തിരുവനന്തപുരം: ആര്എസ്എസ് സര്സംഘചാലക് മോഹന് ഭാഗവത് പങ്കെടുത്ത പ്രഭാഷണ പരിപാടിയില് കേരളത്തിലെ മൂന്ന് സര്വകലാശാലകളിലെ വൈസ് ചാന്സലര്മാര് പങ്കെടുത്തത് രാഷ്ട്രീയ വിവാദമാകുന്നു. ആര്എസ്എസിന്റെ നൂറാം വാര്ഷികാഘോഷങ്ങളുമായി ബന്ധപ്പെട്ട പരിപാടിയിലാണ് വി.സിമാര് പങ്കെടുത്തതെന്ന വിവരമാണ് പുറത്തുവന്നത്. ആരോഗ്യ സര്വകലാശാല വൈസ് ചാന്സലര് ഡോ. മോഹന് കുന്നുമ്മല്, മഹാത്മാ ഗാന്ധി സര്വകലാശാല വൈസ് ചാന്സലര് ഡോ. ഡി. മാവൂത്ത്, മലയാളം സര്വകലാശാല വൈസ് ചാന്സലറുടെ ചുമതല വഹിക്കുന്ന ഡോ. സി.ആര്. പ്രസാദ് എന്നിവരാണ് പരിപാടിയില് പങ്കെടുത്തതെന്നാണ് റിപ്പോര്ട്ട്. ഇവര് സംഘാടകരുടെ ഭാഗമായി പരിപാടിയില് പങ്കെടുത്തുവെന്ന ആരോപണമാണ് വിവാദത്തിന് വഴിവെച്ചിരിക്കുന്നത്.
സംഭവത്തില് ഇടതുപക്ഷം ശക്തമായ വിമര്ശനവുമായി രംഗത്തെത്തി. സര്വകലാശാലകളുടെ തലപ്പത്തുള്ളവര് സംഘപരിവാര് വേദിയില് എത്തിയത് അതീവ ഗൗരവതരമാണെന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദന് പ്രതികരിച്ചു. ഉന്നത വിദ്യാഭ്യാസ മേഖലയിലെ കാവിവല്ക്കരണത്തിന്റെ തെളിവാണ് ഇതെന്നും, മതനിരപേക്ഷ മൂല്യങ്ങളെ ദുര്ബലപ്പെടുത്തുന്ന നീക്കമാണെന്നും അദ്ദേഹം ആരോപിച്ചു. ഡോ. ഡി. മാവൂത്ത് ബിജെപി അധ്യാപക സംഘടനയുമായി ബന്ധപ്പെട്ട വ്യക്തിയാണെന്നും, ഡോ. സി.ആര്. പ്രസാദ് നേരത്തെ ഇടതുപക്ഷ അധ്യാപക സംഘടനകളുമായി ബന്ധപ്പെട്ടിരുന്നെങ്കിലും പിന്നീട് ബിജെപി അനുകൂല നിലപാടിലേക്ക് മാറിയെന്നുമുള്ള ആരോപണങ്ങളും രാഷ്ട്രീയ ചര്ച്ചയ്ക്ക് ശക്തി പകര്ന്നിട്ടുണ്ട്. മെയ് 31ന് സര്വീസില് നിന്ന് വിരമിച്ച ശേഷവും ഡോ. സി.ആര്. പ്രസാദിനെ മലയാളം സര്വകലാശാലയില് ചുമതലയില് തുടരാന് അനുവദിച്ചതും വിമര്ശനത്തിന് ഇടയായിട്ടുണ്ട്.
ഉന്നത വിദ്യാഭ്യാസ സ്ഥാപനങ്ങളുടെ സ്വതന്ത്രവും മതനിരപേക്ഷവുമായ സ്വഭാവം സംരക്ഷിക്കപ്പെടേണ്ടതുണ്ടെന്ന് എം.വി. ഗോവിന്ദന് പറഞ്ഞു. സര്വകലാശാലാ പദവികളില് ഇരിക്കുന്നവര് രാഷ്ട്രീയ-സാംസ്കാരിക സംഘടനകളുടെ പരിപാടികളില് സംഘാടകരുടെ രീതിയില് ഇടപെടുന്നത് അക്കാദമിക് സ്ഥാപനങ്ങളുടെ വിശ്വാസ്യതയെ ബാധിക്കുമെന്നാണ് ഇടതുപക്ഷത്തിന്റെ നിലപാട്. ഈ വിഷയത്തില് ഉന്നത വിദ്യാഭ്യാസ മന്ത്രി വ്യക്തമായ മറുപടി പറയണമെന്നും, സര്വകലാശാലകളിലെ മതനിരപേക്ഷ ഉള്ളടക്കം സംരക്ഷിക്കാന് സര്ക്കാര് ഇടപെടണമെന്നും സി.പി.എം ആവശ്യപ്പെട്ടു. ഇത്തരം നീക്കങ്ങളെ ജനാധിപത്യപരമായും മതനിരപേക്ഷമായും പ്രതിരോധിക്കണമെന്നും എം.വി. ഗോവിന്ദന് വ്യക്തമാക്കി. അതേസമയം, പരിപാടിയില് പങ്കെടുത്ത വി.സിമാരുടെ ഭാഗത്തുനിന്നോ ഉന്നത വിദ്യാഭ്യാസ വകുപ്പിന്റെ ഭാഗത്തുനിന്നോ വിശദമായ പ്രതികരണം പുറത്തുവരാനുണ്ട്. വിവാദം ശക്തമാകുന്ന സാഹചര്യത്തില്, സര്വകലാശാലാ ഭരണപദവികളിലുള്ളവര് പൊതുപരിപാടികളില് പങ്കെടുക്കുമ്പോള് പാലിക്കേണ്ട നൈതികതയും സ്ഥാപനപരമായ അകലം പാലിക്കലും വീണ്ടും ചര്ച്ചയാകുകയാണ്.
