തിരുവനന്തപുരം: സംസ്ഥാനത്തിന്റെ ഭരണസിരാകേന്ദ്രമായ തിരുവനന്തപുരം സെക്രട്ടേറിയറ്റില് മാധ്യമപ്രവര്ത്തകര്ക്കുള്ള പ്രവേശനത്തില് വീണ്ടും കര്ശന നിയന്ത്രണം. മുഖ്യമന്ത്രിയുടെ ഓഫീസ് സ്ഥിതി ചെയ്യുന്ന നോര്ത്ത് ബ്ലോക്കില് ഒരാഴ്ച മുന്പ് ആരംഭിച്ച നിയന്ത്രണങ്ങള് ഇപ്പോള് സെക്രട്ടേറിയറ്റിലെ മറ്റ് ഓഫീസുകളിലേക്കും വ്യാപിപ്പിച്ചിരിക്കുകയാണ്. പൊതുസന്ദര്ശകര്ക്കായി ഏര്പ്പെടുത്തിയ പുതിയ നിയന്ത്രണങ്ങള് ചൂണ്ടിക്കാട്ടിയാണ് വാര്ത്താ ശേഖരണത്തിനായി എത്തുന്ന മാധ്യമപ്രവര്ത്തകരെയും സുരക്ഷാ ജീവനക്കാര് തടയുന്നത്. ഇതിന് പുറമെ സെക്രട്ടേറിയറ്റിലെ പ്രധാന പ്രവേശന കവാടമായ നോര്ത്ത് ഗേറ്റ് ബാരിക്കേഡുകള് വെച്ച് പൂര്ണ്ണമായി അടച്ചിരിക്കുകയാണ്. ബന്ധപ്പെടേണ്ട വകുപ്പില് നിന്നുള്ള പ്രത്യേക ശുപാര്ശാ കത്ത് ഇല്ലാതെ, സര്ക്കാര് ഔദ്യോഗികമായി നല്കിയ അക്രഡിറ്റേഷന് കാര്ഡുള്ള മാധ്യമപ്രവര്ത്തകരെയും അകത്ത് പ്രവേശിപ്പിക്കേണ്ടതില്ലെന്നാണ് കന്റോണ്മെന്റ് ഗേറ്റിലെ സുരക്ഷാ ഉദ്യോഗസ്ഥര്ക്ക് ലഭിച്ചിരിക്കുന്ന നിര്ദേശം.
മുഖ്യമന്ത്രിക്ക് കീഴിലുള്ള ഇന്ഫര്മേഷന് ആന്ഡ് പബ്ലിക് റിലേഷന്സ് വകുപ്പിന്റെ പരിശോധനകള്ക്കുശേഷമാണ് മാധ്യമപ്രവര്ത്തകര്ക്ക് അക്രഡിറ്റേഷന് കാര്ഡുകള് നല്കുന്നത്. സെക്രട്ടേറിയറ്റ് ഉള്പ്പെടെയുള്ള നിയന്ത്രിത മേഖലകളില് വാര്ത്താ ശേഖരണത്തിനായി സുഗമമായി പ്രവേശിക്കാന് വേണ്ടിയാണ് ഈ കാര്ഡുകള് അനുവദിക്കുന്നത്. എന്നാല്, ഔദ്യോഗിക അക്രഡിറ്റേഷന് കാര്ഡുമായി എത്തുന്ന മാധ്യമപ്രവര്ത്തകരെയും ഇപ്പോള് ഗേറ്റില് തടയുന്നതാണ് പ്രതിഷേധത്തിന് ഇടയാക്കുന്നത്. പുതിയ സര്ക്കാര് അധികാരമേറ്റതിന് പിന്നാലെ സെക്രട്ടേറിയറ്റില് സന്ദര്ശകരുടെ തിരക്ക് വര്ധിച്ചിരുന്നു. ഇതേത്തുടര്ന്ന് പൊതുജനങ്ങള്ക്ക് പ്രവേശന സമയം വൈകിട്ട് 3 മുതല് 5 വരെയായി പരിമിതപ്പെടുത്തി. പ്രത്യേക പാസ് എടുത്തോ, അല്ലെങ്കില് അകത്തുനിന്ന് സുരക്ഷാ ഗേറ്റിലേക്ക് വരുന്ന ഔദ്യോഗിക ഫോണ് കോള് വഴിയോ മാത്രമേ ഈ സമയത്തും പൊതുജനങ്ങള്ക്ക് അകത്ത് കടക്കാന് കഴിയൂ. പൊതുജനങ്ങള്ക്കായി ഏര്പ്പെടുത്തിയ ഈ സമയക്രമം ചൂണ്ടിക്കാട്ടിയാണ് മാധ്യമപ്രവര്ത്തകരെയും സുരക്ഷാ ഉദ്യോഗസ്ഥര് തടയുന്നത്.
സെക്രട്ടേറിയറ്റിലേക്കുള്ള പ്രധാന പ്രവേശന കവാടമായ നോര്ത്ത് ഗേറ്റും ബാരിക്കേഡുകള് ഉപയോഗിച്ച് അടച്ചിരിക്കുകയാണ്. രാഷ്ട്രീയ സമരങ്ങള് നിരന്തരം നടക്കുന്ന സ്ഥലമായതിനാലും ജനങ്ങളുടെ പ്രധാന പ്രവേശന മാര്ഗമായതിനാലും ഈ ഗേറ്റ് പൊതുവെ 'സമരഗേറ്റ്' എന്ന പേരിലാണ് അറിയപ്പെടുന്നത്. പുതിയ സര്ക്കാര് അധികാരത്തില് എത്തിയ ഉടന് തുറന്നുകൊടുത്ത ഗേറ്റാണ് ഇപ്പോള് വീണ്ടും അടച്ചിരിക്കുന്നത്. പിണറായി സര്ക്കാരിന്റെ കാലത്തും സെക്രട്ടേറിയറ്റില് മാധ്യമങ്ങള്ക്ക് സമാനമായ രീതിയില് കര്ശന നിയന്ത്രണം ഏര്പ്പെടുത്തിയിരുന്നു. അന്ന് പ്രതിപക്ഷത്തായിരുന്നവര് ഈ മാധ്യമ വിലക്കിനെതിരെ ശക്തമായ വിമര്ശനങ്ങളും പ്രതിഷേധങ്ങളും ഉയര്ത്തിയിരുന്നു. എന്നാല്, സന്ദര്ശക സമയക്രമം ഉള്പ്പെടെ മുന് സര്ക്കാരിന്റെ കാലത്തെ അതേ രീതിയിലേക്ക് കാര്യങ്ങള് വീണ്ടും മാറുകയാണെന്ന വിമര്ശനമാണ് ഇപ്പോള് ഉയരുന്നത്. അതേസമയം, മുഖ്യമന്ത്രി നിലവില് ബജറ്റുമായി ബന്ധപ്പെട്ട തിരക്കിലായതിനാല് സെക്രട്ടേറിയറ്റിലെ പ്രവേശന നിയന്ത്രണങ്ങള് ഉള്പ്പെടെയുള്ള വിഷയങ്ങളില് അന്തിമ തീരുമാനം എടുക്കാന് സമയം ലഭിച്ചിട്ടില്ലെന്നാണ് ഔദ്യോഗിക വിശദീകരണം. ഈ മാസം തന്നെ വിഷയത്തില് വ്യക്തത വരുത്തുമെന്നാണ് അധികൃതരുടെ നിലപാട്.
