ന്യൂഡല്ഹി: കൊച്ചി കോര്പ്പറേഷന് മേയര് തെരഞ്ഞെടുപ്പില് പാര്ട്ടി തീരുമാനം എന്തായാലും അന്തിമമാണെന്ന് കോണ്ഗ്രസ് അഖിലേന്ത്യാ ജനറല് സെക്രട്ടറി കെ.സി. വേണുഗോപാല് വ്യക്തമാക്കി. തീരുമാനത്തില് അപാകതകളോ പരാതികളോ ഉണ്ടെങ്കില് അത് ചര്ച്ച ചെയ്യേണ്ടത് പാര്ട്ടി വേദികളിലാണെന്നും അദ്ദേഹം പറഞ്ഞു.
ദീപ്തി മേരി വര്ഗീസിന് പ്രയാസം ഉണ്ടായത് സ്വാഭാവികമാണെന്നും, 1987-ല് താന് കെ.എസ്.യു പ്രസിഡന്റായിരുന്ന കാലത്ത് മഹാരാജാസ് കോളജിലെ ശക്തമായ പ്രവര്ത്തകയായിരുന്നു ദീപ്തിയെന്നും വേണുഗോപാല് ഓര്മ്മിപ്പിച്ചു. കോണ്ഗ്രസിന്റെ പ്രത്യയശാസ്ത്രങ്ങളില് ഉറച്ചു നിന്ന പ്രവര്ത്തകയായതിനാല് മേയര് പദവി ആഗ്രഹിച്ചത് തെറ്റല്ലെങ്കിലും, പാര്ട്ടി എടുത്ത തീരുമാനത്തെ അംഗീകരിക്കേണ്ടതാണെന്നും അദ്ദേഹം കൂട്ടിച്ചേര്ത്തു.
കോണ്ഗ്രസിന് ഇത്തരം സ്ഥാനങ്ങളിലേക്ക് തെരഞ്ഞെടുക്കാന് സ്വന്തം രീതികളുണ്ടെന്നും, എല്ലാ സമൂഹങ്ങളെയും ഉള്ക്കൊള്ളുന്ന പാര്ട്ടിയായതിനാല് തീരുമാനങ്ങള് പാര്ട്ടി തലങ്ങളില് ചര്ച്ച ചെയ്ത് എടുക്കുന്നതാണെന്നും വേണുഗോപാല് വ്യക്തമാക്കി.
യുഡിഎഫ് ജില്ലാ ചെയര്മാന് ഡൊമിനിക് പ്രസന്റേഷന് പറഞ്ഞു, കോര് കമ്മിറ്റി യോഗം ചേര്ന്ന് കൗണ്സിലര്മാരുടെ അഭിപ്രായം തേടി കെപിസിസി നേതാക്കളുമായി ആലോചിച്ചാണ് മേയര് സ്ഥാനത്തെക്കുറിച്ച് തീരുമാനം എടുത്തത്. ഗ്രൂപ്പ് മാനേജര്മാര് ഭീഷണിപ്പെടുത്തിയെന്ന ആരോപണം ശരിയല്ലെന്നും, തെരഞ്ഞെടുക്കപ്പെട്ടവര് എല്ലാവരും യോഗ്യതയുള്ളവരാണെന്നും അദ്ദേഹം വ്യക്തമാക്കി.
ഒരാളോടും അനീതി കാണിച്ചിട്ടില്ലെന്നും, സ്റ്റാന്ഡിങ് കമ്മിറ്റികളുടെ തെരഞ്ഞെടുപ്പിലും മാനദണ്ഡങ്ങള് പാലിക്കുമെന്നും ഡൊമിനിക് പ്രസന്റേഷന് കൂട്ടിച്ചേര്ത്തു. ഗ്രൂപ്പുകള്ക്ക് ഇപ്പോള് വലിയ പ്രസക്തിയില്ലെന്നും, വലിയ വിജയം നേടിയ സാഹചര്യത്തില് എല്ലാവരും ഒരുമിച്ച് നില്ക്കണമെന്നും അദ്ദേഹം പറഞ്ഞു
