പൊന്നാനി: കേരളത്തിന്റെ രണ്ടാം ഷിപ്പ്യാര്‍ഡ് പദ്ധതിയായി ഉയര്‍ത്തിക്കാട്ടപ്പെട്ട പൊന്നാനി കപ്പല്‍നിര്‍മാണ പദ്ധതി രാഷ്ട്രീയ വിവാദത്തിലേക്ക്. 29.327 ഏക്കര്‍ തീരദേശ ഭൂമിയില്‍ നടപ്പാക്കാന്‍ ലക്ഷ്യമിടുന്ന പദ്ധതിക്കെതിരെ പൊന്നാനി എംഎല്‍എ കെ.പി. നൗഷാദ് അലി രംഗത്തെത്തിയതോടെയാണ് തര്‍ക്കം ശക്തമായത്. പദ്ധതി മത്സ്യത്തൊഴിലാളികളുടെയും മത്സ്യവ്യാപാര മേഖലയെ ആശ്രയിച്ച് ജീവിക്കുന്ന ആയിരക്കണക്കിന് പേരുടെയും ഉപജീവനത്തെ ബാധിക്കുമെന്നാണ് എംഎല്‍എയുടെ ആരോപണം. ഹൈദരാബാദ് ആസ്ഥാനമായ ട്രാവന്‍കൂര്‍ പ്രിസിഷന്‍ കോംപോണന്റ്‌സും കേരള മാരിടൈം ബോര്‍ഡും ചേര്‍ന്ന് പൊതു-സ്വകാര്യ പങ്കാളിത്ത (പി.പി.പി.) മാതൃകയിലാണ് പദ്ധതി നടപ്പാക്കുന്നത്. രണ്ട് ഘട്ടങ്ങളിലായി ഏകദേശം 1,000 കോടി രൂപ നിക്ഷേപിക്കാനാണ് ലക്ഷ്യം. നേരിട്ടും പരോക്ഷമായും 2,500ഓളം തൊഴിലവസരങ്ങള്‍ സൃഷ്ടിക്കാനും പൊന്നാനി തുറമുഖത്തിന്റെ വികസനത്തിന് പുതിയ കരുത്താകാനും പദ്ധതിക്ക് കഴിയുമെന്നാണ് അധികൃതരുടെ അവകാശവാദം.

2026 മേയ് 18നാണ് കേരള മാരിടൈം ബോര്‍ഡ് കമ്പനിയുമായി കരാറില്‍ ഒപ്പുവെച്ചത്. തദ്ദേശ സ്വയംഭരണ വകുപ്പ്, കെ.എസ്.ഇ.ബി., കേരള വാട്ടര്‍ അതോറിറ്റി, ഫയര്‍ ആന്‍ഡ് റെസ്‌ക്യൂ സര്‍വീസസ് എന്നിവയില്‍നിന്നുള്ള ആവശ്യമായ അനുമതികള്‍ കമ്പനി നേടിയതായി അധികൃതര്‍ അറിയിച്ചു. ഭൂമിയുടെ രജിസ്‌ട്രേഷന്‍, നികുതി അടയ്ക്കല്‍, പ്രാഥമിക സര്‍വേ, ലേഔട്ട് തയ്യാറാക്കല്‍ തുടങ്ങിയ നടപടികളും പൂര്‍ത്തിയായിട്ടുണ്ട്. താല്‍ക്കാലിക സൈറ്റ് ഓഫീസ് സ്ഥാപിച്ച് നിര്‍മാണ പ്രവര്‍ത്തനങ്ങളിലേക്ക് കടക്കാനായിരുന്നു കമ്പനിയുടെ പദ്ധതി. എന്നാല്‍ പദ്ധതി പ്രാദേശിക ജനങ്ങളുടെ താല്‍പര്യങ്ങള്‍ക്ക് വിരുദ്ധമാണെന്ന് ആരോപിച്ച് കെ.പി. നൗഷാദ് അലി എംഎല്‍എ രംഗത്തെത്തിയതോടെ നടപടികള്‍ പ്രതിസന്ധിയിലായി. കേരള മാരിടൈം ബോര്‍ഡ് സിഇഒ ജെറോമിക് ജോര്‍ജുമായി നടത്തിയ കൂടിക്കാഴ്ചയ്ക്കുശേഷം, സ്വകാര്യ സംരംഭത്തിന്റെ പേരില്‍ മത്സ്യത്തൊഴിലാളികളുടെ ഉപജീവനമാര്‍ഗം ഇല്ലാതാക്കാന്‍ അനുവദിക്കില്ലെന്ന് എംഎല്‍എ വ്യക്തമാക്കി.

''കപ്പല്‍നിര്‍മാണം ഉള്‍പ്പെടെ ഏത് സംരംഭവും സ്വന്തം ഭൂമി വാങ്ങി ആരംഭിക്കുന്നതിന് എതിര്‍പ്പില്ല. എന്നാല്‍ ആയിരക്കണക്കിന് മത്സ്യത്തൊഴിലാളികളുടെ ജീവിതം തകര്‍ത്തും തീരദേശ ഭൂമി സ്വകാര്യ താല്‍പര്യങ്ങള്‍ക്ക് വിട്ടുകൊടുത്തും പദ്ധതി നടപ്പാക്കാന്‍ അനുവദിക്കില്ല,'' നൗഷാദ് അലി പറഞ്ഞു. അതേസമയം എംഎല്‍എയുടെ നിലപാടിനെതിരെ പദ്ധതിയുടെ നടത്തിപ്പുകാരായ ട്രാവന്‍കൂര്‍ പ്രിസിഷന്‍ കോംപോണന്റ്‌സും കേരള മാരിടൈം ബോര്‍ഡും മുന്‍ പൊന്നാനി എംഎല്‍എയും സിപിഎം നേതാവുമായ പി. നന്ദകുമാറും രംഗത്തെത്തി. എല്ലാ നിയമാനുസൃത അനുമതികളും നേടിയ ശേഷമാണ് പദ്ധതിയുമായി മുന്നോട്ടുപോകുന്നതെന്ന് ട്രാവന്‍കൂര്‍ പ്രിസിഷന്‍ കോംപോണന്റ്‌സ് ഡയറക്ടര്‍ അരുണ്‍ ഹരി പറഞ്ഞു. നിര്‍ദിഷ്ട സ്ഥലത്ത് മത്സ്യത്തൊഴിലാളികളുടെ കോളനികളില്ലെന്നും ഏതാനും മത്സ്യ വേര്‍തിരിക്കല്‍ ഷെഡുകള്‍ മാത്രമാണുള്ളതെന്നും അദ്ദേഹം വ്യക്തമാക്കി.

''ഈ ഷെഡുകള്‍ അനധികൃതമായി പ്രവര്‍ത്തിക്കുന്നവയും ചില മൊത്തവ്യാപാരികളുടെ നിയന്ത്രണത്തിലുള്ളവയുമാണ്. സിംഗപ്പൂര്‍ ആസ്ഥാനമായ കമ്പനിയില്‍നിന്ന് 200 കോടി രൂപയുടെ ആദ്യ ഓര്‍ഡറും ലഭിച്ചിട്ടുണ്ട്. അടിസ്ഥാനരഹിതമായ എതിര്‍പ്പുകള്‍ ഉയര്‍ത്തി പദ്ധതി തടസ്സപ്പെടുത്തിയാല്‍ നിയമനടപടികള്‍ സ്വീകരിക്കും,'' അരുണ്‍ ഹരി പറഞ്ഞു. നിര്‍ദിഷ്ട സ്ഥലത്തെ മത്സ്യ വേര്‍തിരിക്കല്‍ യൂണിറ്റുകള്‍ അനധികൃത കൈയേറ്റമാണെന്നാണ് കേരള മാരിടൈം ബോര്‍ഡിന്റെയും നിലപാട്. ഇവ മാറ്റിസ്ഥാപിക്കുന്നതിനായി പൊന്നാനി തുറമുഖ മേഖലയില്‍ ബദല്‍ സ്ഥലം കണ്ടെത്തണമെന്ന് ജില്ലാ ഭരണകൂടത്തോട് ആവശ്യപ്പെട്ടിട്ടുണ്ടെന്നും ബോര്‍ഡ് അറിയിച്ചു. ''കരാര്‍ നടപടികള്‍ പൂര്‍ത്തിയായിട്ടുണ്ട്. പദ്ധതിയില്‍നിന്ന് പിന്മാറാനുള്ള തീരുമാനമില്ല. അനധികൃത മത്സ്യ വേര്‍തിരിക്കല്‍ ഷെഡുകള്‍ നീക്കം ചെയ്യാന്‍ ജില്ലാ ഭരണകൂടത്തോട് ആവശ്യപ്പെട്ടിട്ടുണ്ട്,'' തുറമുഖ വകുപ്പ് ഡെപ്യൂട്ടി ഡയറക്ടറും 100 ദിന പരിപാടിയുടെ നോഡല്‍ ഓഫീസറുമായ ക്യാപ്റ്റന്‍ അശ്വനി പ്രതാപ് കെ. പറഞ്ഞു. വികസന പദ്ധതി അട്ടിമറിക്കാനുള്ള ശ്രമമാണ് എംഎല്‍എ നടത്തുന്നതെന്ന് മുന്‍ എംഎല്‍എ പി. നന്ദകുമാറും ആരോപിച്ചു. ''പൊന്നാനിയുടെ വികസനത്തിന് നിര്‍ണായകമായ പദ്ധതിയാണിത്. 2,500ഓളം തൊഴിലവസരങ്ങള്‍ സൃഷ്ടിക്കാനാകും. നിര്‍ദിഷ്ട സ്ഥലത്തെ മത്സ്യ വേര്‍തിരിക്കല്‍ യൂണിറ്റുകള്‍ പ്രാദേശിക മത്സ്യത്തൊഴിലാളികളുടേതല്ല, സമ്പന്നരായ മൊത്തവ്യാപാരികളുടേതാണ്. വികസനം തടയാനുള്ള ശ്രമമാണ് നടക്കുന്നത്. ഈ നിലപാട് തുടര്‍ന്നാല്‍ സിപിഎം സമരത്തിലേക്ക് കടക്കും,'' അദ്ദേഹം പറഞ്ഞു.

നിര്‍ദിഷ്ട ഭൂമിയുടെ ഒരു ഭാഗം ചില മത്സ്യവ്യാപാരികളുടെ നിയന്ത്രണത്തിലാണെന്നും അവിടെ അനധികൃത പ്രവര്‍ത്തനങ്ങള്‍ നടക്കുന്നുണ്ടെന്നും പേര് വെളിപ്പെടുത്താന്‍ ആഗ്രഹിക്കാത്ത പ്രദേശവാസിയും ആരോപിച്ചു. മുന്‍ എല്‍ഡിഎഫ് സര്‍ക്കാരിന്റെ കാലത്ത് ജില്ലാ കളക്ടറുടെ നേതൃത്വത്തില്‍ നടന്ന ചര്‍ച്ചയില്‍ ഇവര്‍ ബദല്‍ സ്ഥലത്തേക്ക് മാറാന്‍ സമ്മതിച്ചിരുന്നുവെന്നും സര്‍ക്കാര്‍ മാറിയതോടെ നിലപാട് മാറ്റിയെന്നും അദ്ദേഹം പറഞ്ഞു. കരാര്‍ പ്രകാരം കമ്പനി സര്‍ക്കാരിന് പ്രതിവര്‍ഷം 1.5 കോടി രൂപ നല്‍കണം. ഇതിനുപുറമെ വര്‍ഷം 25 ലക്ഷം രൂപ ഭൂമിയുടെ പാട്ടത്തുകയായും നല്‍കും. പാട്ടത്തുക ഓരോ വര്‍ഷവും അഞ്ച് ശതമാനം വീതം വര്‍ധിക്കും. കമ്പനിയുടെ ആകെ വരുമാനത്തില്‍നിന്ന് ആദ്യ രണ്ട് വര്‍ഷം 0.5 ശതമാനവും തുടര്‍ന്നുള്ള രണ്ട് വര്‍ഷം 0.75 ശതമാനവും പിന്നീട് 1.5 ശതമാനവും സര്‍ക്കാരിന് നല്‍കണമെന്ന വ്യവസ്ഥയും കരാറിലുണ്ട്. വന്‍ നിക്ഷേപവും ആയിരക്കണക്കിന് തൊഴിലവസരങ്ങളും വാഗ്ദാനം ചെയ്യുന്ന പദ്ധതി ഒരു വശത്തും, മത്സ്യത്തൊഴിലാളികളുടെ ഉപജീവനവും തീരദേശ ഭൂമിയുടെ ഉപയോഗവും സംബന്ധിച്ച ആശങ്കകള്‍ മറുവശത്തുമായി ഉയര്‍ന്നതോടെ പൊന്നാനി ഷിപ്പ്യാര്‍ഡ് പദ്ധതി ഇനി രാഷ്ട്രീയ-പ്രാദേശിക ചര്‍ച്ചകളുടെ കേന്ദ്രമായി മാറിയിരിക്കുകയാണ്.