പത്തനംതിട്ട: ശബരിമല തന്ത്രി സ്ഥാനത്തുനിന്ന് തന്നെ ഒഴിവാക്കണമെന്നാവശ്യപ്പെട്ട് കണ്ഠരര് രാജീവര് തിരുവിതാംകൂര് ദേവസ്വം ബോര്ഡിന് കത്ത് നല്കി. ആരോഗ്യപ്രശ്നങ്ങള് ചൂണ്ടിക്കാട്ടിയാണ് സ്ഥാനമൊഴിയാനുള്ള സന്നദ്ധത അറിയിച്ചത്. പകരം മകന് കണ്ഠരര് ബ്രഹ്മദത്തനെ താന്ത്രിക ചുമതല ഏല്പ്പിക്കണമെന്നാണ് കത്തിലെ ആവശ്യം. വരാനിരിക്കുന്ന മണ്ഡല-മകരവിളക്ക് തീര്ഥാടനകാലത്ത് ഊഴമനുസരിച്ച് കണ്ഠരര് രാജീവരാണ് ശബരിമലയില് താന്ത്രിക ചടങ്ങുകള്ക്ക് നേതൃത്വം നല്കേണ്ടിയിരുന്നത്. തന്ത്രി സ്ഥാനത്തിനു പുറമേ മേല്ശാന്തി തിരഞ്ഞെടുപ്പിനുള്ള അഭിമുഖ ബോര്ഡില്നിന്നും തന്നെ ഒഴിവാക്കണമെന്നും കത്തില് ആവശ്യപ്പെട്ടതായാണ് റിപ്പോര്ട്ട്. കത്തില് തിരുവിതാംകൂര് ദേവസ്വം ബോര്ഡ് ഇതുവരെ അന്തിമതീരുമാനം എടുത്തിട്ടില്ല. ശബരിമല സ്വര്ണക്കൊള്ളക്കേസില് കണ്ഠരര് രാജീവര് പ്രതിയായിരുന്നതിനാല് നിയമപരമായ വശങ്ങള് പരിശോധിച്ചശേഷവും കേരള ഹൈക്കോടതിയുടെ അഭിപ്രായം തേടിയശേഷവും മാത്രമായിരിക്കും തീരുമാനമെന്നാണ് സൂചന.
സ്വര്ണക്കൊള്ളക്കേസില് അറസ്റ്റിലായിരുന്നു
ശബരിമല ക്ഷേത്രത്തിലെ സ്വര്ണം പൊതിഞ്ഞ ദ്വാരപാലക ശില്പങ്ങളുമായും ശ്രീകോവിലിന്റെ കട്ടിളപ്പടിയുമായും ബന്ധപ്പെട്ട ക്രമക്കേടുകള് അന്വേഷിക്കുന്ന പ്രത്യേക അന്വേഷണ സംഘം കണ്ഠരര് രാജീവരെ 2026 ജനുവരിയില് അറസ്റ്റ് ചെയ്തിരുന്നു. കേസിലെ മുഖ്യപ്രതിയെന്ന് അന്വേഷണസംഘം ആരോപിക്കുന്ന ഉണ്ണികൃഷ്ണന് പോറ്റിയുമായുള്ള ബന്ധവും ക്ഷേത്രവസ്തുക്കള് അറ്റകുറ്റപ്പണിക്കായി പുറത്തേക്ക് കൊണ്ടുപോകുന്നതിന് നല്കിയ അനുമതിയുമാണ് അന്വേഷണവിധേയമായത്.
ഉണ്ണികൃഷ്ണന് പോറ്റിക്ക് ശബരിമലയിലെ പ്രവര്ത്തനങ്ങളില് സ്വാധീനം ലഭിക്കാന് രാജീവര് സഹായിച്ചെന്നും അറ്റകുറ്റപ്പണിയുടെ പേരില് ക്ഷേത്രത്തിലെ സ്വര്ണം പൊതിഞ്ഞ വസ്തുക്കള് പുറത്തേക്ക് കൊണ്ടുപോകുന്നതിന് അനുകൂല നിലപാട് സ്വീകരിച്ചെന്നുമാണ് അന്വേഷണസംഘത്തിന്റെ ആരോപണം. ക്ഷേത്രത്തിലെ ചില ജീവനക്കാരുടെ മൊഴികളും രേഖകളും ഇതിന് തെളിവായി അന്വേഷണസംഘം കോടതിയില് ചൂണ്ടിക്കാട്ടിയിരുന്നു. എന്നാല് ആരോപണങ്ങളില് അന്തിമമായ കോടതി വിധി വന്നിട്ടില്ല.
ഫെബ്രുവരിയില് കൊല്ലം വിജിലന്സ് കോടതി കണ്ഠരര് രാജീവര്ക്ക് ജാമ്യം അനുവദിച്ചിരുന്നു. ജാമ്യം റദ്ദാക്കണമെന്ന സംസ്ഥാന സര്ക്കാരിന്റെ ആവശ്യം പിന്നീട് പരിഗണിച്ച കേരള ഹൈക്കോടതി, ജാമ്യം റദ്ദാക്കാന് താല്പര്യമില്ലെന്ന് മേയില് വ്യക്തമാക്കിയിരുന്നു. കണ്ഠരര് ബ്രഹ്മദത്തന് താന്ത്രിക പഠനം പൂര്ത്തിയാക്കി നേരത്തേ പിതാവിനെ ചടങ്ങുകളില് സഹായിച്ചിട്ടുണ്ട്. 2024-25 തീര്ഥാടനകാലത്ത് അദ്ദേഹം ശബരിമലയില് താന്ത്രിക ചുമതല നിര്വഹിച്ചതായും റിപ്പോര്ട്ടുകളുണ്ട്. രാജീവരുടെ അപേക്ഷ അംഗീകരിക്കണമോ, ബ്രഹ്മദത്തനെ സ്ഥിരമായി ചുമതലപ്പെടുത്തണമോ എന്ന കാര്യത്തില് ദേവസ്വം ബോര്ഡ് നിയമോപദേശം തേടിയശേഷം തീരുമാനമെടുക്കും.
