തിരുവനന്തപുരം: സിഎംആര്‍എല്‍ പണമിടപാട് കേസുമായി ബന്ധപ്പെട്ട അന്വേഷണത്തിനിടെ എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി) ഉദ്യോഗസ്ഥര്‍ ഭീഷണിപ്പെടുത്തി വ്യാജ മൊഴിയില്‍ ഒപ്പിടിപ്പിച്ചെന്ന ഗുരുതര ആരോപണവുമായി വ്യാപാരി ഹസന്‍ വാരിസ്. മുന്‍ മന്ത്രി പി.എ. മുഹമ്മദ് റിയാസുമായി ബന്ധപ്പെട്ട സാമ്പത്തിക ഇടപാടുകളെക്കുറിച്ച് തന്റെ പേരില്‍ ഇഡി രേഖപ്പെടുത്തിയ മൊഴി വസ്തുതാവിരുദ്ധമാണെന്ന് ചൂണ്ടിക്കാട്ടി വാരിസ് ഇഡി ഡയറക്ടര്‍ക്ക് കത്തയച്ചു. 22 വയസ്സുള്ള മകളെ കേസില്‍ പ്രതിയാക്കുമെന്ന് ഭീഷണിപ്പെടുത്തിയ ശേഷമാണ് മുഹമ്മദ് റിയാസില്‍ നിന്ന് പണം വാങ്ങിയെന്നും അത് വിദേശത്തേക്ക് കടത്തിയെന്നും പറയുന്ന മൊഴിയില്‍ ഒപ്പിടേണ്ടിവന്നതെന്നാണ് വാരിസിന്റെ ആരോപണം. റിയാസില്‍ നിന്ന് താന്‍ പണം വാങ്ങിയിട്ടില്ലെന്നും ദുബായിലേക്ക് പണം കടത്തിയിട്ടില്ലെന്നും അദ്ദേഹം കത്തില്‍ വ്യക്തമാക്കിയിട്ടുണ്ട്. കഴിഞ്ഞ ഓഗസ്റ്റ് 18ന് ഹസന്‍ വാരിസിന്റെ വസതിയില്‍ ഇഡി പരിശോധന നടത്തിയിരുന്നു. ഈ പരിശോധനയ്ക്കിടെയാണ് ഉദ്യോഗസ്ഥര്‍ മാനസികമായി സമ്മര്‍ദത്തിലാക്കുകയും മുന്‍കൂട്ടി തയ്യാറാക്കിയ മൊഴിയില്‍ ഒപ്പിടാന്‍ നിര്‍ബന്ധിക്കുകയും ചെയ്തതെന്നാണ് വാരിസിന്റെ പരാതി.

'ഒപ്പിട്ടില്ലെങ്കില്‍ മകളെ കേസില്‍ പ്രതിയാക്കുമെന്ന് പറഞ്ഞു'

മുഹമ്മദ് റിയാസില്‍ നിന്ന് വലിയ തുക കൈപ്പറ്റി ബിസിനസ് ആവശ്യങ്ങള്‍ക്കായി വിദേശത്തേക്ക് കടത്തിയെന്ന തരത്തിലുള്ള മൊഴിയാണ് ഉദ്യോഗസ്ഥര്‍ തന്റെ മുന്നില്‍ വെച്ചതെന്ന് വാരിസ് പറയുന്നു. മൊഴിയില്‍ ഒപ്പിടാന്‍ വിസമ്മതിച്ചപ്പോള്‍ മകളെ കേസില്‍ പ്രതിയാക്കുമെന്ന് ഉദ്യോഗസ്ഥര്‍ ഭീഷണിപ്പെടുത്തിയെന്നും ഇതോടെ സമ്മര്‍ദത്തിന് വഴങ്ങി ഒപ്പിടേണ്ടിവന്നുവെന്നുമാണ് ആരോപണം. റിയാസില്‍ നിന്ന് തനിക്ക് പണം ലഭിച്ചിട്ടില്ലെന്നും ദുബായിലേക്കോ മറ്റേതെങ്കിലും വിദേശരാജ്യത്തേക്കോ അദ്ദേഹത്തിന്റെ പണം കൈമാറിയിട്ടില്ലെന്നും വാരിസ് ഇഡി ഡയറക്ടര്‍ക്ക് നല്‍കിയ പരാതിയില്‍ ആവര്‍ത്തിച്ചു.

റിയാസിനെതിരായ ഇഡി ആരോപണത്തിലെ പ്രധാന മൊഴി തള്ളി വാരിസ്

സിഎംആര്‍എല്‍-എക്‌സാലോജിക് പണമിടപാട് അന്വേഷണം പുരോഗമിക്കുന്നതിനിടെയാണ് പി.എ. മുഹമ്മദ് റിയാസുമായി ബന്ധപ്പെട്ട മറ്റ് സാമ്പത്തിക ഇടപാടുകളെക്കുറിച്ചും ഇഡി സംസ്ഥാന പൊലീസ് മേധാവിക്ക് റിപ്പോര്‍ട്ട് നല്‍കിയത്. 2024-25 കാലയളവില്‍ റിയാസുമായി ബന്ധപ്പെടുത്തി ഏകദേശം ?20 കോടിയിലധികം വരുന്ന ഇടപാടുകള്‍ നടന്നുവെന്നും അതില്‍ ഒരു ഭാഗം വിദേശത്തേക്ക് കൈമാറിയെന്നുമാണ് ഇഡി റിപ്പോര്‍ട്ടുകളില്‍ ഉന്നയിച്ചിരിക്കുന്ന ആരോപണം. ഈ പണം സിഎംആര്‍എല്ലില്‍ നിന്നുള്ളതല്ലെന്നും മറ്റ് ഉറവിടങ്ങളില്‍ നിന്നുള്ള കൈക്കൂലിയായിരിക്കാമെന്ന സംശയവും അന്വേഷണ ഏജന്‍സി ഉന്നയിച്ചിട്ടുണ്ട്. റിയാസുമായി ബന്ധമുള്ളതായി ഇഡി പറയുന്ന ചില വ്യക്തികളിലൂടെ പണം കൈകാര്യം ചെയ്തതായും ദുബായിലേക്ക് തുക മാറ്റിയതായും റിപ്പോര്‍ട്ടില്‍ ആരോപണമുണ്ട്. ഹസന്‍ വാരിസിനെയും ഇത്തരത്തിലുള്ള ഇടപാടുകളുമായി ബന്ധപ്പെടുത്തി ഇഡി റിപ്പോര്‍ട്ടില്‍ പരാമര്‍ശിച്ചിട്ടുണ്ട്. എന്നാല്‍ അന്വേഷണ ഏജന്‍സിയുടെ നിഗമനങ്ങള്‍ക്ക് ആധാരമായി ചൂണ്ടിക്കാണിക്കപ്പെട്ട തന്റെ മൊഴി തന്നെ വ്യാജമാണെന്നും സമ്മര്‍ദത്തിലൂടെ നേടിയെടുത്തതാണെന്നും വാരിസ് ഇപ്പോള്‍ പരസ്യമായി ആരോപിച്ചിരിക്കുകയാണ്.

ഇഡിയുടെ കണ്ടെത്തലുകള്‍ക്കെതിരെ പുതിയ വിവാദം

സിഎംആര്‍എല്‍ കേസുമായി ബന്ധപ്പെട്ട അന്വേഷണത്തില്‍ പിണറായി വിജയന്‍, ടി. വീണ, പി.എ. മുഹമ്മദ് റിയാസ് എന്നിവരുമായി ബന്ധപ്പെട്ട് അഴിമതി നിരോധന നിയമപ്രകാരം പ്രത്യേകം കേസെടുക്കണമെന്ന് ഇഡി സംസ്ഥാന പൊലീസിനോട് ആവശ്യപ്പെട്ടതായാണ് റിപ്പോര്‍ട്ടുകള്‍. പണം വിദേശത്തേക്ക് കടത്തിയെന്ന ആരോപണത്തില്‍ ചില വ്യക്തികളുടെ മൊഴികളും പിടിച്ചെടുത്ത രേഖകളും ഉള്‍പ്പെടെയുള്ള വിവരങ്ങളാണ് ഇഡി ആശ്രയിച്ചിരിക്കുന്നതെന്നാണ് പുറത്തുവന്ന റിപ്പോര്‍ട്ടുകള്‍ വ്യക്തമാക്കുന്നത്. ഈ സാഹചര്യത്തിലാണ് തന്റെ പേരിലുള്ള മൊഴിയുടെ വിശ്വാസ്യത തന്നെ ചോദ്യം ചെയ്ത് ഹസന്‍ വാരിസ് രംഗത്തെത്തിയത്. ഭീഷണിപ്പെടുത്തി മൊഴി രേഖപ്പെടുത്തിയെന്ന വാരിസിന്റെ പരാതി ഇഡി അന്വേഷണത്തെയും അതിന്റെ അടിസ്ഥാനത്തില്‍ സംസ്ഥാന പൊലീസിന് കൈമാറിയ കണ്ടെത്തലുകളെയും ചൊല്ലിയുള്ള രാഷ്ട്രീയ-നിയമ വിവാദം കൂടുതല്‍ ശക്തമാക്കാന്‍ സാധ്യതയുണ്ട്. അതേസമയം വാരിസ് ഉന്നയിച്ച ഭീഷണി ആരോപണത്തില്‍ ഇഡിയുടെ ഔദ്യോഗിക പ്രതികരണം പുറത്തുവരുന്നതോടെ മാത്രമേ വിഷയത്തില്‍ കൂടുതല്‍ വ്യക്തത ലഭിക്കൂ.