ഷെഫീല്‍ഡിലെ ഇംഗ്ലീഷ് ഇന്‍സ്റ്റിറ്റ്യൂട്ട് ഓഫ് സ്‌പോര്‍ട്സില്‍ ജൂണ്‍ 27-ന് നടന്ന ഷെഫീല്‍ഡ് സ്ട്രൈക്കേഴ്‌സ് വോളിബോള്‍ ക്ലബ്ബിന്റെ ഓള്‍ യൂറോപ്പ് വോളിബോള്‍ ടൂര്‍ണമെന്റില്‍ മാഞ്ചസ്റ്ററിലെ RDX Manchester കിരീടം ചൂടി. ഫൈനലില്‍ Cardiff Dragons ടീമിനെ നേരിട്ടുള്ള രണ്ട് സെറ്റുകള്‍ക്ക് പരാജയപ്പെടുത്തിയാണ് ആര്‍ഡിഎക്സ് മാഞ്ചസ്റ്റര്‍ ജേതാക്കളായത്.മൂന്നാം സ്ഥാനത്തിനായുള്ള മത്സരത്തില്‍ ആതിഥേയരായ Sheffield Strikers Volleyball Club, Lions Liverpool Volleyball Club-നെ പരാജയപ്പെടുത്തി മൂന്നാം സ്ഥാനം സ്വന്തമാക്കി.

രാവിലെ നടന്ന ഉദ്ഘാടനച്ചടങ്ങില്‍ ഫാ. തോമസ് വാലുമ്മേല്‍ ടൂര്‍ണമെന്റ് ഉദ്ഘാടനം ചെയ്തു. യൂറോപ്പിന്റെ വിവിധ ഭാഗങ്ങളില്‍ നിന്നുള്ള 10 ടീമുകള്‍ പങ്കെടുത്ത ടൂര്‍ണമെന്റില്‍ ദിനം മുഴുവന്‍ ആവേശകരമായ മത്സരങ്ങളാണ് അരങ്ങേറിയത്. മത്സരങ്ങള്‍ കാണാന്‍ നിരവധി വോളിബോള്‍ പ്രേമികള്‍ എത്തിച്ചേര്‍ന്നത് ടൂര്‍ണമെന്റിന്റെ വിജയത്തിന് മാറ്റുകൂട്ടി.വ്യക്തിഗത പുരസ്‌കാരങ്ങളില്‍ RDX Manchester ടീമിലെ ആകാശ് മികച്ച സെറ്റര്‍ (Best Setter) ആയി തിരഞ്ഞെടുക്കപ്പെട്ടു. Cardiff Dragons ടീമിലെ എമില്‍ ടൂര്‍ണമെന്റിലെ മികച്ച താരം (Best Player) എന്ന ബഹുമതി സ്വന്തമാക്കി.

ടൂര്‍ണമെന്റിനോടനുബന്ധിച്ച് ഷെഫീല്‍ഡ് സ്ട്രൈക്കേഴ്‌സ് വോളിബോള്‍ ക്ലബ് റാഫിള്‍ ടിക്കറ്റ് മത്സരം സംഘടിപ്പിക്കുകയും വിജയികള്‍ക്ക് ഒന്നാം, രണ്ടാം, മൂന്നാം സമ്മാനങ്ങള്‍ വിതരണം ചെയ്യുകയും ചെയ്തു. റാഫിള്‍ ടിക്കറ്റ് വില്‍പ്പനയിലൂടെ ലഭിക്കുന്ന തുക ഷെഫീല്‍ഡ് ചില്‍ഡ്രന്‍സ് ഹോസ്പിറ്റല്‍ ചാരിറ്റിക്ക് കൈമാറുമെന്ന് സംഘാടകര്‍ അറിയിച്ചു. കായികമേളയ്‌ക്കൊപ്പം സാമൂഹിക പ്രതിബദ്ധതയും ഉയര്‍ത്തിപ്പിടിച്ച ഈ സംരംഭത്തിന് പങ്കെടുത്തവരില്‍ നിന്ന് മികച്ച പിന്തുണ ലഭിച്ചു.


ടൂര്‍ണമെന്റില്‍ പങ്കെടുത്ത എല്ലാ ടീമുകള്‍ക്കും പ്രത്യേക നന്ദിയും അഭിനന്ദനവും അറിയിച്ചു. RDX Manchester, Cardiff Dragons, Lions Liverpool, Cambridge Spikers, Athletic Newcastle, Brighton Malayalee Club, KVC Dublin, കൂടാതെ ആതിഥേയരായ Sheffield Strikers Volleyball Club എന്നിവരുടെ മികച്ച പ്രകടനവും കായികമര്യാദയും ടൂര്‍ണമെന്റിനെ കൂടുതല്‍ ശ്രദ്ധേയമാക്കിയതായി സംഘാടകര്‍ അറിയിച്ചു.

എല്ലാ ടീമുകളുടെയും, സ്പോണ്‍സര്‍മാരുടെയും, സന്നദ്ധപ്രവര്‍ത്തകരുടെയും, കാണികളുടെയും ആത്മാര്‍ത്ഥമായ സഹകരണമാണ് ഷെഫീല്‍ഡ് സ്ട്രൈക്കേഴ്‌സ് സംഘടിപ്പിച്ച ഓള്‍ യൂറോപ്പ് വോളിബോള്‍ ടൂര്‍ണമെന്റിനെ വന്‍ വിജയമാക്കിയത്. ഈ ടൂര്‍ണമെന്റ് യൂറോപ്പിലെ മലയാളി വോളിബോള്‍ സമൂഹത്തിന്റെ ഐക്യത്തിന്റെയും കായികമികവിന്റെയും മികച്ച ഉദാഹരണമായി മാറിയതായി സംഘാടകര്‍ അറിയിച്ചു