പരമ്പരാഗത ശവസംസ്കാര ചടങ്ങുകള്ക്ക് നിലവില് വലിയ തുകയാണ് ചെലവാകുന്നത്. ഇത് സാമ്പത്തികമായി പിന്നാക്കം നില്ക്കുന്നവര്ക്ക് മരണാനന്തരം അന്തസ്സായ അന്ത്യകര്മ്മങ്ങള് ബുദ്ധമുട്ടിലാക്കുന്ന അവസ്ഥ ഇന്ന് പലഭാഗത്തുമുണ്ട്. ഈ സാഹചര്യത്തില് സാമൂഹിക നീതിയില് അധിഷ്ഠിതമായ സംരംഭത്തിന് കണ്ണൂരിലെ ചൊക്ലി തുടക്കമായി. മരിച്ചവര്ക്ക്, പ്രത്യേകിച്ച് ദരിദ്രര്ക്ക് അന്തസ്സുള്ള അന്ത്യകര്മ്മങ്ങള് ഉറപ്പാക്കുന്നതിനായി സിപിഎം മേനപ്രം ലോക്കല് കമ്മിറ്റിയുടെ നേതൃത്വത്തില് വളണ്ടിയര് സേന രൂപീകരിച്ചു. 'ഫ്യൂണറല് ഫോഴ്സ്' (Funeral Force)എന്ന് പേരിട്ടിരിക്കുന്ന 45 അംഗ സംഘത്തെ വെള്ളിയാഴ്ച സിപിഎം ജില്ലാ സെക്രട്ടറി കെ.കെ. രാഗേഷ് ഔദ്യോഗികമായി ഫ്ലാഗ് ഓഫ് ചെയ്തു. വിവിധ മതപശ്ചാത്തലങ്ങളില് നിന്നുള്ള സ്ത്രീ ,പുരുഷ വളണ്ടിയര്മാര് ആ ഫോഴ്സില് അംഗങ്ങളാണ്,
മൃതദേഹം സൂക്ഷിക്കുന്നതിനുള്ള മൊബൈല് ഫ്രീസര്, മരിച്ചവരെ കുളിപ്പിക്കുന്നതിനുള്ള താല്ക്കാലിക മുറി, പാത്രങ്ങള്, ശവസംസ്കാര സൗകര്യങ്ങള്, മുസ്ലീം, ക്രിസ്ത്യന് വിശ്വാസികള്ക്കുള്ള ശവസംസ്കാര ക്രമീകരണങ്ങള്, പാദരക്ഷകള് സൂക്ഷിക്കുന്നതിനുള്ള റാക്കുകള് എന്നിവയുള്പ്പെടെ മാന്യമായ ഒരു ശവസംസ്കാര ചടങ്ങുകള്ക്ക് ആവശ്യമായ എല്ലാ കാര്യങ്ങളും ഈ സംഘം ചെയ്യും. അതത് മതവിഭാഗങ്ങളില് നിന്നുള്ള വനിതാ വളണ്ടിയര്മാരാണ് അവരുടെ ആചാരങ്ങള്ക്കനുസൃതമായി മരണപ്പെട്ട സ്ത്രീകളെ കുളിപ്പിക്കുന്ന ചടങ്ങുകള് നടത്തുന്നത്. 'രാഷ്ട്രീയം, ജാതി, മതം എന്നിവ പരിഗണിക്കാതെ ഈ സേവനം എല്ലാവര്ക്കും ലഭ്യമാണ്. ഹിന്ദു ശവസംസ്കാര ചടങ്ങുകള്ക്ക് മാത്രം സ്വകാര്യ ഏജന്സികള് 7,000 രൂപയില് കൂടുതല് ഈടാക്കുമ്പോള്, ദരിദ്രര്ക്കും പാവപ്പെട്ടവര്ക്കും വേണ്ടി ഞങ്ങള് സൗജന്യമായി നടത്തും,' മേനപ്രാം ലോക്കല് കമ്മിറ്റി സെക്രട്ടറി ജയേഷ് ടി പറഞ്ഞു.
ഈ സംരംഭം തുടര്ന്നുകൊണ്ടുപോകുന്നതിനായി, സൗജന്യ സേവനം പ്രയോജനപ്പെടുത്താന് വിസമ്മതിക്കുന്നവരില് നിന്ന് സംഭാവനകള് സ്വീകരിക്കും. അവശ്യ ഉപകരണങ്ങള്ക്കും വസ്തുക്കള്ക്കുമുള്ള ഫണ്ട് ഇതിനകം പൊതുജന സംഭാവനകളിലൂടെ സ്വരൂപിച്ചിട്ടുണ്ട്. 'വിവിധ മതവിഭാഗങ്ങളില് നിന്നുള്ള വളണ്ടിയര്മാരെ ഞങ്ങള് പരിശീലിപ്പിച്ചിട്ടുണ്ട്, ശവസംസ്കാര പ്രക്രിയയുടെ വിവിധ ഘട്ടങ്ങള്ക്കായി ഇവര് പ്രത്യേകം പരിശീലനം നേടിയിട്ടുണ്ട്. ഇതുവരെ, പ്രാരംഭ പ്രവര്ത്തന മൂലധനമായി ക്രൗഡ് ഫണ്ടിങ്ങിലൂടെ 10 ലക്ഷം രൂപ ശേഖരിച്ചു. എല്ലാ വളണ്ടിയര്മാരും പരമ്പരാഗതമായി ഇത്തരം കര്മ്മങ്ങള് ചെയ്യുന്നവരില് നിന്ന് പരിശീലനം നേടിയിട്ടുണ്ട്, ഡ്യൂട്ടിയിലായിരിക്കുമ്പോള് നിര്ദ്ദിഷ്ട യൂണിഫോം ധരിക്കും,' ജയേഷ് പറഞ്ഞു. ആദ്യ ഘട്ടത്തില് ചൊക്ലി-മേനപ്രാം മേഖലയില് മാത്രമായിരിക്കും സേവനം . എന്നാല്, ഈ പൈലറ്റ് പദ്ധതിയുടെ വിജയത്തെ അടിസ്ഥാനമാക്കി ക്രമേണ അയല് പ്രദേശങ്ങളിലേക്ക് ഇത് വ്യാപിപ്പിക്കാനുള്ള പദ്ധതികള് നിലവിലുണ്ട്. 'ഇവിടെ അത്തരമൊരു സേവനത്തിന് നിലവില് ഒരു മാതൃകയുമില്ല. അതുകൊണ്ടാണ് ഞങ്ങള് ചൊക്ലിയില് ഇത് പരീക്ഷണാടിസ്ഥാനത്തില് ആരംഭിക്കുന്നു. ഇത് വിജയിച്ചാല്, ഈ സംരംഭം മറ്റ് മേഖലകളിലേക്കും വ്യാപിപ്പിക്കാന് ഞങ്ങള് പ്രതിജ്ഞാബദ്ധരാണ്,' ജയേഷ് പറഞ്ഞു.
