ന്യൂഡല്‍ഹി: പ്രതിപക്ഷത്തിന്റെ പ്രതിഷേധമാര്‍ച്ച് റിപ്പോര്‍ട്ട് ചെയ്യുന്നതിനിടെ രാഹുല്‍ ഗാന്ധി ഗര്‍ഭിണിയായ മാധ്യമപ്രവര്‍ത്തകയെ തള്ളിയെന്ന ആരോപണത്തെച്ചൊല്ലി രാഷ്ട്രീയ വിവാദം. മാധ്യമപ്രവര്‍ത്തക റിച്ച പരാശറിനോട് രാഹുല്‍ മോശമായി പെരുമാറിയെന്ന് ബിജെപി ആരോപിച്ചു. കോണ്‍ഗ്രസ് ആരോപണം നിഷേധിച്ചു. ഒക്ടോബര്‍ 12ന് ഡല്‍ഹിയില്‍ നടന്ന പ്രതിഷേധത്തിനിടെയാണ് സംഭവമുണ്ടായതെന്നാണ് ആരോപണം. മൂന്നുമാസം ഗര്‍ഭിണിയായ റിച്ചയ്ക്ക് പരിക്കേറ്റെന്നും ആശുപത്രിയില്‍ പ്രവേശിപ്പിച്ചെന്നും ബിജെപി നേതാക്കള്‍ അവകാശപ്പെട്ടു. ആശുപത്രിയില്‍നിന്ന് റിച്ച സംഭവം വിവരിക്കുന്നതായുള്ള വിഡിയോ ബിജെപി വക്താവ് പ്രദീപ് ഭണ്ഡാരി സമൂഹമാധ്യമത്തില്‍ പങ്കുവച്ചു.
പ്രതിഷേധം റിപ്പോര്‍ട്ട് ചെയ്യുന്നതിനിടെയാണ് റിച്ചയെ തള്ളിയതെന്നും അവര്‍ രാഹുലിനോട് ചോദ്യങ്ങള്‍ ചോദിക്കുകയായിരുന്നില്ലെന്നും ഭണ്ഡാരി ആരോപിച്ചു. സംഭവത്തിനുശേഷം കോണ്‍ഗ്രസ് പ്രവര്‍ത്തകര്‍ സഹായിച്ചില്ലെന്നും അദ്ദേഹം കുറ്റപ്പെടുത്തി. എന്നാല്‍ ആരോപണങ്ങള്‍ തള്ളിയ കോണ്‍ഗ്രസ്, സംഭവങ്ങളുടെ സമയക്രമത്തിലും ആശുപത്രിയിലെത്തിയതുമായി ബന്ധപ്പെട്ട അവകാശവാദങ്ങളിലും സംശയങ്ങള്‍ ഉന്നയിച്ചു. ആരോപണം സ്വതന്ത്രമായി സ്ഥിരീകരിക്കപ്പെട്ടിട്ടില്ല. വോട്ടര്‍പട്ടികയുടെ പ്രത്യേക തീവ്ര പരിഷ്‌കരണത്തിനെതിരെയും മുഖ്യ തിരഞ്ഞെടുപ്പ് കമ്മിഷണറെ നീക്കണമെന്നാവശ്യപ്പെട്ടും പ്രതിപക്ഷ നേതാക്കള്‍ സുപ്രീംകോടതിയിലേക്ക് നടത്തിയ മാര്‍ച്ചിന്റെ പശ്ചാത്തലത്തിലാണ് വിവാദം ഉയര്‍ന്നത്.
