ന്യൂഡല്ഹി ന്മ പശ്ചിമ ബംഗാളിലെ വോട്ടര് പട്ടിക തീവ്രപുനഃപരിശോധന (SIR) നടത്തുന്നതിന് തെരഞ്ഞെടുപ്പ് കമ്മീഷനെ സഹായിക്കാന് ജുഡീഷ്യല് ഉദ്യോഗസ്ഥരെ വിന്യസിക്കണമെന്ന് സുപ്രീംകോടതി ഉത്തരവിട്ടു. വോട്ടര് പട്ടികയിലെ അവകാശവാദങ്ങളും എതിര്പ്പുകളും തീര്പ്പാക്കുന്നതിന് നിലവിലുള്ളതും വിരമിച്ചതുമായ ജില്ലാ ജഡ്ജിമാരെ നിയോഗിക്കാനാണ് നിര്ദേശം.
ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മല്യ ബാഗ്ചി, വിപുല് എം. പഞ്ചോളി എന്നിവരടങ്ങിയ ബെഞ്ചാണ് ഉത്തരവ് പുറപ്പെടുവിച്ചത്. ജുഡീഷ്യല് ഓഫീസര്മാരെ വിട്ടുനല്കാന് കല്ക്കട്ട ഹൈക്കോടതി ചീഫ് ജസ്റ്റിസിനോട് കോടതി ആവശ്യപ്പെട്ടു. ഇവര്ക്ക് ആവശ്യമായ സുരക്ഷയും ലോജിസ്റ്റിക്കല് പിന്തുണയും ജില്ലാ കലക്ടര്മാരും എസ്പിമാരും നല്കണമെന്നും നിര്ദ്ദേശിച്ചു.
ജുഡീഷ്യല് ഓഫീസര്മാര് പുറപ്പെടുവിക്കുന്ന ഉത്തരവുകള് കോടതി ഉത്തരവുകളായി തന്നെ പരിഗണിക്കപ്പെടും. ഇവരെ സഹായിക്കാന് മൈക്രോ ഒബ്സര്വര്മാരെയും സംസ്ഥാന സര്ക്കാര് ഉദ്യോഗസ്ഥരെയും നിയോഗിക്കും. ഫെബ്രുവരി 28നകം കരട് വോട്ടര് പട്ടിക പ്രസിദ്ധീകരിക്കാന് തെരഞ്ഞെടുപ്പ് കമ്മീഷന് അനുമതി നല്കിയിട്ടുണ്ട്. തുടര്ന്ന് ആവശ്യമായ സപ്ലിമെന്ററി പട്ടികകളും നല്കാന് കമ്മീഷന് അധികാരമുണ്ടാകും.
2002-ലെ വോട്ടര് പട്ടികയുമായി താരതമ്യം ചെയ്യുമ്പോള് മാതാപിതാക്കളുടെ പേരിലെ വ്യത്യാസങ്ങള്, വോട്ടറും രക്ഷിതാവും തമ്മിലുള്ള പ്രായവ്യത്യാസം 15 വയസ്സില് കുറവോ 50 വയസ്സില് കൂടുതലോ ആയിരിക്കുന്നത് തുടങ്ങിയ പൊരുത്തക്കേടുകളാണ് പ്രധാനമായും പരിശോധിക്കുന്നത്. ചീഫ് സെക്രട്ടറി, ഡിജിപി, തെരഞ്ഞെടുപ്പ് കമ്മീഷന് ഉദ്യോഗസ്ഥര് എന്നിവരെ ഉള്പ്പെടുത്തി ശനിയാഴ്ചയ്ക്കകം യോഗം ചേരാന് കല്ക്കട്ട ഹൈക്കോടതി ചീഫ് ജസ്റ്റിസിനോട് സുപ്രീംകോടതി നിര്ദ്ദേശിച്ചു
