|
ട്രാവന്കൂര് ടൈറ്റാനിയത്തില് ജോലി വാഗ്ദാനം ചെയ്ത് പണം തട്ടിയ സംഭവത്തില് കൂടുതല്പേര് പരാതിയുമായി രംഗത്തെത്തി. കേസിലെ മുഖ്യപ്രതിയായ ദിവ്യ ജ്യോതി എന്ന ദിവ്യ നായര് (41) ഇന്നലെ അറസ്റ്റിലായിരുന്നു. ഇതിനു പിന്നാലെയാണ് കൂടുതല് പേര് പരാതിയുമായി പൊലീസിനെ സമീപിക്കുന്നത്. ഇതോടെ തട്ടിപ്പിന്റെ വ്യാപ്തി ഇനിയും കൂടുമെന്നാണ് പൊലീസിന്റെ നിഗമനം. അതേസമയം, തട്ടിപ്പ് കേസില് പ്രതിയായ ടൈറ്റാനിയം ലീഗല് ഡെപ്യൂട്ടി ജനറല് മാനേജര് ശശികുമാരന് തമ്പിയെ സര്വീസില്നിന്ന് സസ്പെന്ഡ് ചെയ്തു.
വേളിയിലെ ടൈറ്റാനിയം പ്ലാന്റില് കെമിസ്റ്റായി ജോലി വാഗ്ദാനം ചെയ്ത് പലരില്നിന്നും ദിവ്യ നായരും സംഘവും കോടികള് തട്ടിയെടുത്തതായാണ് പരാതി. ദിവ്യയുടെ ഭര്ത്താവ് രാജേഷ്, ടൈറ്റാനിയം ലീഗല് ഡെപ്യൂട്ടി ജനറല് മാനേജര് ശശികുമാരന് തമ്പി, ഇയാളുടെ സുഹൃത്തുക്കളായ പ്രേംകുമാര്, ശ്യാംലാല് എന്നിവരാണ് കേസിലെ മറ്റുപ്രതികള്. ഇവരെല്ലാം ഒളിവിലാണെന്നാണ് പൊലീസ് പറയുന്നത്. പ്രതികള്ക്കെതിരേ ജോലി തട്ടിപ്പുമായി ബന്ധപ്പെട്ട രണ്ട് പരാതികളിലാണ് പൊലീസ് അന്വേഷണം നടക്കുന്നത്.
ദിവ്യയുടെ ഡയറിയില് മാത്രം ഒരു കോടിക്ക് മുകളിലുള്ള ഇടപാടുകളുടെ വിവരങ്ങളുണ്ട്. മാത്രമല്ല, 15 കോടിയോളം രൂപ പലരില്നിന്നായി വാങ്ങിയതായി ദിവ്യ മൊഴി നല്കിയിട്ടുമുണ്ട്. ഈ സാഹചര്യത്തിലാണ് ടൈറ്റാനിയം ജോലി തട്ടിപ്പിന്റെ വ്യാപ്തി കൂടുമെന്ന് പൊലീസ് വിലയിരുത്തുന്നത്. പ്രതികള്ക്ക് ഉന്നത രാഷ്ട്രീയ ബന്ധങ്ങളുണ്ടെന്നും പൊലീസ് സംശയിക്കുന്നു. |
