ചെന്നൈ: തമിഴ്നാട് മുഖ്യമന്ത്രി Vijayയുടെ സാമ്പത്തിക ആരോപണങ്ങള്‍ക്ക് മറുപടിയുമായി മുന്‍ മുഖ്യമന്ത്രിയും ഡിഎംകെ അധ്യക്ഷനുമായ M K Stalin. അധികാരമേറ്റ ഉടന്‍ തന്നെ പണമില്ലെന്ന വാദം ഉയര്‍ത്തേണ്ടതില്ലെന്നും, ജനങ്ങള്‍ക്ക് നല്‍കിയ വാഗ്ദാനങ്ങള്‍ പാലിക്കാനാണ് സര്‍ക്കാര്‍ ശ്രമിക്കേണ്ടതെന്നും സ്റ്റാലിന്‍ പ്രതികരിച്ചു. ''10 ലക്ഷം കോടി രൂപയുടെ കടമെന്നത് സര്‍ക്കാരിന് അനുവദിക്കപ്പെട്ട സാമ്പത്തിക ബാധ്യതയാണ്. കോവിഡ് പോലുള്ള ദുരന്തകാലത്ത് പോലും ഭരണസംവിധാനം കാര്യക്ഷമമായി മുന്നോട്ട് കൊണ്ടുപോയ നേതാക്കളാണ് ഞങ്ങള്‍. ഇപ്പോഴും സര്‍ക്കാര്‍ പ്രവര്‍ത്തനങ്ങള്‍ക്ക് ആവശ്യമായ പണം ഖജനാവിലുണ്ട്. കുറ്റപ്പെടുത്തലല്ല, വാഗ്ദാനങ്ങള്‍ നടപ്പാക്കലാണ് പുതിയ സര്‍ക്കാര്‍ ചെയ്യേണ്ടത്,'' സ്റ്റാലിന്‍ വ്യക്തമാക്കി.

മുഖ്യമന്ത്രിയായി അധികാരമേറ്റ വിജയിന് ആശംസകളും സ്റ്റാലിന്‍ നേര്‍ന്നു.

മുഖ്യമന്ത്രിയായി സത്യപ്രതിജ്ഞ ചെയ്തതിന് പിന്നാലെയായിരുന്നു മുന്‍ ഡിഎംകെ സര്‍ക്കാരിന്റെ സാമ്പത്തിക നയങ്ങള്‍ക്കെതിരെ വിജയ് രൂക്ഷ വിമര്‍ശനം ഉന്നയിച്ചത്. 2021 മുതല്‍ 2026 വരെയുള്ള തമിഴ്നാട്ടിന്റെ സാമ്പത്തിക സ്ഥിതിയെക്കുറിച്ച് ധവളപത്രം പുറത്തിറക്കുമെന്ന് അദ്ദേഹം പ്രഖ്യാപിച്ചിരുന്നു. ഡിഎംകെ സര്‍ക്കാര്‍ സംസ്ഥാനത്തെ 10 ലക്ഷം കോടി രൂപയുടെ കടബാധ്യതയിലാക്കി വിട്ടുവെന്നായിരുന്നു വിജയിയുടെ ആരോപണം. ഈ സാമ്പത്തിക ഭാരം എത്രത്തോളമുണ്ടെന്ന് ജനങ്ങളെ ബോധ്യപ്പെടുത്താനാണ് ധവളപത്രമെന്നും അദ്ദേഹം വ്യക്തമാക്കിയിരുന്നു.

സുതാര്യമായ ഭരണസംവിധാനമാകും തന്റെ സര്‍ക്കാര്‍ നടപ്പാക്കുകയെന്ന് പറഞ്ഞ വിജയ് വിദ്യാഭ്യാസം, ഭക്ഷ്യവിതരണം, ആരോഗ്യം എന്നിവയ്ക്കാണ് മുന്‍ഗണന നല്‍കുകയെന്നും പ്രഖ്യാപിച്ചു. തെരഞ്ഞെടുപ്പ് വാഗ്ദാനങ്ങള്‍ നടപ്പാക്കുന്നതിനുള്ള പ്രധാന ഫയലുകളില്‍ മുഖ്യമന്ത്രി ഒപ്പുവെച്ചതായും സര്‍ക്കാര്‍ അറിയിച്ചു. ഗാര്‍ഹിക ഉപഭോക്താക്കള്‍ക്ക് 200 യൂണിറ്റ് വരെ സൗജന്യ വൈദ്യുതി നല്‍കുന്നതിനുള്ള ഫയലിലാണ് വിജയ് ആദ്യം ഒപ്പുവെച്ചത്. സ്ത്രീകളുടെ സുരക്ഷയ്ക്കായി പ്രത്യേക സേന രൂപീകരിക്കുന്നതിനുള്ള ഉത്തരവിനും അദ്ദേഹം അംഗീകാരം നല്‍കി. ചെന്നൈയിലെ Jawaharlal Nehru Indoor Stadiumയില്‍ നടന്ന ചടങ്ങിലായിരുന്നു വിജയിയും ഒന്‍പത് മന്ത്രിമാരും സത്യപ്രതിജ്ഞ ചെയ്ത് അധികാരമേറ്റത്.