ലണ്ടന്‍: ബജറ്റ് അവതരണത്തിന് ഒരാഴ്ച മാത്രം ശേഷിക്കെ ബ്രിട്ടനില്‍ പണപ്പെരുപ്പം ഉയര്‍ന്നത് സര്‍ക്കാരിനും കുടുംബങ്ങള്‍ക്കും ആശങ്കയാകുന്നു. സെപ്റ്റംബറിലെ പണപ്പെരുപ്പ നിരക്ക് 3.5 ശതമാനമായി വര്‍ധിച്ചതായി ഓഫീസ് ഫോര്‍ നാഷണല്‍ സ്റ്റാറ്റിസ്റ്റിക്‌സ് പുറത്തുവിട്ട കണക്കുകള്‍ വ്യക്തമാക്കുന്നു. സര്‍ക്കാരിന്റെ കടമെടുപ്പ് ഉയരുന്നതിനൊപ്പം ഇറാന്‍-യുഎസ് യുദ്ധത്തിന്റെ പശ്ചാത്തലത്തില്‍ ഇന്ധനവില വര്‍ധിച്ചുനില്‍ക്കുന്നതും സാമ്പത്തിക സമ്മര്‍ദം ശക്തമാക്കുന്നു. വിലക്കയറ്റം നിയന്ത്രിക്കുന്നതിനായി ബാങ്ക് ഓഫ് ഇംഗ്ലണ്ട് പലിശനിരക്ക് ഉയര്‍ത്തുമോയെന്നാണ് വിപണികള്‍ ഉറ്റുനോക്കുന്നത്. അടുത്ത മാസം ചേരുന്ന മോണിറ്ററി പോളിസി കമ്മിറ്റി അടിസ്ഥാന പലിശനിരക്ക് വര്‍ധിപ്പിച്ചേക്കുമെന്ന ആശങ്കയുണ്ട്. ഡിസംബറിലും വീണ്ടും വര്‍ധനയുണ്ടാകാമെന്ന പ്രതീക്ഷകള്‍ നിലനില്‍ക്കുന്നുണ്ടെങ്കിലും ഇതുസംബന്ധിച്ച തീരുമാനം പ്രഖ്യാപിച്ചിട്ടില്ല. പലിശ ഉയര്‍ന്നാല്‍ ചില മോര്‍ട്ട്‌ഗേജ് വായ്പക്കാരുടെ തിരിച്ചടവുഭാരം വര്‍ധിക്കാനിടയുണ്ട്.
ഇതിനിടെ, ചാന്‍സലര്‍ ജോണ്‍ ഹീലി അവതരിപ്പിക്കുന്ന ബജറ്റില്‍ കൂടുതല്‍ നികുതികള്‍ പ്രഖ്യാപിക്കുമോയെന്ന ആശങ്കയും ശക്തമാണ്. സമ്പദ്വ്യവസ്ഥ മുന്നറിയിപ്പുകള്‍ നല്‍കുകയാണെന്ന് പ്രതിപക്ഷ നേതാവ് കെമി ബാഡെനോക് വിമര്‍ശിച്ചു. ക്ഷേമപദ്ധതികള്‍ക്കുള്ള ചെലവ് കുറയ്ക്കണമെന്ന് ആന്‍ഡി ബേണ്‍ഹാമിനോട് അവര്‍ ആവശ്യപ്പെട്ടു. ബേണ്‍ഹാമിന്റെ പദ്ധതികള്‍ക്ക് പണം കണ്ടെത്താന്‍ സര്‍ക്കാര്‍ നികുതിവര്‍ധനയിലേക്ക് നീങ്ങുമോയെന്നതാണ് വിപണികളുടെ മറ്റൊരു ആശങ്ക. ആദായനികുതി പരിധികള്‍ 2031 വരെ മരവിപ്പിച്ചിരിക്കുന്നതിനാല്‍, വിലക്കയറ്റത്തിനനുസരിച്ച് ശമ്പളം വര്‍ധിക്കുന്നവര്‍ കൂടുതല്‍ നികുതിഭാരത്തിലേക്ക് നീങ്ങാനും സാധ്യതയുണ്ട്. ജീവിതച്ചെലവ് ഉയരുന്നതിനൊപ്പം വായ്പാതിരിച്ചടവും നികുതിഭാരവും വര്‍ധിക്കുമെന്ന ആശങ്ക നിലനില്‍ക്കുന്നതിനാല്‍, കുടുംബങ്ങള്‍ക്ക് ആശ്വാസം നല്‍കുന്ന പ്രഖ്യാപനങ്ങള്‍ ബജറ്റിലുണ്ടാകുമോയെന്നത് നിര്‍ണായകമാകും.
