കൊച്ചി: കോണ്ഗ്രസില് മുഖ്യമന്ത്രി പദത്തെ ചുറ്റിപ്പറ്റിയ ചര്ച്ചകള് ചൂടുപിടിക്കുന്നതിനിടെ കെസി വേണുഗോപാല്ക്ക് പാര്ലമെന്ററി പബ്ലിക് അക്കൗണ്ട്സ് കമ്മിറ്റി (പിഎസി) അധ്യക്ഷസ്ഥാനത്തേക്ക് വീണ്ടും നിയമനം ലഭിച്ചത് രാഷ്ട്രീയ വൃത്തങ്ങളില് കൗതുകമുണര്ത്തി. 2026-27 വര്ഷത്തേക്കുള്ള നിയമനമാണ് ഓം ബിര്ള പ്രഖ്യാപിച്ചത്. വിഡി സതീശന്യെയും രമേശ് ചെന്നിത്തലയെയും പിന്തുണയ്ക്കുന്ന വിഭാഗങ്ങള്ക്കിടയിലെ പിടിവലിക്കിടെ ഒത്തുതീര്പ്പു സ്ഥാനാര്ഥിയായി കെസി വേണുഗോപാല് ഉയര്ന്നേക്കുമെന്ന സൂചനകള് നിലനില്ക്കുമ്പോഴാണ് ഈ നീക്കം. ഇതോടെ കെസി മുഖ്യമന്ത്രി മത്സരത്തില്നിന്ന് പുറത്തായെന്ന വിലയിരുത്തലും ചിലര് മുന്നോട്ടുവയ്ക്കുന്നു.
എന്നാല് മുഖ്യമന്ത്രി സ്ഥാനത്തേക്ക് നിയോഗിക്കപ്പെടുന്ന സാഹചര്യമുണ്ടായാല് പിഎസി അധ്യക്ഷ സ്ഥാനം ഒഴിഞ്ഞ് കേരളത്തിലേക്ക് മടങ്ങാന് കഴിയുമെന്നാണു അദ്ദേഹത്തോട് അടുത്ത വൃത്തങ്ങള് സൂചിപ്പിക്കുന്നത്. ലോക്സഭയില്നിന്നുള്ള 15 പേരും രാജ്യസഭയില്നിന്നുള്ള ഏഴുപേരും ഉള്പ്പെടെ 22 അംഗങ്ങളാണ് പിഎസിയില് ഉള്ളത്. ലോക്സഭയിലെ മുഖ്യ പ്രതിപക്ഷ കക്ഷിയുടെ അംഗത്തെ അധ്യക്ഷനാക്കുന്നതാണ് പതിവ്. മുസ്ലീം ലീഗ് വിഡി സതീശനെ പിന്തുണയ്ക്കുന്നതായി സൂചനകള് പുറത്ത് വന്ന സാഹചര്യത്തില് കെസി ഡല്ഹിയില് തുടരാന് തീരുമാനിച്ചതായും റിപ്പോര്ട്ടുകളുണ്ട്. യുഡിഎഫ് അധികാരത്തിലെത്തിയാല് ഘടകകക്ഷികളുടെ പിന്തുണ മുഖ്യമന്ത്രിയെ തീരുമാനിക്കുന്നതില് നിര്ണായകമാകുമെന്നാണ് വിലയിരുത്തല്.
കെസി മത്സരത്തില്നിന്ന് പിന്മാറുന്ന പക്ഷം അദ്ദേഹത്തെ പിന്തുണക്കുന്നവര് രമേശ് ചെന്നിത്തലയെ പിന്തുണയ്ക്കാമെന്ന അഭ്യൂഹങ്ങളും പ്രചരിക്കുന്നുണ്ടെങ്കിലും ഇത്തരമൊരു തീരുമാനം ഇതുവരെ എടുത്തിട്ടില്ലെന്നാണ് അനുയായികള് വ്യക്തമാക്കുന്നത്. എംഎല്എമാരുടെ പിന്തുണയില് കെസി വേണുഗോപാലിനാണ് മുന്തൂക്കം ലഭിക്കുകയെന്നാണ് വിലയിരുത്തല്. രണ്ടാമതായി ചെന്നിത്തലയും ഘടകകക്ഷികളുടെ പിന്തുണയില് വിഡി സതീശനും ശക്തമായി നിലകൊള്ളുന്നു. തിങ്കളാഴ്ചത്തെ ഫലപ്രഖ്യാപനം അനുകൂലമായാല് കോണ്ഗ്രസ് മുഖ്യമന്ത്രിയെ തീരുമാനിക്കുന്നതില് ഹൈക്കമാന്ഡിന് വലിയ വെല്ലുവിളി നേരിടേണ്ടി വരുമെന്നത് വ്യക്തമാണ്.
