മലപ്പുറം: പൊതു വിദ്യാഭ്യാസ മന്ത്രി എന്. ഷംസുദ്ദീന്റെ പേഴ്സണല് സ്റ്റാഫില് ജമാഅത്തെ ഇസ്ലാമി നേതാവിനെ ഉള്പ്പെടുത്തിയതിനെതിരെ എംഎസ്എഫ് രംഗത്ത്. നിയമനം പിന്വലിക്കണമെന്ന് ആവശ്യപ്പെട്ട് കൊണ്ടോട്ടി മണ്ഡലം എംഎസ്എഫ് പ്രമേയം പാസാക്കി. പാര്ട്ടിക്കും പോഷക സംഘടനകള്ക്കും വേണ്ടി വര്ഷങ്ങളായി പ്രവര്ത്തിച്ചവരെ അധികാരത്തിലെത്തിയശേഷം അവഗണിക്കുന്ന സമീപനം അംഗീകരിക്കാനാവില്ലെന്നും പ്രമേയത്തില് വിമര്ശിച്ചു. യുഡിഎഫ് സര്ക്കാര് അധികാരത്തിലെത്തിയശേഷം വിവിധ മന്ത്രിമാരുടെ പേഴ്സണല് സ്റ്റാഫ് ഉള്പ്പെടെയുള്ള നിയമനങ്ങളില് പാര്ട്ടിയുടെയും പോഷക സംഘടനകളുടെയും സജീവ പ്രവര്ത്തകര്ക്ക് അര്ഹമായ പരിഗണന ലഭിക്കുന്നില്ലെന്നാണ് എംഎസ്എഫിന്റെ ആരോപണം. ഇത് പ്രവര്ത്തകര്ക്കിടയില് കടുത്ത നിരാശയും വേദനയും സൃഷ്ടിച്ചിട്ടുണ്ടെന്നും സംഘടന ചൂണ്ടിക്കാട്ടി.
ഓഫീസ് അറ്റന്ഡന്റ് നിയമനത്തിനെതിരെ പ്രതിഷേധം
വിദ്യാഭ്യാസ മന്ത്രിയുടെ ഓഫീസിലെ ഓഫീസ് അറ്റന്ഡന്റ് തസ്തികയിലേക്ക് ജമാഅത്തെ ഇസ്ലാമി നേതാവിനെ നിയമിച്ചതാണ് പ്രതിഷേധത്തിന് പ്രധാന കാരണം. ഈ നിയമനം എംഎസ്എഫ് പ്രവര്ത്തകര്ക്കിടയില് വലിയ മാനസിക പ്രയാസത്തിനും പ്രതിഷേധത്തിനും കാരണമായിട്ടുണ്ടെന്ന് പ്രമേയത്തില് പറയുന്നു. പാര്ട്ടിക്കും പോഷക സംഘടനകള്ക്കും വേണ്ടി ആത്മാര്ത്ഥമായി പ്രവര്ത്തിച്ച അര്ഹരായ പ്രവര്ത്തകര്ക്ക് ഇത്തരം നിയമനങ്ങളില് മുന്ഗണന നല്കണമെന്നും എംഎസ്എഫ് ആവശ്യപ്പെട്ടു.
'പ്രവര്ത്തകരെ മറക്കുന്നത് ആത്മവിശ്വാസം തകര്ക്കും'
പല പ്രതികൂല സാഹചര്യങ്ങളിലും പാര്ട്ടിയുടെ ആശയങ്ങളും നിലപാടുകളും ജനങ്ങളിലെത്തിക്കാന് മുന്നില് നിന്ന യുവതലമുറയാണ് സംഘടനയുടെ ശക്തിയെന്ന് എംഎസ്എഫ് ഓര്മ്മപ്പെടുത്തി. അധികാരത്തിലെത്തിയശേഷം ഇത്തരം പ്രവര്ത്തകരെ മറക്കുന്ന സമീപനം അവരുടെ ആത്മവിശ്വാസം തകര്ക്കുമെന്നും പ്രമേയത്തില് പറയുന്നു. പാര്ട്ടി നേതൃത്വവും ബന്ധപ്പെട്ട മന്ത്രിയും വിഷയത്തില് ഇടപെട്ട് വിവാദമായ നിയമനം പുനഃപരിശോധിക്കണമെന്നും പാര്ട്ടി പ്രവര്ത്തകര്ക്ക് അര്ഹമായ പരിഗണന ഉറപ്പാക്കണമെന്നും കൊണ്ടോട്ടി മണ്ഡലം എംഎസ്എഫ് ആവശ്യപ്പെട്ടു.
