിസിഎസ്ഇ വിജയത്തിന് പിന്നാലെ റെയിന്ഹാം മാര്ക്ക് ഗ്രാമര് സ്കൂളില് തന്നെ എ ലെവല് പഠനം തുടരാനുള്ള തയ്യാറെടുപ്പിലാണ്. സിനിമാ സംവിധാന രംഗത്തേക്ക് കടക്കുന്നതിനനുയോജ്യമായ വിഷയങ്ങള് എ ലെവലില് തിരഞ്ഞെടുക്കാനും അതിലൂടെ തന്റെ സ്വപ്നത്തിലേക്കുള്ള യാത്ര ആരംഭിക്കാനുമാണ് ആല്വിന്റെ ലക്ഷ്യം. ഇതിനോടകം നാല് പുസ്തകങ്ങള് എഴുതി സാഹിത്യരംഗത്തും ആല്വിന് കഴിവ് തെളിയിച്ചിട്ടുണ്ട്. മികച്ച നര്ത്തകന് കൂടിയായ ആല്വിന് മലയാളി അസോസിയേഷന് പരിപാടികളില് നൃത്തം അവതരിപ്പിക്കാറുമുണ്ട്. യുകെയില് ജനിച്ചുവളര്ന്നെങ്കിലും മലയാളവും മലയാള സിനിമയും കുടുംബത്തിലൂടെ ലഭിച്ച സാംസ്കാരിക ബന്ധത്തിന്റെ ഭാഗമാണെന്ന് കുടുംബാംഗങ്ങള് പറയുന്നു. സിനിമാ സംവിധാനത്തിലൂടെ ആ ലോകവുമായി കൂടുതല് അടുത്തുനില്ക്കണമെന്ന ആല്വിന്റെ ആഗ്രഹത്തിന് കുടുംബത്തിന്റെ പൂര്ണ പിന്തുണയുമുണ്ട്. പ്രതിസന്ധികള്ക്കിടയില് നേടിയ മികച്ച ജിസിഎസ്ഇ വിജയം ആല്വിന്റെ ഭാവിസ്വപ്നങ്ങളിലേക്കുള്ള നിര്ണായക ചുവടുവയ്പ്പായി മാറിയിരിക്കുകയാണ്.
റിന്സി ജോണിന്റെ ഫെയ്സ്ബുക്ക് കുറിപ്പില് നിന്ന്:
''പ്രിയ ആല്വിന്, നിന്റെ മികച്ച ജിസിഎസ്ഇ പരീക്ഷാഫലത്തിന് അഭിനന്ദനങ്ങള്. നീ കടന്നുപോയ സാഹചര്യങ്ങള് അറിയാവുന്നതിനാല് നിന്നെക്കുറിച്ച് എത്രമാത്രം അഭിമാനമുണ്ടെന്ന് പറഞ്ഞറിയിക്കാനാവില്ല. പരീക്ഷാഫലത്തിനപ്പുറം നിന്റെ സ്വഭാവവും വ്യക്തിത്വവും നേട്ടങ്ങളും ഞങ്ങളെ അഭിമാനിപ്പിക്കുന്നു. വെല്ലുവിളികള്ക്കിടയിലും നീ പ്രകടിപ്പിച്ച കരുത്തും ധൈര്യവും നിശ്ചയദാര്ഢ്യവും അസാമാന്യമാണ്. ഇനിയും നിരവധി നേട്ടങ്ങളും വിജയങ്ങളും നിറഞ്ഞ മനോഹരമായ യാത്രയുടെ തുടക്കമാകട്ടെ ഇത്.
