ഇന്ത്യയിലെ ഏറ്റവും വലിയ കാര്‍ നിര്‍മാതാക്കളായ മാരുതി സുസുക്കി ഒക്ടോബര്‍ മാസത്തില്‍ മൊത്തം 1 .46 ലക്ഷം കാറുകള്‍ വിറ്റഴിച്ചു. 2016 ഒക്ടോബര്‍ മാസത്തെ അപേക്ഷിച് വില്പനയില്‍ 9 .5 ശതമാനം വളര്‍ച്ച രേഖപ്പെടുത്തി. കഴിഞ്ഞ ഒക്ടോബറില്‍ 1 .34 ലക്ഷം കാറുകളാണ് വിറ്റഴിച്ചത്. കോംപാക്ട് കാറുകളായ ഡിസൈര്‍, ബലെനോ യൂട്ടിലിറ്റി വാഹനങ്ങളായ വിറ്റാര ബ്രീസ, എര്‍ട്ടിഗ എന്നിവയുടെ വില്‍പ്പനയാണ് കാര്യമായി വര്‍ധിച്ചതെന്ന് കമ്പനി വ്യക്തമാക്കി.
ആഭ്യന്തര വിപണിയിലെ വില്പന 9 .9 ശതമാനം വര്‍ധന രേഖപെടുത്തിയപ്പോള്‍, കയറ്റുമതി 4 .2 ശതമാനം കൂടി. മൊത്തം 10,446 കാറുകളാണ് ഒക്ടോബറില്‍ കയറ്റി അയച്ചത്. യൂട്ടിലിറ്റി വിഭാഗത്തിലാണ് വില്പന നന്നായി ഉയര്‍ന്നത്. എര്‍ട്ടിഗ, വിറ്റാര ബ്രെസ, എസ് ക്രോസ്സ് തുടങ്ങിയ മോഡലുകള്‍ ഉള്‍പ്പെടുന്ന ഈ വിഭാഗത്തിലെ വില്പന 29 .8 ശതമാനം കൂടി.

എന്നാല്‍ വാഗണ്‍ ആര്‍, ആള്‍ട്ടോ എന്നിവയുടെ വില്പന കുറഞ്ഞു. ഇവ ഉള്‍പ്പെടുന്ന ചെറുകാറുകളുടെ സെഗ്മെന്റില്‍ വില്‍പന 4 .2 ശതമാനം കുറഞ്ഞു. സിയാസിന്റെ വില്പനയിലാണ് വലിയ തിരിച്ചടി ഉണ്ടായത്. ഈ മോഡലിന്റെ വില്പന 35 .4 ശതമാനം താഴ്ന്നു.