മുംബൈ: വിമാന സര്‍വീസുകള്‍ തടസ്സപ്പെട്ട യാത്രക്കാര്‍ക്ക് ഇന്‍ഡിഗോ ഇതുവരെ 610 കോടി രൂപ റീഫണ്ട് നല്‍കി. വിവിധ വിമാനത്താവളങ്ങളിലായി കുടുങ്ങിപ്പോയ 3,000 ബാഗേജുകളും കമ്പനി യാത്രക്കാരുടെ കൈകളിലെത്തിച്ചു.

ഞായറാഴ്ച വൈകുന്നേരത്തോടെ യാത്രക്കാര്‍ക്ക് ടിക്കറ്റ് നിരക്കുകള്‍ റീഫണ്ടായി നല്‍കണമെന്ന് കേന്ദ്ര സര്‍ക്കാര്‍ നിര്‍ദേശിച്ചിരുന്നു. കൂടാതെ, യാത്രക്കാരുടെ ബാഗേജുകള്‍ രണ്ട് ദിവസത്തിനകം മടക്കിനല്‍കണമെന്നും വ്യോമയാന മന്ത്രാലയം നിര്‍ദേശിച്ചു.

പശ്ചാത്തലം:

ഡിസംബര്‍ 15 വരെ റദ്ദാക്കുന്ന എല്ലാ സര്‍വീസുകള്‍ക്കും മുഴുവന്‍ റീഫണ്ട് നല്‍കുമെന്ന് ഇന്‍ഡിഗോ അറിയിച്ചു. സര്‍വീസുകള്‍ സാധാരണ നിലയിലാക്കാന്‍ ശ്രമിക്കുന്നതിനാല്‍ യാത്രക്കാരുടെ സഹകരണം അഭ്യര്‍ത്ഥിക്കുകയും ചെയ്തു.

ഇന്ന് ഇന്‍ഡിഗോ 1650 സര്‍വീസുകള്‍ നടത്തുമെന്ന് കമ്പനി അറിയിച്ചു. ശനിയാഴ്ച 1565 സര്‍വീസുകളും വെള്ളിയാഴ്ച 706 സര്‍വീസുകളും മാത്രമാണ് നടന്നത്. നേരത്തെ സര്‍വീസ് ഉണ്ടായിരുന്ന 138 വിമാനത്താവളങ്ങളില്‍ 135ലേക്കും ഇന്ന് സര്‍വീസ് നടത്തുന്നു. കഴിഞ്ഞ ദിവസം 30 ശതമാനം സര്‍വീസുകള്‍ മാത്രമാണ് സമയക്രമം പാലിച്ചതെങ്കില്‍ ഇന്ന് അത് 75 ശതമാനമായി ഉയര്‍ന്നു.

സര്‍ക്കാര്‍ നിലപാട്:

വ്യോമയാന ശൃംഖല അതിവേഗം സാധാരണ നിലയിലേക്ക് മാറുന്നുണ്ടെന്നും പ്രവര്‍ത്തനങ്ങള്‍ പൂര്‍ണമാകുന്നതുവരെ വിമാനങ്ങള്‍ വൈകാനോ റദ്ദാക്കാനോ സാധ്യതയുണ്ടെന്നും സര്‍ക്കാര്‍ പ്രസ്താവനയില്‍ വ്യക്തമാക്കി. രാജ്യത്തെ മറ്റ് ആഭ്യന്തര വിമാനക്കമ്പനികള്‍ സുഗമമായും പൂര്‍ണ ശേഷിയിലുമാണ് പ്രവര്‍ത്തിക്കുന്നത്