കൊറോണ വൈറസ് മഹാമാരിയെ നിയന്ത്രിക്കുന്നതിനായി യൂറോപ്പില്‍ നിന്നുള്ള യാത്രയ്ക്ക് യുഎസ് താത്കാലിക വിലക്ക് ഏര്‍പ്പെടുത്തിയതിനെ തുടര്‍ന്ന് രൂപയുടെ മൂല്യം 82 പൈസ കുറഞ്ഞ് ഡോളറിനെതിരെ 74.50 ല്‍ എത്തി. ആഭ്യന്തര ഓഹരി വിപണി 30 മാസത്തെ ഏറ്റവും താഴ്ന്ന നിലയിലേക്ക് നീങ്ങി. ബെഞ്ച്മാര്‍ക്ക് സൂചികയായ നിഫ്റ്റി 50 ആഗോള വിപണികളില്‍ 10,000 മാര്‍ക്കിന് താഴെയായി.

ലോകാരോഗ്യ സംഘടന (ഡബ്ല്യുഎച്ച്ഒ) ബുധനാഴ്ച വൈകി കൊറോണ വൈറസ് (കോവിഡ് 19) ഒരു പകര്‍ച്ചവ്യാധിയായി പ്രഖ്യാപിക്കുകയും 'അപകടകരമായ അളവിലുള്ള നിഷ്‌ക്രിയത്വത്തെ കുറിച്ച്' ആഴത്തിലുള്ള ആശങ്ക പ്രകടിപ്പിക്കുകയും ചെയ്തതിന് ശേഷമാണ് ഈ നഷ്ടം സംഭവിച്ചത്.

കൊറോണ വൈറസിനെ തുടര്‍ന്ന് സാമ്പത്തിക മാന്ദ്യം വര്‍ദ്ധിക്കുമെന്ന ആശങ്കകള്‍ക്കിടയിലാണ് വിപണിയിലെ പങ്കാളിത്തം കുറഞ്ഞതെന്നു ഫോറെക്‌സ് വ്യാപാരികള്‍ പറഞ്ഞു. യുഎസ് ഡോളറിനെതിരെ ബുധനാഴ്ച രൂപയുടെ മൂല്യം 73.68 ആയിരുന്നു.