ചെന്നൈ: തമിഴ്നാട് മുഖ്യമന്ത്രിയായി Vijay അധികാരമേല്‍ക്കുന്ന ചടങ്ങില്‍ ദേശീയഗാനത്തിന് മുന്‍പായി വന്ദേമാതരം ആലപിച്ചത് രാഷ്ട്രീയ വിവാദങ്ങള്‍ക്ക് വഴിവെച്ചു. കേന്ദ്ര ആഭ്യന്തര മന്ത്രാലയം ജനുവരിയില്‍ പുറത്തിറക്കിയ ഉത്തരവനുസരിച്ച് ദേശീയഗാനത്തോടൊപ്പം വന്ദേമാതരവും ഉള്‍പ്പെടുത്തിയതോടെയാണ് ചടങ്ങ് ശ്രദ്ധേയമായത്. വന്ദേമാതരത്തിന്റെ ആറു ഖണ്ഡികകളും ആലപിച്ച ശേഷമാണ് ദേശീയഗാനവും തുടര്‍ന്ന് തമിഴ് തായ് വാഴ്ത്തുപാട്ടും വേദിയില്‍ അവതരിപ്പിച്ചത്. ഇതോടെ തമിഴ്നാട്ടിലെ പതിവ് സര്‍ക്കാര്‍ ചടങ്ങുകളുടെ പ്രോട്ടോക്കോള്‍ ലംഘിച്ചുവെന്ന വിമര്‍ശനവും ഉയര്‍ന്നു. അതേസമയം, ശനിയാഴ്ച പശ്ചിമബംഗാളില്‍ നടന്ന ബിജെപി നേതാവും മുഖ്യമന്ത്രിയുമായ Suvendu Adhikariയുടെ സത്യപ്രതിജ്ഞാ ചടങ്ങില്‍ വന്ദേമാതരം ആലപിച്ചിരുന്നില്ല. പ്രധാനമന്ത്രി Narendra Modi ഉള്‍പ്പെടെ മുതിര്‍ന്ന ബിജെപി നേതാക്കള്‍ പങ്കെടുത്ത ചടങ്ങില്‍ വന്ദേമാതരം ഒഴിവാക്കിയപ്പോള്‍, ബിജെപിയുടെ ശക്തമായ വിമര്‍ശകനായി അറിയപ്പെട്ടിരുന്ന വിജയ് അതിന് തയ്യാറായതും രാഷ്ട്രീയ ചര്‍ച്ചകള്‍ക്ക് വഴിവെച്ചു.

കേന്ദ്രത്തിന്റെ ഉത്തരവിനെ നേരത്തെ ശക്തമായി എതിര്‍ത്തിരുന്ന Rahul Gandhi ഉള്‍പ്പെടെ കോണ്‍ഗ്രസ് നേതാക്കള്‍ പങ്കെടുത്ത ചടങ്ങിലായിരുന്നു വന്ദേമാതരം പൂര്‍ണരൂപത്തില്‍ ആലപിച്ചത്. ഇതോടെ തെരഞ്ഞെടുപ്പിന് മുമ്പ് ഉയര്‍ത്തിക്കാട്ടിയ ബിജെപി വിരുദ്ധ നിലപാടില്‍ നിന്ന് വിജയ് പിന്മാറുകയാണോ എന്ന വിമര്‍ശനവുമായി രാഷ്ട്രീയ നിരീക്ഷകര്‍ രംഗത്തെത്തി. സിനിമയിലൂടെയും രാഷ്ട്രീയ പ്രഖ്യാപനങ്ങളിലൂടെയും ഡിഎംകെയ്ക്കും ബിജെപിക്കുമെതിരെ ശക്തമായ നിലപാടുകളായിരുന്നു വിജയ് മുന്‍പ് സ്വീകരിച്ചിരുന്നത്. ഇതിനിടെ, ചടങ്ങില്‍ തമിഴ് തായ് വാഴ്ത്ത് മൂന്നാമതായി ആലപിച്ചത് പ്രോട്ടോക്കോള്‍ ലംഘനമാണെന്ന് ചൂണ്ടിക്കാട്ടി സിപിഐ സംസ്ഥാന സെക്രട്ടറി M Veerapandian വിമര്‍ശനം ഉന്നയിച്ചു. തമിഴ്നാട്ടിലെ സര്‍ക്കാര്‍ ചടങ്ങുകള്‍ സാധാരണയായി തമിഴ് തായ് വാഴ്‌ത്തോടെ ആരംഭിക്കുകയും ദേശീയഗാനത്തോടെ അവസാനിക്കുകയുമാണ് പതിവെന്ന് അദ്ദേഹം ചൂണ്ടിക്കാട്ടി. രാജ്ഭവന്റെ നിര്‍ദ്ദേശപ്രകാരമാണ് ചടങ്ങില്‍ മാറ്റം വരുത്തിയതെന്ന ആരോപണവും അദ്ദേഹം ഉയര്‍ത്തി.

''വന്ദേമാതരത്തിന് പ്രഥമസ്ഥാനം നല്‍കി തമിഴ് പ്രാര്‍ത്ഥനാ ഗീതത്തെ മൂന്നാം സ്ഥാനത്തേക്ക് തള്ളിയത് തമിഴ് പാരമ്പര്യത്തോടുള്ള അവഹേളനമാണ്. ഇതിന് ഉത്തരവാദികളായവര്‍ വിശദീകരണം നല്‍കണം,'' എന്നായിരുന്നു എം. വീരപാണ്ഡ്യന്റെ പ്രതികരണം. Bankim Chandra Chattopadhyay രചിച്ച വന്ദേമാതരത്തിന്റെ 150-ാം വാര്‍ഷികത്തോടനുബന്ധിച്ചാണ് കേന്ദ്രം പുതിയ ഉത്തരവ് പുറത്തിറക്കിയത്. 1971 ലെ ദേശീയ ബഹുമതികളെ സംരക്ഷിക്കുന്ന നിയമപ്രകാരം ദേശീയഗാനത്തിനുള്ളതുപോലുള്ള പരിരക്ഷ വന്ദേമാതരത്തിനും നല്‍കുന്ന രീതിയിലാണ് പുതിയ നിര്‍ദ്ദേശം. 1950-ല്‍ ഭരണഘടനാ അസംബ്ലി അംഗീകരിച്ച രണ്ട് ഖണ്ഡികകളുടെ പതിവില്‍ നിന്ന് മാറി ആറു ഖണ്ഡികകളും ആലപിക്കണമെന്നതാണ് പുതിയ നിര്‍ദേശം.