ന്യൂഡല്‍ഹി: ചരിത്ര വിജയം നേടി ബിഹാറില്‍ ഭരണത്തുടര്‍ച്ച നേടിയ എന്‍ഡിഎ സര്‍ക്കാരിന്റെ പുതിയ മന്ത്രിസഭയില്‍ ഭൂരിപക്ഷം അംഗങ്ങളും കോടീശ്വരന്മാരും ക്രിമിനല്‍ കേസുകളിലെ പ്രതികളുമാണെന്ന് അസോസിയേഷന്‍ ഫോര്‍ ഡെമോക്രാറ്റിക് റിഫോംസ് (ADR) റിപ്പോര്‍ട്ട് വ്യക്തമാക്കുന്നു.

ക്രിമിനല്‍ കേസുകള്‍

- പത്താം തവണയും മുഖ്യമന്ത്രിയായി ചുമതലയേറ്റ നിതീഷ് കുമാറിന്റെ നേതൃത്വത്തിലുള്ള 24 അംഗ മന്ത്രിസഭയിലെ 11 പേര്‍ക്ക് എതിരെയാണ് ക്രിമിനല്‍ കേസുകള്‍.

- ഇതില്‍ 9 പേര്‍ക്ക് കലാപം, പൊതുപ്രവര്‍ത്തകരെ ആക്രമിക്കല്‍, വഞ്ചന, വ്യാജരേഖ ചമയ്ക്കല്‍, ഗുരുതര പരിക്കേല്‍പ്പിക്കല്‍, തെരഞ്ഞെടുപ്പ് കുറ്റകൃത്യങ്ങള്‍ തുടങ്ങിയ ഗുരുതര കുറ്റങ്ങള്‍ ചുമത്തിയിട്ടുണ്ട്.

- പട്ടികയില്‍ 6 പേര്‍ ബിജെപിയും, 2 പേര്‍ ജെഡിയു പ്രതിനിധികളും.

- എല്‍ജെപി (ആര്‍വി) മന്ത്രിമാരുടെ പേരിലും കേസുകള്‍ നിലനില്‍ക്കുന്നു.

- എച്ച്എഎം (എസ്) അംഗമായ ഏക മന്ത്രിക്കെതിരെയും ഗുരുതര കുറ്റങ്ങള്‍ പ്രകാരമുള്ള കേസ് നിലവിലുണ്ട്.

- എന്നാല്‍, ആരും ഇതുവരെ ശിക്ഷിക്കപ്പെട്ടിട്ടില്ല.

സാമ്പത്തിക പശ്ചാത്തലം

- സത്യവാങ്മൂലം പ്രകാരം 24 മന്ത്രിമാരില്‍ 21 പേര്‍ക്ക് 1 കോടി രൂപയില്‍ കൂടുതലുള്ള ആസ്തിയുണ്ട്.

- ഇന്ത്യയിലെ ഏറ്റവും സാമ്പത്തിക ശക്തിയുള്ള മന്ത്രിസഭകളില്‍ ഒന്നാണ് ബിഹാറിലേതെന്ന് റിപ്പോര്‍ട്ട് വ്യക്തമാക്കുന്നു.

- മന്ത്രിസഭയിലെ ശരാശരി സ്വത്ത് ?5.32 കോടി രൂപയില്‍ കൂടുതലാണ്.

റിപ്പോര്‍ട്ടിന്റെ വിശദാംശങ്ങള്‍

- 'ബിഹാര്‍ നിയമസഭയിലെ മന്ത്രിമാരുടെ ക്രിമിനല്‍ പശ്ചാത്തലം, സാമ്പത്തികം, വിദ്യാഭ്യാസം, ലിംഗഭേദം, മറ്റ് വിശദാംശങ്ങള്‍: വിശകലനം 2025' എന്ന പേരിലുള്ള ADR റിപ്പോര്‍ട്ടിലാണ് വിവരങ്ങള്‍ ഉള്‍പ്പെടുത്തിയിരിക്കുന്നത്.