തൃശൂര്‍: തൃശൂരില്‍ നിന്ന് എയര്‍പോര്‍ട്ടിലേക്ക് മെട്രോ വരില്ലെന്ന് കേന്ദ്രമന്ത്രി സുരേഷ് ഗോപി. അതിന് പല കാരണങ്ങളുണ്ടെന്നും, ആ പദ്ധതി ഒരു സ്വപ്നമായിട്ടാണ് അവതരിപ്പിച്ചതെന്നും അദ്ദേഹം വ്യക്തമാക്കി. തൃശൂര്‍ കോര്‍പ്പറേഷന്‍ സ്റ്റേഡിയത്തില്‍ നടന്ന 'കോഫി ടൈം' പരിപാടിയിലാണ് പ്രതികരണം.
മെട്രോ പദ്ധതി: രാഷ്ട്രീയ വിമര്‍ശനങ്ങള്‍ക്കും വ്യക്തമായ മറുപടി
- ''ഇലക്ഷനിന് മുമ്പ് മെട്രോ പദ്ധതി പറഞ്ഞതിനു പിന്നാലെ അന്നും ജയിച്ചില്ല, രണ്ടാമതും ജയിച്ചില്ല. മൂന്നാം തവണ ജയിച്ചപ്പോള്‍ 'പദ്ധതി എവിടെ' എന്ന് ചോദിക്കുന്നത് രാഷ്ട്രീയക്കാരാണ്,'' എന്നും സുരേഷ് ഗോപി പറഞ്ഞു.
- പാലിയേക്കര വഴി പാലക്കാടേക്കും കോയമ്പത്തൂരേക്കും വരണമെന്നായിരുന്നു തന്റെ നിര്‍ദ്ദേശം. അതിനാണ് അവഹേളനമുണ്ടായതെന്നും അദ്ദേഹം വ്യക്തമാക്കി.
- ഡല്‍ഹി മെട്രോ ഹരിയാനയിലെത്തിയപ്പോള്‍ അത് ആര്‍ആര്‍ടിഎസ് ആയിരുന്നുവെന്നും, കേരള സര്‍ക്കാര്‍ ഡിപിആര്‍ നല്‍കുകയാണെങ്കില്‍ പദ്ധതി സാധ്യമാകുമെന്നും അദ്ദേഹം പറഞ്ഞു.
- ഗുരുവായൂര്‍-പൊന്നാനി ആര്‍ആര്‍ടിഎസിന് തുരങ്കം വച്ചത് വിഘടനവാദികളാണെന്നും ആരോപിച്ചു.
എയിംസ്: ആലപ്പുഴയോ തൃശൂരോ, ഇടുക്കി ഒഴിവാക്കണം
- എയിംസ് സ്ഥാപനം സംസ്ഥാനത്തിന് ഗുണകരമാകുന്ന സ്ഥലത്തായിരിക്കണം. ഇടുക്കിയില്‍ ഭൂമിശാസ്ത്രപരമായി പ്രശ്‌നങ്ങളുണ്ട്. ആലപ്പുഴയാണ് ഏറ്റവും അനുയോജ്യമായ സ്ഥലം.
- ''ആലപ്പുഴയ്ക്ക് അനുവദിക്കില്ലെങ്കില്‍ തൃശൂരിന്റെ തണ്ടെല്ല് പാര്‍ലമെന്റില്‍ പ്രദര്‍ശിപ്പിക്കും. തൃശൂരിന് തന്നെ വേണം. 2029-ല്‍ എയിംസിന്റെ തറക്കല്ലിടാതെ വോട്ട് അഭ്യര്‍ത്ഥിക്കില്ല,'' എന്നും സുരേഷ് ഗോപി പറഞ്ഞു.
കോര്‍പ്പറേഷന്‍ സ്റ്റേഡിയം നവീകരണത്തിനായി ജനധനശേഖരണം
- കോര്‍പ്പറേഷന്‍ സ്റ്റേഡിയം നവീകരണത്തില്‍ സ്വകാര്യ ഏജന്‍സിയെ ഒഴിവാക്കാന്‍ രണ്ട് കോടി മടക്കി നല്‍കാമെന്നും, 20 പേര്‍ തയ്യാറായാല്‍ താന്‍ ഒരു വിഹിതം നല്‍കുമെന്നും സുരേഷ് ഗോപി പറഞ്ഞു.
- ''തൃശൂരുകാര്‍ എംപിയുടെ നേതൃത്വത്തില്‍ ധനശേഖരണം നടത്തും. ബിജെപി കൗണ്‍സില്‍ എത്തുന്നതാണെങ്കില്‍ സ്റ്റേഡിയം വിഷയത്തില്‍ തീരുമാനമെടുക്കാത്ത പക്ഷം അവരുടെ നടുവൊടിക്കും,'' എന്നും അദ്ദേഹം പറഞ്ഞു.
സിന്തറ്റിക് ട്രാക്ക്: തൃശൂരിന് നഷ്ടം, ഇരിങ്ങാലക്കുടയ്ക്ക് നേട്ടം
- തൃശൂര്‍ കോര്‍പ്പറേഷന്‍ സ്റ്റേഡിയത്തില്‍ സിന്തറ്റിക് ട്രാക്കിനായി പി. ടി. ഉഷ വാഗ്ദാനം ചെയ്ത 19 കോടി നഷ്ടപ്പെട്ടതായി സുരേഷ് ഗോപി പറഞ്ഞു.
- പിന്നീട് ഈ തുക ഉപയോഗിച്ച് ഇരിങ്ങാലക്കുട ക്രൈസ്റ്റ് കോളേജ് സ്റ്റേഡിയം സിന്തറ്റിക് ട്രാക്ക് ആക്കിയതായും അദ്ദേഹം വ്യക്തമാക്കി.
