ലണ്ടന്‍: ഇംഗ്ലണ്ടിലെയും വെയില്‍സിലെയും ജയിലുകളില്‍ രൂക്ഷമായ അമിത തിരക്ക് കുറയ്ക്കാന്‍ ഉപയോഗിക്കാത്ത ഓഫിസ് മുറികള്‍, അലക്കുമുറികള്‍, സ്റ്റോറേജ് ഇടങ്ങള്‍ എന്നിവ തടവുകാരുടെ സെല്ലുകളാക്കി മാറ്റാന്‍ ബ്രിട്ടീഷ് സര്‍ക്കാര്‍ തീരുമാനിച്ചു. ഇതിനായി നിലവിലെ ബജറ്റില്‍ നിന്ന് £110 മില്യന്‍ ചെലവഴിക്കാനാണ് പദ്ധതി. നിലവില്‍ ജയിലുകള്‍ 97 ശതമാനം ശേഷിയിലാണ് പ്രവര്‍ത്തിക്കുന്നത്. തിരക്ക് കുറയ്ക്കുന്നതിന്റെ ഭാഗമായി ഒക്ടോബര്‍ മുതല്‍ ഏകദേശം 4,500 തടവുകാരെ ഘട്ടംഘട്ടമായി നേരത്തെ മോചിപ്പിക്കാനും സര്‍ക്കാര്‍ തീരുമാനിച്ചിട്ടുണ്ട്. അതേസമയം, ബലാത്സംഗം, ഗുരുതര ബാലലൈംഗിക കുറ്റങ്ങള്‍, ഗ്രൂമിങ് കുറ്റങ്ങള്‍ എന്നിവയില്‍ ശിക്ഷിക്കപ്പെട്ടവരെ നേരത്തെ മോചിപ്പിക്കുന്ന പദ്ധതിയില്‍ ഉള്‍പ്പെടുത്തില്ല. മാന്‍സ്ലോട്ടര്‍ കുറ്റത്തിന് ശിക്ഷിക്കപ്പെട്ടവരെയും പദ്ധതിയില്‍ നിന്ന് ഒഴിവാക്കുമെന്ന് പ്രധാനമന്ത്രി ആന്‍ഡി ബേണെം കഴിഞ്ഞ ദിവസം വ്യക്തമാക്കിയിരുന്നു.

വിദേശ തടവുകാരെ നാടുകടത്തുന്ന നടപടികള്‍ വേഗത്തിലാക്കി ജയിലുകളില്‍ കൂടുതല്‍ സ്ഥലം കണ്ടെത്താനും സര്‍ക്കാര്‍ ശ്രമിക്കുന്നുണ്ട്. ഇതിന് പുറമെ ലങ്കാഷയറില്‍ 1,700 തടവുകാരെ പാര്‍പ്പിക്കാനാകുന്ന പുതിയ ജയില്‍ നിര്‍മിക്കുന്നതിനുള്ള കരാറിലും സര്‍ക്കാര്‍ ഒപ്പുവച്ചിട്ടുണ്ട്. ജയില്‍ ശേഷി വര്‍ധിപ്പിക്കുന്നതിനൊപ്പം നേരത്തെയുള്ള മോചനം, വിദേശ തടവുകാരുടെ നാടുകടത്തല്‍, പുതിയ ജയിലുകളുടെ നിര്‍മാണം എന്നിവ സംയോജിപ്പിച്ചാണ് അമിത തിരക്ക് നിയന്ത്രിക്കാനുള്ള സര്‍ക്കാര്‍ നീക്കം.