തിരുവനന്തപുരം ന്മ ഹിന്ദു ഐക്യവേദി നേതാക്കള്ക്ക് ഔദ്യോഗിക വസതിയില് കൂടിക്കാഴ്ചയ്ക്ക് അനുമതി നല്കിയ മുഖ്യമന്ത്രി വി.ഡി. സതീശന്റെ നടപടിയെച്ചൊല്ലിയുള്ള രാഷ്ട്രീയ വിവാദം മുറുകുന്നു. കൂടിക്കാഴ്ചയ്ക്കുള്ള എന്എസ്എസിന്റെ അഭ്യര്ഥന രണ്ടുതവണ നിരസിച്ച മുഖ്യമന്ത്രി ഇപ്പോള് സ്വീകരിച്ച നിലപാട് ശരിയാണോയെന്ന് പൊതുജനം വിലയിരുത്തട്ടെയെന്ന് നായര് സര്വീസ് സൊസൈറ്റി ജനറല് സെക്രട്ടറി ജി. സുകുമാരന് നായര് പ്രതികരിച്ചു. മുഖ്യമന്ത്രിയുടെ നടപടി മര്യാദകേടാണോയെന്ന് ജനങ്ങള് തീരുമാനിക്കട്ടെയെന്നും അദ്ദേഹം പറഞ്ഞു. വി.ഡി. സതീശനാണ് നിലവിലെ കേരള മുഖ്യമന്ത്രി. മുഖ്യമന്ത്രിയെ കാണാന് രണ്ടുതവണ സമയം തേടിയെങ്കിലും അനുമതി ലഭിച്ചില്ലെന്ന് ജൂണ് 20-ന് സുകുമാരന് നായര് ആരോപിച്ചിരുന്നു. ഇതിനുപിന്നാലെ വെള്ളിയാഴ്ച മുഖ്യമന്ത്രി തന്റെ ഓഫീസില് ഹിന്ദു ഐക്യവേദി നേതാക്കളെ കാണുകയും നിവേദനം സ്വീകരിക്കുകയും ചെയ്തു. കൂടിക്കാഴ്ചയുടെ വിവരങ്ങളും ചിത്രങ്ങളും ഹിന്ദു ഐക്യവേദി സമൂഹമാധ്യമങ്ങളിലൂടെ പങ്കുവെച്ചതോടെയാണ് വിഷയം വീണ്ടും ചര്ച്ചയായത്.
മുഖ്യമന്ത്രിയെ കാണാന് എന്എസ്എസിന് ഇനി താത്പര്യമില്ലെന്നും സുകുമാരന് നായര് വ്യക്തമാക്കി. മറ്റുള്ളവര്ക്ക് കൂടിക്കാഴ്ചയ്ക്ക് സമയം നല്കുന്ന മുഖ്യമന്ത്രി തങ്ങളുടെ അഭ്യര്ഥന അനുവദിച്ചില്ലെന്നും അദ്ദേഹം പറഞ്ഞു. മുഖ്യമന്ത്രിയെ കാണാന് ശ്രമിച്ച ആവശ്യത്തിന് പരിഹാരം കണ്ടെത്താന് മറ്റു മാര്ഗങ്ങളുണ്ടെന്നും അതിലൂടെ ലക്ഷ്യം നേടിയെടുക്കുമെന്നും സുകുമാരന് നായര് വ്യക്തമാക്കി. അതേസമയം, ജൂണില് നടന്ന ഹിന്ദു നേതൃസമ്മേളനത്തില് അംഗീകരിച്ച നിവേദനം സമര്പ്പിക്കാനാണ് മുഖ്യമന്ത്രിയെ കണ്ടതെന്ന് ഹിന്ദു ഐക്യവേദി നേതാവ് ആര്.വി. ബാബു പറഞ്ഞു. രണ്ടുതവണ സമീപിച്ചശേഷമാണ് കൂടിക്കാഴ്ചയ്ക്ക് അനുമതി ലഭിച്ചതെന്നും സൗഹാര്ദപരമായ അന്തരീക്ഷത്തിലാണ് ചര്ച്ച നടന്നതെന്നും അദ്ദേഹം വ്യക്തമാക്കി. നിയമസഭാ തിരഞ്ഞെടുപ്പിനു മുമ്പ് താനും സതീശനും തമ്മിലുണ്ടായ ആരോപണ-പ്രത്യാരോപണങ്ങള് രാഷ്ട്രീയത്തിന്റെ ഭാഗമായിരുന്നുവെന്നും ബാബു പറഞ്ഞു. പിണറായി വിജയന് മുഖ്യമന്ത്രിയായിരുന്ന 2016-ലും ഹിന്ദു ഐക്യവേദി നേതാക്കള് അദ്ദേഹത്തെ കണ്ടിരുന്നുവെന്നും അന്ന് വിമര്ശനം ഉന്നയിക്കാത്തവര് ഇപ്പോള് എന്തുകൊണ്ടാണ് എതിര്പ്പുമായി രംഗത്തെത്തുന്നതെന്നും ബാബു സമൂഹമാധ്യമത്തില് ചോദിച്ചു. ആര്എസ്എസ് സൈദ്ധാന്തികന് എം.എസ്. ഗോള്വാള്ക്കറുടെ ചിത്രത്തിനു മുന്നില് സതീശന് നിലവിളക്ക് കൊളുത്തുന്ന പഴയ ചിത്രം പുറത്തുവിട്ടതും ആര്.വി. ബാബുവായിരുന്നു.
ഹിന്ദു ഐക്യവേദി നേതാക്കളുമായുള്ള മുഖ്യമന്ത്രിയുടെ കൂടിക്കാഴ്ച കോണ്ഗ്രസിലെയും യുഡിഎഫിലെയും ചില വിഭാഗങ്ങളില് അസ്വസ്ഥത സൃഷ്ടിച്ചതായാണ് റിപ്പോര്ട്ട്. എല്ലാ സമുദായ-സാമൂഹിക സംഘടനകളോടും കൂടിക്കാഴ്ച അനുവദിക്കുന്നതില് ഒരേ മാനദണ്ഡം പുലര്ത്തണമെന്ന് രണ്ട് മുന് കെപിസിസി പ്രസിഡന്റുമാര് ആവശ്യപ്പെട്ടതായി ഒരു പ്രമുഖ ദിനപത്രം റിപ്പോര്ട്ട് ചെയ്തു. വ്യത്യസ്ത സംഘടനകളോട് വ്യത്യസ്ത നിലപാടുകള് സ്വീകരിക്കുന്നത് മതസൗഹാര്ദം ഉയര്ത്തിപ്പിടിക്കുന്ന സംഘടനകളെ സര്ക്കാരില്നിന്നും യുഡിഎഫില്നിന്നും അകറ്റിയേക്കുമെന്നാണ് മുതിര്ന്ന നേതാക്കളുടെ ആശങ്ക. മുഖ്യമന്ത്രി പദവിയിലെത്തിയ ശേഷവും എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശനെതിരെ വി.ഡി. സതീശന് തുടരുന്ന കര്ശന നിലപാടിനെയും കോണ്ഗ്രസിലെ ചില നേതാക്കള് ചോദ്യം ചെയ്യുന്നതായാണ് റിപ്പോര്ട്ട്. ഹിന്ദു ഐക്യവേദി നേതാക്കളുമായി കൂടിക്കാഴ്ച നടത്താമെങ്കില് മറ്റു സമുദായ സംഘടനകളുടെ പ്രതിനിധികളെയും കാണാന് മുഖ്യമന്ത്രി തയ്യാറാകണമെന്നാണ് അവരുടെ നിലപാട്.
