തിരുവനന്തപുരം: ചേരാനല്ലൂര്‍ വാഹനാപകടക്കേസ് കൈകാര്യം ചെയ്തതിലെ വീഴ്ചകളുടെ പശ്ചാത്തലത്തില്‍ കൊച്ചി സിറ്റി പൊലീസ് കമ്മിഷണര്‍ കാളിരാജ് മഹേഷ് കുമാറിനെ മാറ്റാന്‍ നിര്‍ദേശം. ആഭ്യന്തരമന്ത്രി രമേശ് ചെന്നിത്തലയുടെ നിര്‍ദേശപ്രകാരം ആര്‍. നിശാന്തിനിയെ പുതിയ കമ്മിഷണറായി നിയമിക്കാനാണ് നീക്കം. പി. പ്രകാശിനെ ദക്ഷിണമേഖല ഐജിയാക്കാനും തീരുമാനിച്ചതായി റിപ്പോര്‍ട്ടുണ്ട്. അഡീഷണല്‍ ജഡ്ജിയുടെ മകനായ പതിനേഴുകാരന്‍ ഓടിച്ച ബെന്‍സ് കാറിടിച്ച് തട്ടുകടയുടമ ജയബാലകൃഷ്ണന്‍ മരിച്ച സംഭവത്തിലെ പൊലീസ് നടപടികള്‍ കടുത്ത വിമര്‍ശനത്തിനിടയാക്കിയിരുന്നു. കേസില്‍ വീഴ്ച വരുത്തിയതിന് ചേരാനല്ലൂര്‍ സ്റ്റേഷനിലെ നാല് ഉദ്യോഗസ്ഥരെ നേരത്തെ സസ്‌പെന്‍ഡ് ചെയ്തു.
പ്രതിക്ക് സ്റ്റേഷന്‍ ജാമ്യം അനുവദിച്ചതും ദൃക്‌സാക്ഷികള്‍ മൊബൈലില്‍ പകര്‍ത്തിയ ചിത്രം നിര്‍ബന്ധിച്ച് നീക്കംചെയ്യിച്ചെന്ന ആരോപണവും നടപടിക്ക് കാരണമായി. എഡിജിപി പി. വിജയന്‍ നടത്തിയ പരിശോധനയുടെ അടിസ്ഥാനത്തിലുള്ള റിപ്പോര്‍ട്ടിനെത്തുടര്‍ന്നായിരുന്നു സസ്‌പെന്‍ഷന്‍. സംഭവത്തില്‍ പൊലീസിന് വീഴ്ചയുണ്ടായെന്ന് ആഭ്യന്തരമന്ത്രി നിയമസഭയിലും സമ്മതിച്ചിരുന്നു. അതിനിടെ, പതിനേഴുകാരന്റെ പിതാവായ ജഡ്ജിയുടെ ആലുവയിലെ ഫ്‌ലാറ്റില്‍ ക്രൈംബ്രാഞ്ച് സംഘം പരിശോധന നടത്തി. സിസിടിവി ദൃശ്യങ്ങള്‍ ശേഖരിച്ചതിനൊപ്പം ഡിജിറ്റല്‍ ഉപകരണങ്ങളും പതിനേഴുകാരന്‍ ഉപയോഗിച്ചിരുന്നതായി കരുതുന്ന ആഡംബര ബൈക്കും കസ്റ്റഡിയിലെടുത്തതായി റിപ്പോര്‍ട്ടുണ്ട്. ജയബാലകൃഷ്ണന്റെ കുടുംബം അന്വേഷണത്തിലെ വീഴ്ചകള്‍ക്കെതിരെ നടപടി ആവശ്യപ്പെട്ട് പ്രതിഷേധിച്ചിരുന്നു. കുടുംബാംഗങ്ങള്‍ ഉന്നത പൊലീസ് ഉദ്യോഗസ്ഥരുമായി കൂടിക്കാഴ്ച നടത്തുകയും നീതിപൂര്‍വമായ അന്വേഷണം ഉറപ്പാക്കണമെന്ന് ആവശ്യപ്പെടുകയും ചെയ്തു.
