കണ്ണൂര്‍: ശശിധരന്‍ കര്‍ത്തയില്‍നിന്ന് ഭാര്യ പി.കെ. ഇന്ദിര പണം വാങ്ങിയെന്ന ബന്ധു ശ്യാംജിത്തിന്റെ ആരോപണം അടിസ്ഥാനരഹിതമാണെന്ന് സിപിഎം നേതാവ് ഇ.പി. ജയരാജന്‍. തനിക്ക് കര്‍ത്തയുമായി യാതൊരു ബന്ധവുമില്ലെന്നും വാര്‍ത്ത നല്‍കിയ റിപ്പോര്‍ട്ടര്‍ ടിവിക്കെതിരെ മാനനഷ്ടക്കേസും ക്രിമിനല്‍ കേസും നല്‍കാന്‍ നിയമവിദഗ്ധരുമായി ആലോചിക്കുമെന്നും അദ്ദേഹം പറഞ്ഞു. വൈദേകം റിസോര്‍ട്ടില്‍ തനിക്ക് ഓഹരികളോ സാമ്പത്തിക ബന്ധമോ ഇല്ലെന്നാണ് ജയരാജന്റെ വിശദീകരണം. സ്ഥാപനത്തിന്റെ തുടക്കത്തില്‍ ഉപദേശങ്ങളും നിര്‍ദേശങ്ങളും നല്‍കി പ്രോത്സാഹിപ്പിച്ചിരുന്നു. ഡയറക്ടര്‍മാരുടെയും ഓഹരിയുടമകളുടെയും നിക്ഷേപങ്ങളുടെയും വിവരങ്ങള്‍ പരിശോധിക്കാനാകുമെന്നും പ്രചരിക്കുന്നതുപോലെ ഒമ്പതുകോടി രൂപ നിക്ഷേപിച്ച ആരും സ്ഥാപനത്തിലില്ലെന്നും അദ്ദേഹം വ്യക്തമാക്കി. 2014ലാണ് വൈദേകം പ്രവര്‍ത്തനം ആരംഭിച്ചതെന്നും ഭാര്യ സര്‍വീസില്‍നിന്ന് വിരമിച്ചപ്പോള്‍ ലഭിച്ച പണമാണ് തുടക്കത്തില്‍ ഉപയോഗിച്ചതെന്നും ജയരാജന്‍ പറഞ്ഞു. ഭാര്യയെ ശശിധരന്‍ കര്‍ത്തയുമായി ബന്ധിപ്പിച്ചുള്ള വാര്‍ത്തകള്‍ക്കെതിരെ നിയമപരമായി മുന്നോട്ടുപോകുമെന്നും അദ്ദേഹം ആവര്‍ത്തിച്ചു.
സഹോദരിയുടെ മകന്‍ ശ്യാംജിത്തിന്റെ ഭാര്യ ദീപയെ സ്ഥാപനത്തില്‍നിന്ന് പുറത്താക്കിയതിലുള്ള പ്രതികാരമാണ് ആരോപണങ്ങള്‍ക്ക് പിന്നിലെന്നും ജയരാജന്‍ ആരോപിച്ചു. തന്റെ നിര്‍ദേശപ്രകാരമാണ് ദീപയെ അക്കൗണ്ട് മാനേജരായി നിയമിച്ചത്. എന്നാല്‍ നിശ്ചയിച്ചതിലധികം ശമ്പളം കൈപ്പറ്റിയെന്നും വ്യാജ വൗച്ചറുകള്‍ ഉപയോഗിച്ച് പണം തട്ടിയെടുത്തെന്നും അദ്ദേഹം ആരോപിച്ചു. സാമ്പത്തിക ക്രമക്കേടുകളും പദവി ദുരുപയോഗവും കണ്ടെത്തിയതിനെത്തുടര്‍ന്നാണ് പുറത്താക്കിയതെന്നാണ് ജയരാജന്റെ വാദം. വൈദേകത്തില്‍ ചെലവഴിച്ച പണം ശശിധരന്‍ കര്‍ത്തയില്‍നിന്ന് വാങ്ങിയതാണെന്ന് ശ്യാംജിത്ത് ഫെയ്സ്ബുക്ക് കുറിപ്പില്‍ ആരോപിച്ചിരുന്നു. പ്രൈഡ് പ്രേംകുമാര്‍ ഒമ്പതുകോടി രൂപയും ജീവന്‍ ജ്യോതി 50 ലക്ഷം രൂപയും പ്രശാന്ത് രണ്ടുകോടി രൂപയും കള്ളപ്പണമായി നിക്ഷേപിച്ചെന്ന ആരോപണവും കുറിപ്പിലുണ്ടായിരുന്നു. കൂടുതല്‍ വിവരങ്ങള്‍ പിന്നീട് പുറത്തുവിടുമെന്നും ശ്യാംജിത്ത് പറഞ്ഞിരുന്നു. ജയരാജന്റെ കൈപ്പടയിലുള്ളതാണെന്ന് അവകാശപ്പെട്ട് ഒരു നോട്ട്ബുക്കിന്റെ ചിത്രവും പോസ്റ്റിനൊപ്പം പങ്കുവെച്ചിരുന്നു. വാര്‍ത്ത പുറത്തുവന്നതിനു പിന്നാലെ കുറിപ്പ് പിന്‍വലിച്ചു. ശ്യാംജിത്തിന്റെയും ജയരാജന്റെയും പരസ്പര ആരോപണങ്ങള്‍ സ്വതന്ത്രമായി സ്ഥിരീകരിക്കുന്ന രേഖകള്‍ ലഭ്യമായ വിവരങ്ങളില്‍ ഉള്‍പ്പെട്ടിട്ടില്ല.
