കേരള തീരത്ത് വെച്ച് എംവി വാന് ഹായ് 503 എന്ന ചരക്ക് കപ്പലിന് തീപിടിച്ചതിനെത്തുടര്ന്ന്,(Cargo ship catches fire) രാസമാലിന്യം ഉണ്ടാകുമെന്ന ആശങ്ക നിലനില്ക്കുന്നതിനാല് കണ്ണൂര് ജില്ലയിലെ തീരപ്രദേശങ്ങളില് കടല്വെള്ള സാമ്പിളുകള് ശേഖരിച്ച് പരിശോധിക്കുന്നു. അപകടകരമായ വസ്തുക്കള് ഉണ്ടാകാന് സാധ്യതയുള്ള നിരവധി കണ്ടെയ്നറുകള് അറബിക്കടലില് വീണിട്ടുണ്ടാകാമെന്ന റിപ്പോര്ട്ടുകളെത്തുടര്ന്ന് കേരള സംസ്ഥാന മലിനീകരണ നിയന്ത്രണ ബോര്ഡാണ് കടല്വെള്ള പരിശോധനയ്ക്ക് നേതൃത്വം നല്കുന്നത്. കപ്പലിലെ 157 കണ്ടെയ്നറുകളില് ആസിഡ്, ലിഥിയം ബാറ്ററികള്, ടര്പേന്റൈന്, വെടിമരുന്ന് എന്നിവയുള്പ്പെടെ അപകടകരമായ വസ്തുക്കള് അടങ്ങിയിരുന്നതായി പ്രാഥമിക ഡാറ്റ സൂചിപ്പിക്കുന്നു - ഇവയെല്ലാം വേഗത്തില് തീപിടിക്കുന്നതും പരിസ്ഥിതിക്ക് ദോഷകരവുമാണ്.
'പയ്യാമ്പലം ബീച്ച്, വടകര, അഴീക്കല്, പരിസര പ്രദേശങ്ങള് എന്നിവിടങ്ങളില് നിന്ന് ജല സാമ്പിള് ശേഖരിച്ചു തുടങ്ങിയിട്ടുണ്ട്,' മലിനീകരണ നിയന്ത്രണ ബോര്ഡിലെ ഒരു മുതിര്ന്ന ഉദ്യോഗസ്ഥന് പറഞ്ഞു. 'ഇത് ഗുരുതരമായ പാരിസ്ഥിതിക അപകടമായി ഞങ്ങള് കണക്കാക്കുന്നു,' അദ്ദേഹം പറഞ്ഞു. അപകടസ്ഥലത്ത് നിന്ന് 44 നോട്ടിക്കല് മൈല് അകലെയുള്ള അഴീക്കല് തുറമുഖത്തെ ഒരു ഉദ്യോഗസ്ഥന്, കപ്പലില് നാല് തരം അപകടകരമായ വസ്തുക്കള് ഉണ്ടെന്ന് മുന്നറിയിപ്പ് ലഭിച്ചതായി സ്ഥിരീകരിച്ചു.
'ചില പ്രത്യേക സാഹചര്യങ്ങളില് ഇവയില് ചില രാസവസ്തുക്കള് സ്വയമേവ കത്താന് സാധ്യതയുള്ളവയാണ് ,' ഉദ്യോഗസ്ഥന് പറഞ്ഞു. കടലിലെ ജൈവസമ്പത്തിനെയും ജലസുരക്ഷയെയും ഇത് ബാധിക്കുമെന്ന ആശങ്ക പ്രദേശനിവാസികളും പ്രാദേശിക മത്സ്യബന്ധന സമൂഹങ്ങളും പ്രകടിപ്പിച്ചിട്ടുണ്ട്. പരിശോധനയും നിയന്ത്രണ നടപടികളും പൂര്ണ്ണ തോതില് തുടരുന്നുണ്ട്. പൊതുജനാരോഗ്യത്തിന് മുന്ഗണന നല്കിക്കൊണ്ടുള്ള നടപടികളാണ് സ്വീകരിക്കുന്നതെന്ന് അധികൃതര് പറഞ്ഞു.
