കൊച്ചി: രാജ്യത്ത് സ്വര്‍ണവില റെക്കോര്‍ഡുകള്‍ ഭേദിച്ച് ഉയരുമ്പോഴും കേരളത്തിലെ ക്ഷേത്രങ്ങളില്‍ വിശ്വാസികളുടെ വഴിപാടുകള്‍ക്ക് കുറവില്ല. വിലയേറിയ ലോഹങ്ങളായ സ്വര്‍ണവും വെള്ളിയും ക്ഷേത്രങ്ങളിലെ വഴിപാട് പെട്ടികളിലേക്ക് ഒഴുകിയെത്തുന്ന പ്രവാഹം തുടര്‍ന്നുകൊണ്ടിരിക്കുകയാണ്.

ഗുരുവായൂര്‍ ക്ഷേത്രത്തില്‍ ഭക്തര്‍ ഓരോ വര്‍ഷവും ഏകദേശം 20-25 കിലോഗ്രാം സ്വര്‍ണവും 120-150 കിലോഗ്രാം വെള്ളിയുമാണ് വഴിപാടായി നല്‍കുന്നത്. 2025 ഒക്ടോബറിലൊപ്പമാത്രം 2.58 കിലോഗ്രാം സ്വര്‍ണവും 9.31 കിലോഗ്രാം വെള്ളിയുമാണ് ലഭിച്ചത്. തീര്‍ത്ഥാടനകാലത്ത് മാത്രം തുറക്കുന്ന ശബരിമലയില്‍ മൂന്ന് മാസത്തിനുള്ളില്‍ ഏകദേശം 15 കിലോഗ്രാം സ്വര്‍ണം ലഭിക്കുന്നതായും കണക്കുകള്‍ വ്യക്തമാക്കുന്നു.

സംസ്ഥാനത്തുടനീളം 3,000ലധികം ക്ഷേത്രങ്ങളില്‍ ആഭരണങ്ങള്‍, നാണയങ്ങള്‍, വിഗ്രഹങ്ങള്‍, ആചാര വസ്തുക്കള്‍ തുടങ്ങി വിവിധ രൂപങ്ങളിലുള്ള വിലയേറിയ ലോഹങ്ങള്‍ വഴിപാടായി ലഭിക്കുന്നു. ഇന്ത്യയുടെ വാര്‍ഷിക സ്വര്‍ണ ഉപഭോഗത്തില്‍ (600-800 ടണ്‍) 25-28% വരെ കേരളം സംഭാവന ചെയ്യുന്നതായി വേള്‍ഡ് ഗോള്‍ഡ് കൗണ്‍സില്‍ റിപ്പോര്‍ട്ട് ചെയ്യുന്നു.

ഇന്ത്യയിലെ ക്ഷേത്രങ്ങളില്‍ 2,000-4,000 ടണ്‍ വരെ സ്വര്‍ണശേഖരം ഉണ്ടായിരിക്കാമെന്നും, അതില്‍ 1,000-3,000 ടണ്‍ വരെ സ്വകാര്യ വ്യക്തികള്‍ സംഭാവന ചെയ്തതാകാമെന്നും റിപ്പോര്‍ട്ട് സൂചിപ്പിക്കുന്നു. ഗുരുവായൂര്‍ ദേവസ്വം ചെയര്‍മാന്‍ വി.കെ. വിജയന്‍ പറഞ്ഞു: ''ലഭിക്കുന്ന സ്വര്‍ണത്തിന്റെ ഭൂരിഭാഗവും ആഭരണങ്ങളുടെയും മറ്റു വസ്തുക്കളുടെയും രൂപത്തിലാണ്. ഇത് എസ്ബിഐ മുംബൈ ബ്രാഞ്ചില്‍ നിക്ഷേപിച്ച് സ്വര്‍ണക്കട്ടികളാക്കി മാറ്റുന്നു. നിക്ഷേപത്തിന് 2-2.5% പലിശ ലഭിക്കുന്നു.''

വഴിപാടായി ലഭിക്കുന്ന വെള്ളി നേരത്തെ സ്ട്രോങ് റൂമുകളില്‍ സൂക്ഷിച്ചിരുന്നുവെന്നും, ഇപ്പോള്‍ ഏകദേശം 5 ടണ്‍ വെള്ളി എസ്ബിഐ ഹൈദരാബാദ് ശാഖയില്‍ നിക്ഷേപിച്ച് ബാറുകളാക്കി മാറ്റിയതായും അദ്ദേഹം പറഞ്ഞു. ലേലം ചെയ്യാന്‍ അനുമതിക്കായി കാത്തിരിക്കുകയാണ്.

ദേവസ്വങ്ങളുടെ കീഴിലല്ലാത്ത ചെറിയ ക്ഷേത്രങ്ങള്‍ താലി, ആള്‍രൂപം തുടങ്ങിയ രൂപത്തില്‍ സ്വര്‍ണ സംഭാവനകള്‍ സ്വീകരിക്കുന്നതായും, നാണയങ്ങള്‍ ഒഴികെ ഭൂരിഭാഗം സ്വര്‍ണം സംയുക്ത രൂപത്തിലാണെന്നും പ്രമുഖ ജ്വല്ലറി ഉടമ പറഞ്ഞു. ''അത് 24 കാരറ്റിലേക്ക് ഉരുക്കി ശുദ്ധീകരിച്ചാണ് കൃത്യമായ മൂല്യം നിര്‍ണ്ണയിക്കുന്നത്,''- അദ്ദേഹം കൂട്ടിച്ചേര്‍ത്തു.

2009ലെ പൊതുതാല്‍പര്യ ഹര്‍ജിയില്‍ ശ്രീ പത്മനാഭസ്വാമി ക്ഷേത്രത്തിന്റെ സമ്പത്ത് വെളിപ്പെടുത്തിയതോടെ ക്ഷേത്ര സ്വര്‍ണശേഖരത്തില്‍ പൊതുജനശ്രദ്ധ വര്‍ധിച്ചു. 2015ല്‍ ആരംഭിച്ച സ്വര്‍ണ ധനസമ്പാദന പദ്ധതി (GMS) വഴി ക്ഷേത്രങ്ങള്‍ ഔപചാരിക സ്വര്‍ണ ശേഖരത്തിലേക്ക് സംഭാവന നല്‍കാന്‍ തുടക്കം കുറിച്ചു.

ഗുരുവായൂര്‍ ക്ഷേത്രത്തിന്റെ 2020-21 ഓഡിറ്റ് റിപ്പോര്‍ട്ട് പ്രകാരം GMS പദ്ധതിയില്‍ 834 കിലോഗ്രാം സ്വര്‍ണം SBIയില്‍ നിക്ഷേപിച്ചിട്ടുണ്ടെന്നും, ഇതുവഴി 5.4 കോടി രൂപയുടെ വാര്‍ഷിക പലിശ ലഭിക്കുന്നതായും രേഖപ്പെടുത്തിയിട്ടുണ്ട്. 2023ല്‍ കേരള ഹൈക്കോടതി തിരുവിതാംകൂര്‍ ദേവസ്വം ബോര്‍ഡിന് 535 കിലോഗ്രാം സ്വര്‍ണം SBIയില്‍ നിക്ഷേപിക്കാന്‍ അനുമതി നല്‍കിയിരുന്നു. 2024ല്‍ ബോര്‍ഡ് 467 കിലോഗ്രാം സ്വര്‍ണം റിസര്‍വ് ബാങ്കിന് കൈമാറിയതായും റിപ്പോര്‍ട്ടുകള്‍ വ്യക്തമാക്കുന്നു.

തിരുവാഭരണം കമ്മീഷണറുടെ മേല്‍നോട്ടത്തില്‍, തിരുവിതാംകൂര്‍ ദേവസ്വം ബോര്‍ഡ് അതിന്റെ 18 സ്ട്രോങ് മുറികളിലായി സൂക്ഷിച്ചിരിക്കുന്ന സ്വര്‍ണത്തെ കാറ്റഗറി എ (ചരിത്ര നിധികള്‍), കാറ്റഗറി ബി (ദൈനംദിന ആചാര ആസ്തികള്‍), കാറ്റഗറി സി (പലവക സ്വര്‍ണ ശകലങ്ങള്‍) എന്നിങ്ങനെ തരംതിരിച്ച് കൃത്യമായ രേഖകളും സംരക്ഷണവും ഉറപ്പാക്കിയിട്ടുണ്ട്.