തിരുവനന്തപുരം: വി.ഡി. സതീശന്‍ മുഖ്യമന്ത്രിയായി അധികാരമേറ്റ് നാലുമാസം പിന്നിടുന്നതിനിടെ കോണ്‍ഗ്രസിലെ ആഭ്യന്തര ഭിന്നത യുഡിഎഫ് സര്‍ക്കാരിന് വെല്ലുവിളിയാകുന്നു. സര്‍ക്കാര്‍ തീരുമാനങ്ങളില്‍ കൂടിയാലോചനയില്ലെന്ന വിമര്‍ശനവുമായി യുഡിഎഫ് കണ്‍വീനര്‍ അടൂര്‍ പ്രകാശ് പരസ്യമായി രംഗത്തെത്തിയതോടെ നേതൃത്വത്തിലെ വിയോജിപ്പുകള്‍ പുറത്തുവന്നിരിക്കുകയാണ്. എം.കെ. മുനീറിനെ കാബിനറ്റ് പദവിയോടെ ഭരണപരിഷ്‌കാര കമ്മീഷന്‍ ചെയര്‍മാനായും ഫോര്‍വേഡ് ബ്ലോക്ക് ദേശീയ ജനറല്‍ സെക്രട്ടറി ജി. ദേവരാജനെ ന്യൂഡല്‍ഹിയിലെ കേരളത്തിന്റെ പ്രത്യേക പ്രതിനിധിയായും നിയമിച്ചതാണ് പുതിയ തര്‍ക്കത്തിന് വഴിതെളിച്ചത്. ഇത്തരം തീരുമാനങ്ങള്‍ മുന്നണിയില്‍ കൂട്ടായ ചര്‍ച്ചയിലൂടെ എടുക്കണമെന്നാണ് അടൂര്‍ പ്രകാശിന്റെ നിലപാട്.
മുഖ്യമന്ത്രിയെ ലക്ഷ്യമിട്ടുള്ള വിപുലമായ നീക്കങ്ങളുടെ ഭാഗമായാണ് അടൂര്‍ പ്രകാശിന്റെ പ്രതികരണത്തെ ഒരു വിഭാഗം നേതാക്കള്‍ കാണുന്നത്. എഐസിസി ജനറല്‍ സെക്രട്ടറി കെ.സി. വേണുഗോപാലിനോട് ആഭിമുഖ്യമുള്ള നേതാക്കള്‍ക്കും മന്ത്രിമാര്‍ക്കും തീരുമാനങ്ങളെടുക്കുന്ന രീതിയില്‍ അതൃപ്തിയുണ്ടെന്നാണ് വിവരം. ആഭ്യന്തരമന്ത്രി രമേശ് ചെന്നിത്തലയും സര്‍ക്കാരുമായി അകലം പാലിക്കുന്നതായുള്ള സൂചനകളുണ്ട്. മുസ്ലിം ലീഗിന് ആറാമത്തെ കാബിനറ്റ് പദവി നല്‍കിയതില്‍ പാര്‍ട്ടിക്കുള്ളില്‍ ചര്‍ച്ച നടന്നില്ലെന്ന് കോണ്‍ഗ്രസ് രാഷ്ട്രീയകാര്യ സമിതിയിലെ ഒരു മുതിര്‍ന്ന അംഗം ആരോപിച്ചു. 63 എംഎല്‍എമാരുള്ള കോണ്‍ഗ്രസിന് അര്‍ഹമായ പരിഗണന ലഭിക്കുന്നില്ലെന്നും ഘടകകക്ഷികള്‍ക്കാണ് കൂടുതല്‍ പദവികള്‍ നല്‍കുന്നതെന്നും അദ്ദേഹം വിമര്‍ശിച്ചു. കുറഞ്ഞത് ഒരു കാബിനറ്റ് പദവിയെങ്കിലും കോണ്‍ഗ്രസിന് ലഭിക്കുമെന്ന് പ്രതീക്ഷിച്ച മുതിര്‍ന്ന നേതാക്കള്‍ക്കും അതൃപ്തിയുണ്ടെന്നാണ് വിവരം.
തര്‍ക്കത്തില്‍ കെ.സി. വേണുഗോപാല്‍ മൗനം തുടരുന്നതിനിടെ ഹൈക്കമാന്‍ഡ് ഇടപെടണമെന്ന് ചില നേതാക്കള്‍ ആവശ്യപ്പെട്ടിട്ടുണ്ട്. കെപിസിസി പ്രസിഡന്റും യൂത്ത് കോണ്‍ഗ്രസ് പ്രസിഡന്റും മന്ത്രിപദവി വഹിക്കുന്നതിനാല്‍ സംഘടനാപ്രവര്‍ത്തനത്തില്‍ വേണ്ടത്ര ശ്രദ്ധ ലഭിക്കുന്നില്ലെന്ന വിമര്‍ശനവും ഉയരുന്നുണ്ട്. അതേസമയം, മന്ത്രിമാരായ കെ. മുരളീധരനും റോജി എം. ജോണും മുഖ്യമന്ത്രിക്ക് പിന്തുണയുമായി രംഗത്തെത്തി. സര്‍ക്കാര്‍ തീരുമാനങ്ങള്‍ ആവശ്യമായ ചര്‍ച്ചകള്‍ക്കുശേഷമാണ് കൈക്കൊള്ളുന്നതെന്ന് മുരളീധരന്‍ വ്യക്തമാക്കി. അടൂര്‍ പ്രകാശ് പരസ്യവിമര്‍ശനം ഒഴിവാക്കേണ്ടിയിരുന്നുവെന്നും ഇത്തരം പ്രതികരണങ്ങള്‍ പ്രതിപക്ഷത്തിന് ആയുധമാകുമെന്നുമാണ് സതീശനെ പിന്തുണയ്ക്കുന്നവരുടെ നിലപാട്. മുഖ്യമന്ത്രിയുടെ പ്രതിച്ഛായ തകര്‍ക്കാനുള്ള നീക്കമായാണ് അദ്ദേഹത്തോട് അടുത്ത കേന്ദ്രങ്ങള്‍ ആരോപണങ്ങളെ കാണുന്നത്.
ഇതിനിടെ കൂടുതല്‍ ഘടകകക്ഷി നേതാക്കള്‍ക്ക് പദവികള്‍ നല്‍കുന്നതും പരിഗണനയിലുണ്ട്. കേരള കോണ്‍ഗ്രസ് നേതാവ് പി.ജെ. ജോസഫിനെ മുതിര്‍ന്ന പൗരന്മാരുടെ കമ്മീഷന്‍ ചെയര്‍മാനാക്കാനും കെഡിപി നേതാവ് മാണി സി. കാപ്പന് നോര്‍ക്ക റൂട്ട്‌സ് വൈസ് ചെയര്‍മാന്‍ സ്ഥാനം നല്‍കാനും ആലോചനയുണ്ടെന്നാണ് വിവരം. എന്നാല്‍ പുതിയ വിവാദത്തിന്റെ പശ്ചാത്തലത്തില്‍ തുടര്‍ന്നുള്ള കാബിനറ്റ് പദവി നിയമനങ്ങള്‍ യുഡിഎഫില്‍ വിശദമായ ചര്‍ച്ചകള്‍ക്കുശേഷം മാത്രമേ തീരുമാനിക്കൂ എന്നാണ് പാര്‍ട്ടി വൃത്തങ്ങള്‍ നല്‍കുന്ന സൂചന.
