ബംഗളൂരു: ഭരണ തീരുമാനങ്ങള് ഒരിക്കലും അന്ധവിശ്വാസങ്ങള് സ്വാധീനിക്കില്ലെന്ന് കര്ണാടക മുഖ്യമന്ത്രി സിദ്ധരാമയ്യ വ്യക്തമാക്കി. കര്ണാടക നിയമസഭയിലെ ബജറ്റ് ചര്ച്ചയ്ക്കിടെ പ്രതിപക്ഷ നേതാവ് ആര്. അശോക ഉന്നയിച്ച 'രാഹുകാലത്തില് ബജറ്റ് അവതരിപ്പിച്ചു' എന്ന പരാമര്ശത്തിന് മറുപടിയായാണ് മുഖ്യമന്ത്രി ഇക്കാര്യം ചൂണ്ടിക്കാട്ടിയത്. ''രാഹുകാലം, ഗുളികകാലം, യമഗണ്ഡകാലം പോലുള്ള സമയങ്ങളില് വിശ്വസിക്കുന്നില്ല. രാഹുകാലത്ത് തന്നെ നിരവധി ബജറ്റുകള് അവതരിപ്പിച്ചിട്ടുണ്ട്. ജനാധിപത്യത്തില് വിശ്വസിക്കുന്ന വ്യക്തിയാണ്, ഭരണ തീരുമാനങ്ങള് ഒരിക്കലും അന്ധവിശ്വാസത്താല് നയിക്കപ്പെടരുത്'' - സിദ്ധരാമയ്യ പറഞ്ഞു. മതപരമായ ഭക്ഷണക്രമങ്ങള് പിന്തുടരാറില്ലെന്നും, ശിവരാത്രി, ഉഗാദി പോലുള്ള വിശേഷ ദിവസങ്ങളിലും താന് മാംസം ഭക്ഷിക്കാറുണ്ടെന്നും അദ്ദേഹം വ്യക്തമാക്കി. ''ദൈവികത ക്ഷേത്രങ്ങളില് മാത്രം ഒതുങ്ങുന്നതല്ല, അത് സര്വ്വവ്യാപിയാണ്'' - സിദ്ധരാമയ്യ കൂട്ടിച്ചേര്ത്തു. പ്രതിപക്ഷത്തിന്റെ വിമര്ശനങ്ങള്ക്ക് മറുപടിയായി, ഭരണ തീരുമാനങ്ങള് ശാസ്ത്രീയവും ജനാധിപത്യപരവുമായ രീതികളിലാണ് കൈക്കൊള്ളുന്നതെന്ന് മുഖ്യമന്ത്രി വീണ്ടും ഉറപ്പിച്ചു.
