കോഴിക്കോട്: ക്ലാസ് മുറികളില്‍ പാഠ്യപദ്ധതിക്കു പുറത്തുള്ള വ്യക്തിപരമായ കാഴ്ചപ്പാടുകള്‍ അടിച്ചേല്‍പ്പിക്കുകയും മതവിശ്വാസങ്ങളെ പരിഹസിക്കുകയും ചെയ്യുന്നുവെന്ന ആരോപണവുമായി ഫാറൂഖ് കോളജിലെ വിദ്യാര്‍ഥികള്‍. സുവോളജി വിഭാഗം അസിസ്റ്റന്റ് പ്രൊഫസര്‍ ഷബ്‌നം നൂര്‍ജഹാനെതിരെ കോളജ് മാനേജ്മെന്റിനും അധികൃതര്‍ക്കും രേഖാമൂലം പരാതി നല്‍കിയതായാണ് റിപ്പോര്‍ട്ട്. ശാസ്ത്രവിഷയങ്ങളും പാഠഭാഗങ്ങളും പഠിപ്പിക്കുന്നതിനെ എതിര്‍ക്കുന്നില്ലെന്നും എന്നാല്‍ ശാസ്ത്രപഠനത്തിന് നിരീശ്വരവാദ നിലപാട് അനിവാര്യമാണെന്ന തരത്തിലുള്ള പരാമര്‍ശങ്ങളോടാണ് വിയോജിപ്പെന്നും വിദ്യാര്‍ഥികള്‍ വ്യക്തമാക്കുന്നു. മതവിശ്വാസം, ആത്മീയത, മരണാനന്തര ജീവിതം എന്നിവയെക്കുറിച്ചുള്ള അധ്യാപികയുടെ പരാമര്‍ശങ്ങള്‍ വിശ്വാസികളായ വിദ്യാര്‍ഥികള്‍ക്ക് അസ്വസ്ഥതയുണ്ടാക്കുന്നതായും പരാതിയില്‍ പറയുന്നു. അക്കാദമിക് ചര്‍ച്ചകള്‍ക്കിടെ അധ്യാപകരുടെ വ്യക്തിപരമായ ആശയങ്ങള്‍ സ്വീകരിക്കാന്‍ വിദ്യാര്‍ഥികളെ നിര്‍ബന്ധിക്കരുതെന്നാണ് പരാതിക്കാരുടെ നിലപാട്.
നിഖാബ് ധരിച്ചെത്തിയ ഒരു വിദ്യാര്‍ഥിനിയുടെ വസ്ത്രധാരണത്തെ സഹപാഠികള്‍ക്കു മുന്നില്‍ വിമര്‍ശിച്ചുവെന്ന ആരോപണവും പരാതിയിലുണ്ട്. ഈ ഇടപെടല്‍ വിദ്യാര്‍ഥിനിയുടെ സ്വകാര്യതയെയും ആത്മാഭിമാനത്തെയും ബാധിച്ചതായി പരാതിക്കാര്‍ ചൂണ്ടിക്കാട്ടുന്നു. ഇന്റേണല്‍ മാര്‍ക്കിനെയും അക്കാദമിക് മൂല്യനിര്‍ണയത്തെയും പ്രതികൂലമായി ബാധിക്കുമോയെന്ന ആശങ്കയാണ് നേരത്തേ പരാതി നല്‍കുന്നതില്‍നിന്ന് പിന്തിരിപ്പിച്ചതെന്ന് വിദ്യാര്‍ഥികള്‍ പറയുന്നു. അക്കാദമിക് ഭാവി പരിഗണിച്ച് പേരുകള്‍ വെളിപ്പെടുത്താതെയാണ് പരാതി പുറത്തുവിട്ടിരിക്കുന്നതെന്നും റിപ്പോര്‍ട്ടിലുണ്ട്.
മാനേജ്മെന്റ് ഇടപെട്ട് ക്ലാസ് മുറിയിലെ സംഭവങ്ങളെക്കുറിച്ച് അന്വേഷണം നടത്തണമെന്നാണ് വിദ്യാര്‍ഥികളുടെ ആവശ്യം. നേരത്തേ ഷബ്‌നം നൂര്‍ജഹാന്‍ സംഘടിപ്പിച്ച 'നൂര്‍-ഇ-റൂമി' ആത്മീയ പരിപാടിയുമായി ബന്ധപ്പെട്ട് സൂഫിസത്തെക്കുറിച്ചുള്ള ചര്‍ച്ചകളും വിമര്‍ശനങ്ങളും ഉയര്‍ന്നിരുന്നു. അതിനു പിന്നാലെയാണ് വിദ്യാര്‍ഥികളുടെ പരാതിയും പുറത്തുവന്നിരിക്കുന്നത്. പരാതിയിലെ ആരോപണങ്ങളോട് അധ്യാപികയുടെ പ്രതികരണമോ മാനേജ്മെന്റ് സ്വീകരിച്ച നടപടികളുടെ വിശദാംശങ്ങളോ ലഭ്യമായ റിപ്പോര്‍ട്ടുകളില്‍ ഉള്‍പ്പെടുത്തിയിട്ടില്ല. ആരോപണങ്ങള്‍ അന്വേഷണത്തിലൂടെ സ്ഥിരീകരിച്ചതായുള്ള വിവരവും റിപ്പോര്‍ട്ടുകളിലില്ല.
