ലഖ്നൗ: ഭാര്യയോടൊപ്പം ഐവിഎഫ് ചികിത്സയ്ക്കായി ഇന്ത്യയിലെത്തിയ ബ്രിട്ടീഷ് പൗരന്‍ പങ്കുവച്ച ആശുപത്രി അനുഭവം സമൂഹമാധ്യമങ്ങളില്‍ ശ്രദ്ധ നേടുന്നു. ലഖ്നൗവിലെ മാക്‌സ് സ്‌പെഷ്യാലിറ്റി ആശുപത്രിയില്‍ ലഭിച്ച സേവനങ്ങളെ പ്രശംസിച്ച് ഡേവ് ഫ്‌ല്യൂ ആണ് ഇന്‍സ്റ്റഗ്രാമില്‍ വീഡിയോ പങ്കുവച്ചത്. ചികിത്സയുടെ വേഗതയും സൗകര്യങ്ങളും ചെലവുകുറവും തന്നെ അത്ഭുതപ്പെടുത്തിയെന്ന് അദ്ദേഹം പറയുന്നു.
നിശ്ചയിച്ച സമയത്തുതന്നെ ഡോക്ടറെ കാണാന്‍ കഴിഞ്ഞെന്നും ആവശ്യമായ പരിശോധനകള്‍ ഒരേ കെട്ടിടത്തില്‍ പൂര്‍ത്തിയാക്കാനായെന്നും ഡേവ് വിശദീകരിച്ചു. പരിശോധനകള്‍ക്കുശേഷം 15 മിനിറ്റ് മുതല്‍ ഒരു മണിക്കൂറിനുള്ളില്‍ ഫലങ്ങള്‍ ലഭിച്ചതാണ് ഏറെ ശ്രദ്ധേയമായി തോന്നിയതെന്നും അദ്ദേഹം പറഞ്ഞു. യുകെയില്‍ എക്‌സ്റേ റിപ്പോര്‍ട്ടിനുപോലും ഒരു മാസമോ അതിലധികമോ കാത്തിരിക്കേണ്ടിവന്ന അനുഭവവുമായി താരതമ്യം ചെയ്താണ് ഡേവ് ഇന്ത്യയിലെ സേവനങ്ങളെ വിലയിരുത്തിയത്. ആശുപത്രിയിലെ ഇന്റര്‍നാഷണല്‍ ലോഞ്ചിലെ ജീവനക്കാരുടെ സഹായവും പരിചരണവും തനിക്കും ഭാര്യയ്ക്കും ആശ്വാസമായെന്നും അദ്ദേഹം വ്യക്തമാക്കി.
കുറഞ്ഞ ചെലവില്‍ വേഗത്തില്‍ സേവനങ്ങള്‍ ലഭിച്ചതില്‍ സന്തോഷം പ്രകടിപ്പിച്ച ഡേവിന്റെ വീഡിയോയ്ക്ക് നിരവധി പ്രതികരണങ്ങളാണ് ലഭിച്ചത്. ഒക്ടോബര്‍ 15ലെ റിപ്പോര്‍ട്ട് പ്രകാരം വീഡിയോ 1.68 ലക്ഷത്തിലധികം പേര്‍ കണ്ടിരുന്നു. ഇരുരാജ്യങ്ങളിലെയും ചികിത്സാനുഭവങ്ങള്‍ പങ്കുവച്ചും അഭിപ്രായങ്ങള്‍ രേഖപ്പെടുത്തിയും ആളുകള്‍ ചര്‍ച്ചയില്‍ പങ്കെടുത്തു. ഒരു ആശുപത്രിയില്‍ ലഭിച്ച സേവനങ്ങളെ അടിസ്ഥാനമാക്കിയുള്ള ഡേവിന്റെ വ്യക്തിപരമായ വിലയിരുത്തലാണ് വീഡിയോയിലുള്ളത്.
