കോട്ടയം: കോണ്‍ഗ്രസില്‍ മുഖ്യമന്ത്രി സ്ഥാനത്തെച്ചൊല്ലിയുള്ള ചര്‍ച്ചകള്‍ തുടരുന്നതിനിടെ കെ.സി വേണുഗോപാലിക്കെതിരെ വിമര്‍ശനവുമായി മലങ്കര ഓര്‍ത്തഡോക്‌സ് സിറിയന്‍ ചര്‍ച്ച് രംഗത്ത്. ഓര്‍ത്തഡോക്സ് സഭ ഭദ്രാസന മെത്രാപൊലീത്ത Dr. Yuhanon Mar Diascoros ആണ് പരസ്യ പ്രതികരണം നടത്തിയത്. എംപിമാര്‍ മുഖ്യമന്ത്രിയാകുന്നതിന് നിയമപരമായ തടസ്സമൊന്നുമില്ലെങ്കിലും, എംപിമാര്‍ നിയമസഭ തെരഞ്ഞെടുപ്പില്‍ മത്സരിക്കേണ്ടെന്ന തീരുമാനം എടുത്ത ശേഷം മുഖ്യമന്ത്രിസ്ഥാനത്തേക്ക് ഒരു എംപിയുടെ പേര് ഉയര്‍ന്നുവരുന്നത് വിരോധാഭാസമാണെന്ന് അദ്ദേഹം വിമര്‍ശിച്ചു.

''ആലിപ്പഴം പഴുത്തപ്പോള്‍ കാക്കയ്ക്ക് വായ്പ്പുണ്ണ്'' എന്ന മലയാള പഴഞ്ചൊല്ല് ഉദ്ധരിച്ചായിരുന്നു അദ്ദേഹത്തിന്റെ പ്രതികരണം. മുഖ്യമന്ത്രി സ്ഥാനത്തെ ചൊല്ലി ഇപ്പോള്‍ നടക്കുന്ന ചര്‍ച്ചകള്‍ അതേ അവസ്ഥയാണെന്നും അദ്ദേഹം പരിഹസിച്ചു. പാര്‍ട്ടി നേരത്തെ എംപിമാര്‍ ആരും നിയമസഭ തെരഞ്ഞെടുപ്പില്‍ മത്സരിക്കേണ്ടെന്ന നിലപാട് സ്വീകരിച്ചിരുന്നുവെന്ന് അദ്ദേഹം ഓര്‍മിപ്പിച്ചു. എന്നാല്‍ ഇപ്പോള്‍ മുഖ്യമന്ത്രി സ്ഥാനത്തേക്ക് ഒരു എംപിയുടെ പേര് ഉയര്‍ന്നുകേള്‍ക്കുന്നതായി ചൂണ്ടിക്കാട്ടി, കോണ്‍ഗ്രസ് ഒടുവില്‍ നല്ലൊരു തീരുമാനം എടുക്കുമെന്ന പ്രതീക്ഷയും പ്രകടിപ്പിച്ചു.

അതേസമയം, ഇത്തരം രാഷ്ട്രീയ നീക്കങ്ങളെ പൊതുജനം എങ്ങനെ കാണുമെന്ന് പിന്നീട് മാത്രമേ വ്യക്തമാകുകയുള്ളുവെന്നും അദ്ദേഹം പറഞ്ഞു. ''ഞങ്ങള്‍ ജയിച്ചു എന്നതുകൊണ്ട് ഇങ്ങനെ ഓരോ വിഷയങ്ങളുണ്ടാക്കി ജനങ്ങളെ ബുദ്ധിമുട്ടിക്കാന്‍ പാടില്ല എന്നത് വിജയിച്ചവരും മനസ്സിലാക്കണം,'' എന്നും Dr. Yuhanon Mar Diascoros കൂട്ടിച്ചേര്‍ത്തു.