ന്യൂഡല്‍ഹി: പശ്ചിമേഷ്യയിലെ തുടരുന്ന സംഘര്‍ഷങ്ങളുടെ സാമ്പത്തിക പ്രത്യാഘാതങ്ങള്‍ കണക്കിലെടുത്ത് കേന്ദ്രസര്‍ക്കാര്‍ ചെലവുചുരുക്കല്‍ നടപടികള്‍ ശക്തമാക്കുന്നു. പൊതുമേഖലാ ബാങ്കുകള്‍ക്കും ഇന്‍ഷുറന്‍സ് സ്ഥാപനങ്ങള്‍ക്കും യാത്രാ നിയന്ത്രണങ്ങള്‍, ഓണ്‍ലൈന്‍ യോഗങ്ങള്‍, ഇലക്ട്രിക് വാഹനങ്ങളിലേക്കുള്ള മാറ്റം എന്നിവ ഉള്‍പ്പെടെയുള്ള നിര്‍ദേശങ്ങള്‍ ധനമന്ത്രാലയം നല്‍കിയതായാണ് റിപ്പോര്‍ട്ടുകള്‍. State Bank of India, Bank of Baroda, Life Insurance Corporation of India ഉള്‍പ്പെടെയുള്ള പൊതുമേഖലാ സ്ഥാപനങ്ങള്‍ക്കും അവയിലെ ലക്ഷക്കണക്കിന് ജീവനക്കാര്‍ക്കും നിര്‍ദേശം ബാധകമായിരിക്കും. അത്യാവശ്യ സാഹചര്യങ്ങള്‍ ഒഴികെ എല്ലാ യോഗങ്ങളും അവലോകനങ്ങളും ചര്‍ച്ചകളും വീഡിയോ കോണ്‍ഫറന്‍സിലൂടെ മാത്രമേ നടത്താവൂവെന്ന് ധനകാര്യ സേവന വകുപ്പ് പുറത്തിറക്കിയ നിര്‍ദേശത്തില്‍ വ്യക്തമാക്കുന്നു.

സ്ഥാപനങ്ങളിലെ ചെയര്‍മാന്‍മാര്‍, മാനേജിങ് ഡയറക്ടര്‍മാര്‍, ചീഫ് എക്സിക്യൂട്ടീവ് ഓഫീസര്‍മാര്‍ അടക്കമുള്ള ഉന്നത ഉദ്യോഗസ്ഥരുടെ വിദേശയാത്രകളും പരമാവധി നിയന്ത്രിക്കണമെന്ന് നിര്‍ദേശിച്ചിട്ടുണ്ട്. സാധ്യമാകുന്നിടത്തോളം വിദേശ യോഗങ്ങളില്‍ വെര്‍ച്വലായി പങ്കെടുക്കാനാണ് നിര്‍ദേശം. ഇതിനുപുറമെ സ്ഥാപനങ്ങളുടെ ആവശ്യങ്ങള്‍ക്കായി ഉപയോഗിക്കുന്ന പെട്രോള്‍, ഡീസല്‍ വാഹനങ്ങള്‍ക്ക് പകരം ഇലക്ട്രിക് വാഹനങ്ങളിലേക്കുള്ള മാറ്റം വേഗത്തിലാക്കാനും ആവശ്യപ്പെട്ടിട്ടുണ്ട്. ഹെഡ് ഓഫീസുകളിലും ശാഖകളിലും വാടകയ്ക്ക് ഉപയോഗിക്കുന്ന വാഹനങ്ങള്‍ക്കു പകരം പരമാവധി ഇലക്ട്രിക് കാറുകള്‍ വിനിയോഗിക്കണമെന്നാണ് നിര്‍ദേശം. പശ്ചിമേഷ്യന്‍ സംഘര്‍ഷം നീണ്ടുനില്‍ക്കുന്നത് ആഗോള സാമ്പത്തിക സാഹചര്യങ്ങളെ ബാധിക്കുമെന്നും ഇന്ത്യയിലെ സാമ്പത്തിക വളര്‍ച്ച മന്ദഗതിയിലാക്കാനും പണപ്പെരുപ്പം ഉയര്‍ത്താനും വിദേശനാണ്യ സന്തുലിതാവസ്ഥയെ ബാധിക്കാനുമിടയുണ്ടെന്ന ആശങ്കയിലാണ് കേന്ദ്രസര്‍ക്കാര്‍. ഇതിനിടെ ചെലവുകള്‍ നിയന്ത്രിക്കണമെന്ന് പ്രധാനമന്ത്രി Narendra Modi കഴിഞ്ഞ ആഴ്ച ഉന്നത ഉദ്യോഗസ്ഥര്‍ക്ക് നിര്‍ദേശം നല്‍കിയിരുന്നു. ആഗോള സാമ്പത്തിക സമ്മര്‍ദങ്ങളുടെ പശ്ചാത്തലത്തില്‍ ഇന്ത്യന്‍ രൂപയും റെക്കോര്‍ഡ് ഇടിവ് നേരിടുന്ന സാഹചര്യമാണ് നിലവിലുള്ളത്. ചെലവുചുരുക്കല്‍ നടപടികളുടെ ഭാഗമായി ചില സംസ്ഥാന സര്‍ക്കാരുകള്‍ ജീവനക്കാരോട് ആഴ്ചയില്‍ രണ്ട് ദിവസം വീട്ടിലിരുന്ന് ജോലി ചെയ്യാനും നിര്‍ദേശിച്ചിട്ടുണ്ടെന്നാണ് റിപ്പോര്‍ട്ടുകള്‍.