തിരുവനന്തപുരം: സ്വാതന്ത്ര്യദിനാഘോഷ ചടങ്ങുകളില് വന്ദേമാതരം ആലപിക്കുന്നതുമായി ബന്ധപ്പെട്ട വിവാദം കേരളത്തിലും ദേശീയതലത്തിലും ശക്തമാകുന്നു. സംസ്ഥാന സര്ക്കാരിന്റെ ഔദ്യോഗിക സ്വാതന്ത്ര്യദിന ചടങ്ങുകളില് ദേശീയഗീതമായ വന്ദേമാതരം ഒഴിവാക്കിയത് ബോധപൂര്വമായ തീരുമാനമാണെന്ന് ബിജെപി സംസ്ഥാന അധ്യക്ഷനും നേമം എംഎല്എയുമായ രാജീവ് ചന്ദ്രശേഖര് ആരോപിച്ചു. സര്ക്കാരിനെതിരെ രാഷ്ട്രീയവും നിയമപരവുമായ നടപടികളുമായി മുന്നോട്ടുപോകുമെന്നും അദ്ദേഹം അറിയിച്ചു. കേരളത്തിലെ ഔദ്യോഗിക സ്വാതന്ത്ര്യദിന ചടങ്ങില് വന്ദേമാതരം ആലപിക്കാതിരുന്നതാണ് വിവാദത്തിന് വഴിവച്ചത്. സ്കൂളുകള്ക്കായി വിദ്യാഭ്യാസ വകുപ്പ് പുറത്തിറക്കിയ മാര്ഗനിര്ദേശങ്ങളിലും ദേശീയപതാക ഉയര്ത്താനും ദേശീയഗാനമായ 'ജനഗണമന' ആലപിക്കാനും നിര്ദേശിച്ചിരുന്നെങ്കിലും വന്ദേമാതരം സംബന്ധിച്ച പരാമര്ശം ഉണ്ടായിരുന്നില്ല.
'കേരളം മാത്രം വന്ദേമാതരം ഒഴിവാക്കി'
കോണ്ഗ്രസ് ഭരിക്കുന്ന മറ്റ് സംസ്ഥാനങ്ങളിലുള്പ്പെടെ വന്ദേമാതരം ആലപിച്ചപ്പോള് കേരളത്തില് അത് ഒഴിവാക്കിയത് യാദൃച്ഛികമല്ലെന്നാണ് രാജീവ് ചന്ദ്രശേഖറിന്റെ ആരോപണം. വി.ഡി. സതീശന് സര്ക്കാരിനുമേല് ഇന്ത്യന് യൂണിയന് മുസ്ലിം ലീഗും ജമാഅത്തെ ഇസ്ലാമിയും ചെലുത്തുന്ന സമ്മര്ദമാണ് തീരുമാനത്തിനു പിന്നിലെന്നും അദ്ദേഹം ആരോപിച്ചു. വന്ദേമാതരം ഒഴിവാക്കിയതിനെതിരെ രാഷ്ട്രീയവും നിയമപരവുമായ പ്രത്യാഘാതങ്ങള് ഉണ്ടാകുമെന്നും വിഷയം വെറുതെ വിടില്ലെന്നും രാജീവ് ചന്ദ്രശേഖര് പറഞ്ഞു. മതപരമായ പരിഗണനകള് മുന്നിര്ത്തി ദേശീയ പ്രതീകങ്ങളെ സമീപിക്കുന്ന പ്രവണത അംഗീകരിക്കാനാകില്ലെന്നും ബിജെപിയും യുവമോര്ച്ചയും ഇതിനെ ശക്തമായി നേരിടുമെന്നും അദ്ദേഹം വ്യക്തമാക്കി.
എഐസിസി ആസ്ഥാനത്തെ ചടങ്ങും വിവാദത്തില്
ഡല്ഹിയിലെ എഐസിസി ആസ്ഥാനത്ത് സ്വാതന്ത്ര്യദിനാഘോഷത്തിനിടെ വന്ദേമാതരം പൂര്ണമായി ആലപിച്ചതും പിന്നാലെ രാഷ്ട്രീയ വിവാദമായി. ഗാനാലാപനത്തിനിടെ സോണിയ ഗാന്ധി ചില ആംഗ്യങ്ങള് കാണിച്ചതിന്റെ ദൃശ്യങ്ങള് പുറത്തുവന്നതോടെ, ഗാനം നിര്ത്താന് അവര് ശ്രമിച്ചുവെന്ന് ബിജെപി ആരോപിച്ചു. എന്നാല് ആരോപണം കോണ്ഗ്രസ് തള്ളി. വന്ദേമാതരം പൂര്ണമായും ആലപിച്ചെന്നും, സോണിയ ഗാന്ധി കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയ്ക്കായി കസേര ആവശ്യപ്പെടുക മാത്രമാണ് ചെയ്തതെന്നുമാണ് കോണ്ഗ്രസിന്റെ വിശദീകരണം. സംഭവവുമായി ബന്ധപ്പെട്ട് സോണിയ ഗാന്ധിക്കും രാഹുല് ഗാന്ധിക്കുമെതിരെ ഡല്ഹി പൊലീസില് പരാതിയും നല്കിയിട്ടുണ്ട്. പരാതിയിലെ ആരോപണങ്ങള് പരിശോധിച്ചുവരികയാണ്.
കോണ്ഗ്രസ് മാപ്പ് പറയണമെന്ന് ബിനോയ് വിശ്വം
അതേസമയം, എഐസിസി ആസ്ഥാനത്ത് വന്ദേമാതരത്തിന്റെ മുഴുവന് ഭാഗങ്ങളും ആലപിച്ചതിനെതിരെ സിപിഐ സംസ്ഥാന സെക്രട്ടറി ബിനോയ് വിശ്വവും രംഗത്തെത്തി. സംഭവത്തില് കോണ്ഗ്രസ് നിരുപാധികം മാപ്പ് പറയണമെന്ന് അദ്ദേഹം ആവശ്യപ്പെട്ടു. വന്ദേമാതരത്തെ ഇന്ത്യയുടെ ദേശീയഗാനമായ 'ജനഗണമന'യ്ക്ക് പകരം പ്രതിഷ്ഠിക്കാനുള്ള ശ്രമങ്ങളോട് മതേതര രാഷ്ട്രീയ പാര്ട്ടികള് ജാഗ്രത പുലര്ത്തണമെന്നാണ് ബിനോയ് വിശ്വത്തിന്റെ നിലപാട്. വന്ദേമാതരത്തിലെ ആദ്യ രണ്ട് ഖണ്ഡികകള്ക്കപ്പുറമുള്ള ഭാഗങ്ങളില് മതപരമായ പ്രതീകങ്ങളും ദേവീ സങ്കല്പ്പങ്ങളും കടന്നുവരുന്നുണ്ടെന്നും ഇതിനെച്ചൊല്ലിയുള്ള ചരിത്രപരമായ നിലപാടുകള് കോണ്ഗ്രസ് മനസ്സിലാക്കണമെന്നും അദ്ദേഹം പറഞ്ഞു. ഗാന്ധിയുടെയും നെഹ്റുവിന്റെയും മതേതര പാരമ്പര്യം അവകാശപ്പെടുന്ന കോണ്ഗ്രസ് ഇത്തരം വിഷയങ്ങളില് വ്യക്തമായ രാഷ്ട്രീയ നിലപാട് സ്വീകരിക്കണമെന്നും ബിനോയ് വിശ്വം ആവശ്യപ്പെട്ടു. കേരള സര്ക്കാരിന്റെ സ്വാതന്ത്ര്യദിന ചടങ്ങുകളില് വന്ദേമാതരം ഒഴിവാക്കിയതിനെ ബിജെപി ചോദ്യം ചെയ്യുമ്പോള്, മറുവശത്ത് വന്ദേമാതരത്തിന്റെ പൂര്ണരൂപം ആലപിച്ചതിനെ ഇടതുപക്ഷം വിമര്ശിക്കുന്നതോടെ ദേശീയഗീതത്തെച്ചൊല്ലിയുള്ള രാഷ്ട്രീയ വിവാദം കേരളത്തിലും ദേശീയതലത്തിലും കൂടുതല് ശക്തമാകുകയാണ്.
