തിരുവനന്തപുരം: കോണ്‍ഗ്രസ് ജില്ലാ കമ്മിറ്റി ഓഫീസിനു നേരെയുണ്ടായ കല്ലേറുമായി ബന്ധപ്പെട്ട് ബിജെപി നേതാക്കളടക്കം നാലുപേരെ പൊലീസ് പിടികൂടി. ബിജെപി ജില്ലാ സെക്രട്ടറി അഡ്വ. പ്രദീപ്, മണ്ഡലം പ്രസിഡന്റ് ശ്രീലാല്‍, ഇവരെ സഹായിച്ചതായി ആരോപിക്കപ്പെടുന്ന അജി, സ്റ്റെഫിന്‍ എന്നിവരാണ് പിടിയിലായത്.
തമിഴ്നാട്ടിലെ തെങ്കാശിയില്‍ ഒളിവില്‍ കഴിയുന്നതിനിടെ തിങ്കളാഴ്ച രാത്രിയാണ് ഇവരെ പിടികൂടിയതെന്ന് പൊലീസ് അറിയിച്ചു. മ്യൂസിയം പൊലീസും കമ്മിഷണറുടെ പ്രത്യേക അന്വേഷണ സംഘവും ചേര്‍ന്നായിരുന്നു നടപടി. പ്രദീപിനൊപ്പം ബൈക്കിലെത്തിയ ശ്രീലാലാണ് ഡിസിസി ഓഫീസിനു നേരെ കല്ലെറിഞ്ഞതെന്നാണ് പൊലീസിന്റെ കണ്ടെത്തല്‍. ആക്രമണത്തിന്റെ സിസിടിവി ദൃശ്യങ്ങള്‍ നേരത്തേ പുറത്തുവന്നിരുന്നു. കല്ലേറില്‍ ഓഫീസിന്റെ ജനല്‍ച്ചില്ലുകള്‍ ഉള്‍പ്പെടെ തകര്‍ന്നിരുന്നു.
കേന്ദ്രമന്ത്രി അമിത് ഷായെ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി കാണിച്ചതിനു പിന്നാലെയാണ് ഡിസിസി ഓഫീസിനു നേരെ ആക്രമണമുണ്ടായത്. സംഭവത്തിനു പിന്നില്‍ ബിജെപിയാണെന്ന് കോണ്‍ഗ്രസ് ആരോപിച്ചിരുന്നു. ആക്രമണത്തെ തുടര്‍ന്ന് മുഖ്യമന്ത്രി വി.ഡി. സതീശന്‍ ഉള്‍പ്പെടെയുള്ളവര്‍ ഓഫീസ് സന്ദര്‍ശിച്ചിരുന്നു.
