വാഷിങ്ടന്/ടെഹ്റാന്: പശ്ചിമേഷ്യയില് സംഘര്ഷം വീണ്ടും രൂക്ഷമാകുന്നതിനിടെ ഇറാനെതിരെ അമേരിക്ക പുതിയ വ്യോമാക്രമണം നടത്തിയതായി റിപ്പോര്ട്ട്. ഹോര്മുസ് കടലിടുക്കിന് സമീപം സഞ്ചരിച്ചിരുന്ന എണ്ണക്കപ്പലിന് നേരെയുണ്ടായ ഡ്രോണ് ആക്രമണത്തിന് പിന്നാലെയാണ് യുഎസ് സൈനിക നടപടി. ഇറാന് വെടിനിര്ത്തല് ധാരണ ലംഘിച്ചുവെന്നും വാണിജ്യ കപ്പല് ഗതാഗതത്തെ വീണ്ടും ലക്ഷ്യമിട്ടുവെന്നുമാണ് അമേരിക്കന് പ്രതിരോധ വൃത്തങ്ങളുടെ ആരോപണം. ഇതിന് മറുപടിയായി ഇറാനിലെ മിസൈല്-ഡ്രോണ് സംഭരണ കേന്ദ്രങ്ങള്, തീരദേശ റഡാര് സംവിധാനങ്ങള്, സൈനിക നിരീക്ഷണ അടിസ്ഥാന സൗകര്യങ്ങള് എന്നിവ ലക്ഷ്യമിട്ട് വ്യോമാക്രമണം നടത്തിയതായാണ് റിപ്പോര്ട്ട്.
സംഭവത്തിന് പിന്നാലെ യുഎസ് പ്രസിഡന്റ് ഡോണള്ഡ് ട്രംപ് ഇറാനെതിരെ കടുത്ത മുന്നറിയിപ്പ് നല്കി. ഇറാന് ആക്രമണ നീക്കങ്ങള് തുടരുകയാണെങ്കില് കൂടുതല് ശക്തമായ സൈനിക നടപടിയിലേക്ക് അമേരിക്ക നീങ്ങേണ്ടിവരുമെന്നായിരുന്നു ട്രംപിന്റെ നിലപാട്. വെടിനിര്ത്തല് പാലിക്കാന് നല്കിയ അവസരം ഇറാന് ഉപയോഗപ്പെടുത്തിയില്ലെന്നും അമേരിക്കന് വൃത്തങ്ങള് ആരോപിക്കുന്നു. യുഎസ് ആക്രമണങ്ങള്ക്ക് പിന്നാലെ ബഹ്റൈനിലും കുവൈത്തിലും യുഎസ് സൈനിക സാന്നിധ്യമുള്ള കേന്ദ്രങ്ങളെ ലക്ഷ്യമിട്ട് ഇറാന് ഡ്രോണ്, മിസൈല് ആക്രമണങ്ങള് നടത്തിയതായി അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്തു. ചില ആക്രമണങ്ങള് പ്രതിരോധ സംവിധാനങ്ങള് തടഞ്ഞതായും ചില സ്ഥലങ്ങളില് ജാഗ്രതാ മുന്നറിയിപ്പുകള് നല്കിയതായും റിപ്പോര്ട്ടുകളുണ്ട്.
ഇറാന്റെ റവല്യൂഷനറി ഗാര്ഡ് യുഎസ് സൈനിക കേന്ദ്രങ്ങള്ക്കെതിരെ കൂടുതല് നടപടികള് ഉണ്ടാകുമെന്ന് മുന്നറിയിപ്പ് നല്കിയിട്ടുണ്ട്. അതേസമയം, ഇറാനെതിരായ യുഎസ് ആക്രമണങ്ങള് അന്താരാഷ്ട്ര നിയമലംഘനമാണെന്നാണ് ടെഹ്റാന്റെ പ്രതികരണം. മേഖലയിലെ യുഎസ് സാന്നിധ്യം തന്നെ സംഘര്ഷത്തിന് കാരണമാകുന്നതാണെന്നും ഇറാന് ആരോപിക്കുന്നു. അമേരിക്കയും ഇറാനും തമ്മില് അടുത്തിടെ രൂപപ്പെട്ടിരുന്ന താത്കാലിക ധാരണയ്ക്ക് പുതിയ സംഭവവികാസങ്ങള് വലിയ തിരിച്ചടിയായിരിക്കുകയാണ്. ഹോര്മുസ് കടലിടുക്കിലൂടെയുള്ള എണ്ണക്കപ്പല് ഗതാഗതം, യുഎസ് സൈനിക സാന്നിധ്യം, ഇറാന്റെ പ്രാദേശിക സ്വാധീനം എന്നിവയാണ് സംഘര്ഷത്തിന്റെ പ്രധാന കേന്ദ്രങ്ങള്. സമാധാന ചര്ച്ചകള് മുന്നോട്ടുകൊണ്ടുപോകാനുള്ള ശ്രമങ്ങള് തുടരുന്നുണ്ടെങ്കിലും തുടര്ച്ചയായ ആക്രമണങ്ങളും തിരിച്ചാക്രമണങ്ങളും മേഖലയുടെ സുരക്ഷാ സാഹചര്യം കൂടുതല് അനിശ്ചിതത്വത്തിലാക്കുകയാണ്. വരും ദിവസങ്ങളിലെ അമേരിക്കയുടെയും ഇറാന്റെയും നീക്കങ്ങളാകും സംഘര്ഷം നിയന്ത്രണവിധേയമാകുമോ, അതോ കൂടുതല് വ്യാപിക്കുമോ എന്ന് നിര്ണയിക്കുക.
