കോഴിക്കോട്: സംസ്ഥാന സ്‌കൂള്‍ കായികമേളയിലെ ഭക്ഷണത്തില്‍ പുഴുവിനെ കണ്ടെത്തിയെന്ന ആരോപണത്തിന് പിന്നില്‍ മേളയെ അപകീര്‍ത്തിപ്പെടുത്താനുള്ള ഗൂഢാലോചനയുണ്ടെന്ന് വിദ്യാഭ്യാസമന്ത്രി എന്‍. ഷംസുദ്ദീന്‍. സംഭവത്തില്‍ പൊലീസ് അന്വേഷണം നടത്തണമെന്നും ഉത്തരവാദികള്‍ക്കെതിരെ നടപടിയെടുക്കുമെന്നും മന്ത്രി പറഞ്ഞു. രാഷ്ട്രീയ വിരോധത്തിന്റെ പേരിലാണ് ചിലര്‍ മേളയെ മോശമായി ചിത്രീകരിക്കാന്‍ ശ്രമിക്കുന്നതെന്നാണ് മന്ത്രിയുടെ ആരോപണം. പ്രഭാതഭക്ഷണത്തിലും പിന്നീട് ഉച്ചഭക്ഷണത്തിലും പുഴുവിനെ കണ്ടെന്ന പരാതികള്‍ ഉയര്‍ന്നെങ്കിലും പരിശോധനയില്‍ അത് കണ്ടെത്താനായില്ലെന്ന് അദ്ദേഹം പറഞ്ഞു. മണിക്കൂറുകളോളം തിളച്ച സാമ്പാറിലും ആവിയില്‍ വേവിച്ച പുട്ടിലും ജീവനുള്ള പുഴുവിനെ കണ്ടെത്തിയെന്ന വാദത്തെയും മന്ത്രി ചോദ്യംചെയ്തു.
സംഭവത്തില്‍ ഒരു അധ്യാപകനും ചില മാധ്യമപ്രവര്‍ത്തകര്‍ക്കും പങ്കുണ്ടെന്ന് മന്ത്രി ആരോപിച്ചു. അധ്യാപകനെതിരെ പൊതുവിദ്യാഭ്യാസ വകുപ്പ് നടപടി സ്വീകരിക്കുമെന്നും പിന്നില്‍ പ്രവര്‍ത്തിച്ചവരെ കണ്ടെത്താന്‍ അന്വേഷണം വേണമെന്നും അദ്ദേഹം വ്യക്തമാക്കി. ഇത്തരം വിവാദങ്ങളിലൂടെ മേളയുടെ പ്രാധാന്യം കുറയ്ക്കാനാകില്ലെന്നും ഭക്ഷണത്തിന്റെ നിലവാരം മികച്ചതാണെന്നും മന്ത്രി പറഞ്ഞു. അതേസമയം, ഭക്ഷണത്തില്‍ പുഴുവിനെ കണ്ടെന്ന ആരോപണം ഫെയ്സ്ബുക്ക് ലൈവിലൂടെ ഉന്നയിച്ച പെരുമ്പാവൂര്‍ സ്വദേശി ജിജോ ജെയിംസിനെ പൊലീസ് അറസ്റ്റ് ചെയ്തു. പുഴുവിനെ നേരിട്ട് കണ്ടിട്ടില്ലെന്നും വിദ്യാര്‍ഥികള്‍ പറഞ്ഞതിന്റെ അടിസ്ഥാനത്തിലാണ് വിവരം പങ്കുവെച്ചതെന്നും അദ്ദേഹം പൊലീസിന് മൊഴിനല്‍കിയതായാണ് റിപ്പോര്‍ട്ട്. ഭക്ഷണത്തെക്കുറിച്ചുള്ള പരാതികളും സംഘാടനത്തിലെ വീഴ്ചകളും ചൂണ്ടിക്കാട്ടി എസ്എഫ്‌ഐ പ്രതിഷേധം നടത്തിയിരുന്നു. എന്നാല്‍, ഭക്ഷണത്തില്‍ പുഴുവുണ്ടായിരുന്നെന്ന ആരോപണം പാചകച്ചുമതലയുള്ള പഴയിടം മോഹനന്‍ നമ്പൂതിരി നിഷേധിച്ചു. സംഭവത്തില്‍ നിയമനടപടി സ്വീകരിക്കുമെന്നും അദ്ദേഹം അറിയിച്ചു.
