കേരളം ലോട്ടറി തട്ടിപ്പുകളുടെ (Lottery fraud) വലയില് കുടുങ്ങിക്കിടക്കുന്നു, ഈ തട്ടിപ്പുകളില് പലതും പൊതുജനങ്ങളുടെ അറിവില്ലായ്മ മൂലമാണ് സംഭവിക്കുന്നത്. ആളുകളെ കബളിപ്പിച്ച് പണം തട്ടുന്നതിനായി ഇത്തരം ലോട്ടറികളെ പ്രോത്സാഹിപ്പിക്കുന്നതിനായി സോഷ്യല് മീഡിയ സ്വാധീനമുള്ളവരെ ഉപയോഗിക്കുകയും, ജീവകാരുണ്യ പ്രവര്ത്തനങ്ങളാണെന്ന് തെറ്റിദ്ധരിപ്പിക്കുകയും ചെയ്തുകൊണ്ടാണിത് ഈ തട്ടിപ്പ് നടത്തുന്നത്. അടുത്തിടെ നടന്ന ഒരു സംഭവം വ്യാപകമായ വിമര്ശനത്തിന് ഇടയാക്കിതോടെയാണ് വിഷയം പൊതുചര്ച്ചയായി ഉയര്ന്നു വന്നത്. മാര്ച്ചില്, പാണ്ടിക്കാട് കുഞ്ഞന് എന്ന യൂട്യൂബര് തന്റെ സോഷ്യല് മീഡിയ വീഡിയോകളിലൊന്നില് കൂര്ഗില് നിന്നുള്ള ഒരു മലയാളി കുടുംബത്തെ പരിചയപ്പെടുത്തി. സാമ്പത്തിക ബാധ്യതകള് തീര്ക്കാന് നാസര് എന്ന വ്യക്തി വീട് ഉള്പ്പെടെയുള്ള കുടുംബത്തിന്റെ സ്വത്തുക്കള് വില്ക്കാന് നിര്ബന്ധിതനായതായി ആ വീഡിയോ അവകാശപ്പെട്ടു. പൊതുജനങ്ങള്ക്ക് ലോട്ടറി കൂപ്പണുകള് വാങ്ങി വീട് നേടാനും കുടുംബത്തെ പ്രതിസന്ധിയില് നിന്ന് രക്ഷിക്കാനുമുള്ള അവസരം വാഗ്ദാനം ചെയ്തു. മാരുതി ജിംനിയും റോയല് എന്ഫീല്ഡ് ബുള്ളറ്റും സമ്മാന പട്ടികയില് ഉള്പ്പെടുത്തിയിരുന്നു.
എന്നാല്, മെയ് അവസാനം നടന്ന ലോട്ടറി നറുക്കെടുപ്പില് തട്ടിപ്പ് നടന്നതായി ആരോപണങ്ങള് ഉയര്ന്നതോടെ ഇതിലെ ഉളളുകള്ളികള് പുറത്തുവരുകയായിരുന്നു. സുപ്രീം കോടതി അഭിഭാഷകന് ശ്രീജിത്ത് പെരുമന, ലോട്ടറി ഡയറക്ടറേറ്റിനും സംസ്ഥാന പൊലീസ് മേധാവിക്കും ഈ സംഭവത്തില് പരാതി നല്കി. സമാനമായ പരാതികളുമായി ഇതിനകം നൂറിലധികം ഇരകള് തന്നെ സമീപിച്ചിട്ടുണ്ടെന്നും. ഗള്ഫിലുള്ള മലയാളികളാണ് ഈ തട്ടിപ്പിന് പിന്നിലെ പ്രധാന ലക്ഷ്യമെന്നും ശ്രീജിത്ത് പറഞ്ഞു.
'ഇതൊരു ഒറ്റപ്പെട്ട സംഭവമല്ല. നിരവധി പ്രമുഖ വ്ളോഗര്മാര് ഇത്തരം വീഡിയോകള്ക്ക് പിന്തുണ നല്കിയിട്ടുണ്ട്. എനിക്ക് ലഭിച്ച വിവരങ്ങളില് നിന്ന്, വീട്ടുടമസ്ഥരെയും യൂട്യൂബര്മാരെയും ബന്ധിപ്പിക്കുന്ന മാഫിയ പോലുള്ള എന്തോ അവിശുദ്ധ ബന്ധം ഉണ്ടെന്ന് തോന്നുന്നു. ഈ വീഡിയോകള്ക്ക് വലിയ പ്രചാരം ലഭിക്കുന്നു. ചില ആളുകള് ഒരു ചാരിറ്റിയെ പിന്തുണയ്ക്കുന്നുണ്ടെന്ന് വിശ്വസിച്ച് ടിക്കറ്റുകള് വാങ്ങുമ്പോള്, പല ഗള്ഫ് മലയാളികളും ഇതിനെ 1,000 രൂപയ്ക്ക് ഒരു വീട് സ്വന്തമാക്കാനുള്ള അവസരമായി കാണുന്നു. ഇപ്പോള് എനിക്ക് ലഭിക്കുന്ന അന്വേഷണങ്ങളില് ഭൂരിഭാഗവും ഗള്ഫ് മലയാളികളില് നിന്നാണ്,' അഭിഭാഷകന് പറഞ്ഞു.
'ഈ പ്രശ്നം ശ്രദ്ധയില്പ്പെട്ടപ്പോള്, ഉടന് തന്നെ ലോട്ടറി ഡയറക്ടറേറ്റുമായി ബന്ധപ്പെട്ടു. കേരള പേപ്പര് ലോട്ടറി (റെഗുലേഷന്) നിയമങ്ങള് അനുസരിച്ച്, ഒരു വ്യക്തിക്കോ സ്ഥാപനത്തിനോ സംഘടനയ്ക്കോ സര്ക്കാര് അനുമതിയില്ലാതെ സംസ്ഥാനത്തിനുള്ളില് ഒരു ലോട്ടറിയും സംഘടിപ്പിക്കാനോ നടത്താനോ വില്ക്കാനോ പ്രോത്സാഹിപ്പിക്കാനോ സൗകര്യമൊരുക്കാനോ അനുവാദമില്ലെന്ന് അവര് വ്യക്തമാക്കി. ഈ നിയമം ലംഘിക്കുന്നത് രണ്ട് വര്ഷം വരെ കഠിനതടവോ പിഴയോ അല്ലെങ്കില് രണ്ടും കൂടിയോ ലഭിക്കാവുന്ന ശിക്ഷയാണ്,' അദ്ദേഹം പറഞ്ഞു.
അതേസമയം, അടുത്തിടെ നടന്ന ഒരു തട്ടിപ്പിന് ഇരയായ ഒരാള് തന്റെ അനുഭവത്തെക്കുറിച്ച് ന്യൂ ഇന്ത്യന് എക്സ്പ്രസ്സിനോട് പറഞ്ഞത് ഇങ്ങനെ: 'ഞാന് ഒരു പക്ഷാഘാതത്തെ അതിജീവിച്ച ആളാണ്. യൂട്യൂബ് വീഡിയോ എന്റെ ശ്രദ്ധയില് പെട്ടു. ഞാന് ഒരു ടിക്കറ്റ് വാങ്ങി. എന്നാല് കഴിഞ്ഞ കുറച്ച് ദിവസങ്ങളായി, നിരവധി ആളുകള് ഇത്തരം തട്ടിപ്പുകളെക്കുറിച്ച് സംസാരിക്കുന്നത് കേട്ടപ്പോള്, ഞാനും വഞ്ചിക്കപ്പെട്ടുവെന്ന് മനസ്സിലായി. വിജയികളെല്ലാം വീട്ടുടമസ്ഥന്റെ ബന്ധുക്കളാണെന്ന് മനസ്സിലായി. ടിക്കറ്റിന് പണം നല്കിയ ശേഷം, എന്നെ ഒരു വാട്ട്സ്ആപ്പ് ഗ്രൂപ്പില് ചേര്ത്തു, പക്ഷേ പ്രശ്നം വിവാദമായപ്പോള്, അഡ്മിന്മാര് അപ്രത്യക്ഷരായി, അവരുടെ ഫോണുകള് ലഭ്യമല്ലാതായി. ഇപ്പോള് പൊലീസില് പരാതി നല്കാന് ഞാന് തീരുമാനിച്ചു,' കണ്ണൂര് സ്വദേശി മുഹമ്മദ് അസ്ലം പറഞ്ഞു.
കണ്ണൂര് സ്വദേശിയായ സായിസ് എസ്, നല്കിയ പരാതിയുടെ അടിസ്ഥാനത്തില്, സംസ്ഥാന പൊലീസ് മേധവി ഈ സംഭവത്തെ കുറിച്ച് അന്വേഷിക്കാന് കണ്ണൂര് റൂറല് പൊലീസ് മേധാവിക്ക് നിര്ദ്ദേശം നല്കി. വിവാദത്തിന് മറുപടിയായി, കുഞ്ഞന് സോഷ്യല് മീഡിയയില് തന്റെ പങ്കാളിത്തത്തെ ന്യായീകരിച്ച് ഒരു വീഡിയോ പുറത്തിറക്കി. 'കഴിഞ്ഞ കുറച്ച് ദിവസങ്ങളായി ഞാന് ധാരാളം വിമര്ശനങ്ങള് നേരിട്ടിട്ടുണ്ട്. എനിക്ക് നാസറുമായി അടുത്ത ബന്ധമുണ്ടായിരുന്നു. അദ്ദേഹം ഒരു നല്ല മനുഷ്യനാണ്. വീഡിയോയ്ക്ക് അംഗീകാരം നല്കുന്നതിന് എനിക്ക് ഒരു നിശ്ചിത തുക വാഗ്ദാനം ചെയ്തു. ഇതിന് പിന്നില് ഒരു തട്ടിപ്പും ഉണ്ടെന്ന് ഞാന് വിശ്വസിക്കുന്നില്ല,' അദ്ദേഹം വീഡിയോയില് പറഞ്ഞു.
ഇത്തരം തട്ടിപ്പുകളില് സ്പെഷ്യല് ബ്രാഞ്ചിന് സ്വമേധയാ കേസുകള് എളുപ്പത്തില് ആരംഭിക്കാന് കഴിയുമെന്ന് പേര് വെളിപ്പെടുത്തരുതെന്ന നിബന്ധനയോടെ വിരമിച്ച ഒരു മുതിര്ന്ന പൊലീസ് ഉദ്യോഗസ്ഥന് പറഞ്ഞു. ഈ ലോട്ടറികള് വ്യക്തമായും വഞ്ചനയാണ്. ടിക്കറ്റ് തുക 1,000 രൂപ മാത്രമായതിനാല്, പല ഇരകളും പരാതി നല്കാന് മടിക്കുന്നു. വീട് കൂര്ഗിലായതിനാല് കേരളത്തില് കേസ് ഫയല് ചെയ്യാന് കഴിയില്ലെന്ന് ചിലര് തെറ്റായി വിശ്വസിക്കുന്നു. തട്ടിപ്പ് കേസുകള് ഏത് പൊലീസ് സ്റ്റേഷനിലും റിപ്പോര്ട്ട് ചെയ്യാമെന്ന് പൊതുജനങ്ങള് മനസ്സിലാക്കണം. ഇരകള്ക്ക്, അവരുടെ തദ്ദേശ സ്റ്റേഷനുകളില് പരാതി രജിസ്റ്റര് ചെയ്യാന് പൂര്ണ്ണ അവകാശമുണ്ട്. പൊലീസ് സ്പെഷ്യല് ടീമിന് ഈ കേസുകള് എളുപ്പത്തില് പരിഹരിക്കാന് കഴിയും, ''അദ്ദേഹം വിശദീകരിച്ചു.
