തിരുവനന്തപുരം: കേരളത്തിന്റെ ജനനായകന് മുന് മുഖ്യമന്ത്രി വി എസ് അച്യുതാന്ദന് തലസ്ഥാന നഗരി അന്തിമോപചാരം അര്പ്പിക്കുന്നു. കവടിയാറിലെ വസതിയില് നിന്നും വിലാപയാത്രയായി രാവിലെ ദര്ബാര് ഹാളിലെത്തിച്ച വി എസിന്റെ മൃതദേഹം ഒരുനോക്കു കാണാനും, അന്ത്യാഞ്ജലി അര്പ്പിക്കാനും അണമുറിയാതെ ജനസഹസ്രങ്ങളാണ് എത്തിക്കൊണ്ടിരിക്കുന്നത്. വിഎസിന്റെ ജീവിതം പകര്ന്ന അനുഭവങ്ങളുടെ ഊര്ജം ഏറ്റുവാങ്ങി, തങ്ങളുടെ സമരസൂര്യന് കടലിരമ്പംപോലെ മുദ്രാവാക്യം വിളിച്ച് പാര്ട്ടി പ്രവര്ത്തകരും അനുയായികളും അന്ത്യാഭിവാദ്യം അര്പ്പിക്കുന്നു.
മുഖ്യമന്ത്രി പിണറായി വിജയന്, സിപിഎം ജനറല് സെക്രട്ടറി എം എ ബേബി, സംസ്ഥാന സെക്രട്ടറി എം വി ഗോവിന്ദന്, മന്ത്രിമാര്, സിപിഎം നേതാക്കളായ പ്രകാശ് കാരാട്ട്, ബൃന്ദ കാരാട്ട്, മറ്റു രാഷ്ട്രീയ നേതാക്കള്, മത-സാമുദായിക- സാമൂഹ്യ-സാംസ്കാരിക പ്രമുഖര്, ഐഎഎസ്, ഐപിഎസ് ഉദ്യോഗസ്ഥര് തുടങ്ങി നിരവധി പേരാണ് വിഎസിന് അന്ത്യാഭിവാദ്യം അര്പ്പിക്കാനായി ദര്ബാര് ഹാളില് എത്തിയത്. തലസ്ഥാനത്തെ പൊതുദര്ശനത്തിന് ശേഷം ഉച്ചയ്ക്ക് രണ്ടുമണിയോടെ വിലാപയാത്രയായി വിഎസിന്റെ ജന്മദേശമായ ആലപ്പുഴ പുമ്പ്രയിലെ വീട്ടിലേക്ക് കൊണ്ടുപോകും.
ബുധനാഴ്ച സിപിഎം ആലപ്പുഴ ജില്ലാ കമ്മറ്റി ഓഫീസില് വിഎസിന്റെ മൃതദേഹം പൊതുദര്ശനത്തിന് വെക്കും. തുടര്ന്ന് ആലപ്പുഴ പൊലീസ് റിക്രിയേഷന് ഗ്രൗണ്ടിലും സമരനായകനെ ഒരുനോക്കു കാണാനായി വിഎസിന്റെ മൃതദേഹം പൊതുദര്ശനത്തിന് വെക്കും. വൈകിട്ട് മൂന്നുമണിക്ക് വലിയചുടുകാട്ടില് മൃതദേഹം സംസ്കരിക്കും. തലസ്ഥാന നഗരിയില് നിന്നുള്ള വിലാപയാത്ര തിരുവനന്തപുരത്ത് 27 ഇടത്ത് ജനങ്ങള്ക്ക് ാെരു നോക്കു കാണാനും അന്തിമോപചാരം അര്പ്പിക്കാനുമായി നിര്ത്തുന്നതാണ്. പൊതു ദര്ശനവും വിലാപയാത്രയും കണക്കിലെടുത്ത് തിരുവനന്തപുരത്ത് ഗതാഗതനിയന്ത്രണം ഏര്പ്പെടുത്തിയിട്ടുണ്ട്.
വി എസ് അച്യുതാനന്ദന്റെ പൊതുദര്ശനവും വിലാപയാത്രയുമായി ബന്ധപ്പെട്ട് തിരുവനന്തപുരം നഗരത്തില് ഇന്ന് ഗതാഗത നിയന്ത്രണം. സെക്രട്ടേറിയേറ്റ് ഭാഗത്തേക്ക് വാഹന ഗതാഗതം അനുവദിക്കില്ലെന്ന് പൊലീസ് അറിയിച്ചു. പൊതു ജനങ്ങള് പുളിമൂട് , ഹൗസിങ് ബോര്ഡ് ജംഗ്ഷന്, രക്തസാക്ഷിമണ്ഡപം എന്നീ സ്ഥലങ്ങളില് ഇറങ്ങിയ ശേഷം ദര്ബാര് ഹാളിലേക്ക് പോകേണ്ടതാണ്. പൊതുദര്ശനത്തിനായി വരുന്നവരുടെ ചെറിയ വാഹനങ്ങള് യൂണിവേഴ്സിറ്റി ക്യാംപസ്, വെള്ളയമ്പലം വാട്ടര് അതോറിറ്റി പാര്ക്കിങ് ഗ്രൗണ്ട്, ജിമ്മി ജോര്ജ് സ്റ്റേഡിയം ഗ്രൗണ്ട്, ടാഗോര് തിയറ്റര് ഗ്രൗണ്ട്, തൈക്കാട് പിറ്റിസി ഗ്രൗണ്ട് എന്നിവിടങ്ങളിലായി പാര്ക്ക് ചെയ്യണം. വിലാപയാത്ര കടന്ന് പോകുന്ന സമയത്ത് ഗതാഗത തിരക്ക് അനുഭവപ്പെടുകയാണെങ്കില് വാഹനം വഴി തിരിച്ച് വിടുമെന്നും പൊലീസ് അറിയിച്ചു. ട്രാഫിക് ക്രമീകരണങ്ങളുടെ വിവരങ്ങള് അറിയുന്നതിന് 0471-2558731, 9497930055 എന്നീ ഫോണ് നമ്പരുകളില് ബന്ധപ്പെടാമെന്നും തിരുവനന്തപുരം സിറ്റി പൊലീസ് അറിയിച്ചു.
