തിരുവനന്തപുരം: അന്യസംസ്ഥാനങ്ങളില്‍ നിന്നെത്തുന്ന കുടിയേറ്റ തൊഴിലാളികള്‍ തങ്ങളുടെ വരുമാനത്തിന്റെ വളരെ ചെറിയൊരു പങ്ക് മാത്രമാണ് കേരളത്തില്‍ ചെലവഴിക്കുന്നതെന്ന നിയമസഭയിലെ പ്രസ്താവനയെ എതിര്‍ത്ത് തൊഴിലാളി ക്ഷേമ രംഗത്ത് പ്രവര്‍ത്തിക്കുന്ന സന്നദ്ധ സംഘടന. കുടിയേറ്റ തൊഴിലാളികള്‍ താമസം, ഭക്ഷണം, ഗതാഗതം ഉള്‍പ്പെടെയുള്ള ആവശ്യങ്ങള്‍ക്കായി പ്രതിവര്‍ഷം കുറഞ്ഞത് 26,100 കോടി രൂപയെങ്കിലും കേരളത്തില്‍ ചെലവഴിക്കുന്നുണ്ടെന്നാണ് സംഘടനയുടെ വാദം. കുടിയേറ്റ തൊഴിലാളികള്‍ പ്രധാനമായും ഗോതമ്പ് മാവ്, പലചരക്ക് സാധനങ്ങള്‍, മദ്യം എന്നിവയ്ക്കായി മാത്രമാണ് കേരളത്തില്‍ പണം ചെലവഴിക്കുന്നതെന്നായിരുന്നു നിയമസഭയില്‍ ഉയര്‍ന്ന പരാമര്‍ശം. എന്നാല്‍ ഈ വിലയിരുത്തല്‍ യാഥാര്‍ഥ്യവുമായി പൊരുത്തപ്പെടുന്നതല്ലെന്ന് 'സെന്റര്‍ ഫോര്‍ മൈഗ്രേഷന്‍ ആന്‍ഡ് ഇന്‍ക്ലൂസീവ് ഡെവലപ്‌മെന്റ്' (CMID) എക്‌സിക്യൂട്ടീവ് ഡയറക്ടര്‍ ബിനോയ് പീറ്റര്‍ പറഞ്ഞു.

കുടിയേറ്റ തൊഴിലാളികള്‍ കേരളത്തില്‍ എത്രത്തോളം പണം ചെലവഴിക്കുന്നുവെന്നതിനെക്കുറിച്ച് സമഗ്രമായ ഔദ്യോഗിക കണക്കുകള്‍ ലഭ്യമല്ല. എന്നാല്‍ വിവിധ പഠനങ്ങള്‍ പ്രകാരം തൊഴിലാളികള്‍ വരുമാനത്തിന്റെ മൂന്നിലൊന്ന് ഭാഗമെങ്കിലും കേരളത്തില്‍ തന്നെയാണ് ചെലവഴിക്കുന്നതെന്ന് ബിനോയ് പീറ്റര്‍ ചൂണ്ടിക്കാട്ടി. പ്രസ്താവന ഒരുപക്ഷേ തെറ്റിദ്ധാരണയുടെ അടിസ്ഥാനത്തില്‍ ഉണ്ടായതാകാമെന്നും അദ്ദേഹം അഭിപ്രായപ്പെട്ടു. കുടിയേറ്റ തൊഴിലാളികള്‍ സംസ്ഥാനത്തിന്റെ വിഭവങ്ങളും റവന്യൂ വരുമാനവും വലിയ തോതില്‍ കൈക്കലാക്കുന്നുവെന്ന തരത്തിലുള്ള പ്രചാരണങ്ങള്‍ തെറ്റായ സന്ദേശമാണ് നല്‍കുന്നതെന്നും ബിനോയ് പറഞ്ഞു. കേരളത്തിന്റെ സമ്പദ്വ്യവസ്ഥ തന്നെ ഗള്‍ഫ് രാജ്യങ്ങളില്‍ ജോലി ചെയ്യുന്ന പ്രവാസികള്‍ നാട്ടിലേക്ക് അയക്കുന്ന പണത്തെ വലിയ തോതില്‍ ആശ്രയിക്കുന്ന സാഹചര്യത്തില്‍, കേരളത്തില്‍ ജോലി ചെയ്യുന്ന കുടിയേറ്റ തൊഴിലാളികള്‍ സ്വന്തം നാട്ടിലേക്ക് പണം അയക്കുന്നതിനെ കുറ്റപ്പെടുത്താനാവില്ലെന്നും അദ്ദേഹം വ്യക്തമാക്കി.

'പ്രധാനപ്പെട്ട പൊതുപദവിയിലുള്ളവര്‍ ഇത്തരം പരാമര്‍ശങ്ങള്‍ നടത്തുമ്പോള്‍ അത് കുടിയേറ്റ തൊഴിലാളികള്‍ക്കെതിരായ വിദ്വേഷം ശക്തിപ്പെടുത്താന്‍ ഇടയാക്കും. തൊഴിലാളികള്‍ അവരുടെ നാട്ടിലേക്ക് പണം അയക്കുന്നതില്‍ എന്താണ് തെറ്റ്?' ബിനോയ് പീറ്റര്‍ ചോദിച്ചു. അതേസമയം, 'അതിഥി തൊഴിലാളികള്‍' എന്നതിന് പകരം 'കുടിയേറ്റ തൊഴിലാളികള്‍' എന്ന പദം ഉപയോഗിച്ചതിനെ അദ്ദേഹം സ്വാഗതം ചെയ്തു. 'അതിഥി തൊഴിലാളി' എന്ന പ്രയോഗം ഇവരെ സമൂഹത്തിന്റെ ഭാഗമല്ലാത്തവരായി ചിത്രീകരിക്കുന്ന തോന്നല്‍ സൃഷ്ടിക്കുന്നുവെന്നും ബിനോയ് പറഞ്ഞു. കുടിയേറ്റ തൊഴിലാളികളുടെ പണമയക്കല്‍ സംബന്ധിച്ച് പഠനം നടത്താനുള്ള പ്രഖ്യാപനത്തെയും അദ്ദേഹം സ്വാഗതം ചെയ്തു. തൊഴിലാളികള്‍ നേരിടുന്ന യഥാര്‍ഥ വെല്ലുവിളികള്‍ പുറത്തുകൊണ്ടുവരാന്‍ ഇത്തരം പഠനങ്ങള്‍ സഹായിക്കുമെന്നാണ് വിലയിരുത്തല്‍.

സംസ്ഥാന ആസൂത്രണ ബോര്‍ഡ് 2021 ഓഗസ്റ്റില്‍ പുറത്തിറക്കിയ 'കേരളത്തിലെ കുടിയേറ്റം, അനൗപചാരിക തൊഴില്‍, നഗരവല്‍ക്കരണം' റിപ്പോര്‍ട്ട് പ്രകാരം 2025ഓടെ കേരളത്തിലെ കുടിയേറ്റ ജനസംഖ്യ 45.7 ലക്ഷത്തിനും 47.9 ലക്ഷത്തിനും ഇടയില്‍ എത്തുമെന്നായിരുന്നു കണക്കുകൂട്ടല്‍. ഏകദേശം 45 ലക്ഷം കുടിയേറ്റ തൊഴിലാളികള്‍ ദിവസേന ശരാശരി 800 രൂപ വേതനത്തില്‍ മാസത്തില്‍ 22 ദിവസവും വര്‍ഷത്തില്‍ 10 മാസവും ജോലി ചെയ്യുന്നുവെന്ന അടിസ്ഥാനത്തില്‍ കണക്കാക്കിയാല്‍, അവര്‍ നാട്ടിലേക്ക് അയക്കുന്ന പണം കുറച്ചശേഷവും 26,000 കോടിയിലധികം രൂപ കേരളത്തിന്റെ സമ്പദ്വ്യവസ്ഥയില്‍ ചെലവഴിക്കപ്പെടുന്നുണ്ടെന്നാണ് ബിനോയ് പീറ്ററുടെ വിലയിരുത്തല്‍. കേരളത്തിലെ കുടിയേറ്റ തൊഴിലാളികളില്‍ പകുതിയോളം പേര്‍ക്ക് മാത്രമാണ് തൊഴിലുടമകളില്‍ നിന്ന് താമസസൗകര്യം ലഭിക്കുന്നതെന്നും അദ്ദേഹം ചൂണ്ടിക്കാട്ടി. ബാക്കിയുള്ളവര്‍ വരുമാനത്തിന്റെ ഗണ്യമായൊരു പങ്ക് വീടുവാടകയ്ക്കായി ചെലവഴിക്കുന്നു. പൊതുഗതാഗത സംവിധാനങ്ങളിലും കുടിയേറ്റ തൊഴിലാളികളുടെ സാന്നിധ്യം വലിയ മാറ്റമുണ്ടാക്കിയിട്ടുണ്ട്. നേരത്തെ തിരക്ക് കുറവായിരുന്ന രാവിലെ ഒന്‍പതിന് മുന്‍പുള്ള സമയങ്ങളില്‍ പോലും ഇപ്പോള്‍ വലിയ യാത്രക്കാരത്തിരക്കാണ് അനുഭവപ്പെടുന്നതെന്നും അദ്ദേഹം പറഞ്ഞു.

കുടിയേറ്റ തൊഴിലാളികളുടെ യാത്രാ ആവശ്യം വര്‍ധിച്ചതോടെ ഒഡീഷ ഉള്‍പ്പെടെയുള്ള സംസ്ഥാനങ്ങളിലേക്ക് കേരളത്തില്‍ നിന്ന് അന്തര്‍സംസ്ഥാന ബസ് സര്‍വീസുകളും സജീവമായിട്ടുണ്ട്. ഇത് തൊഴിലാളികളുടെ സാമ്പത്തിക-സാമൂഹിക സാന്നിധ്യത്തിന്റെ തെളിവാണെന്നും ബിനോയ് ചൂണ്ടിക്കാട്ടി. ടാക്‌സി, ബസ്, സര്‍ക്കാര്‍ ഓഫീസ് തുടങ്ങിയ ഏതാനും മേഖലകള്‍ ഒഴികെ കേരളത്തിലെ മിക്ക പ്രധാന തൊഴില്‍ മേഖലകളിലും കുടിയേറ്റ തൊഴിലാളികളുടെ സാന്നിധ്യമുണ്ടെന്ന് എന്‍ജിഒയായ അതിഥി വെല്‍ഫെയര്‍ ഫോറം പ്രതിനിധി ഷിഹാബ് പരേലി പറഞ്ഞു. 'കുടിയേറ്റക്കാര്‍ കേരളത്തില്‍ പണം ചെലവഴിക്കുന്നില്ലെന്ന പൊതുധാരണ പലപ്പോഴും മുന്‍വിധികളില്‍ നിന്നാണ് രൂപപ്പെടുന്നത്. ഭക്ഷണം, വസ്ത്രം, താമസം ഉള്‍പ്പെടെ മലയാളികള്‍ ചെലവഴിക്കുന്ന മിക്ക മേഖലകളിലും കുടിയേറ്റ തൊഴിലാളികളും പണം ചെലവഴിക്കുന്നുണ്ട്. പലരും കുടുംബങ്ങളോടൊപ്പം കേരളത്തില്‍ സ്ഥിരതാമസമാക്കിയിട്ടുണ്ട്,' ഷിഹാബ് പറഞ്ഞു. കുടിയേറ്റ തൊഴിലാളികളുടെ കുട്ടികളുടെ സാന്നിധ്യം കൊണ്ടുമാത്രം വിദ്യാര്‍ഥി എണ്ണം നിലനിര്‍ത്തി പ്രവര്‍ത്തിക്കുന്ന സര്‍ക്കാര്‍ സ്‌കൂളുകള്‍ കേരളത്തിലുണ്ടെന്നും അദ്ദേഹം ചൂണ്ടിക്കാട്ടി. സംസ്ഥാനത്തിന്റെ തൊഴില്‍ വിപണിയിലും പ്രാദേശിക സമ്പദ്വ്യവസ്ഥയിലും വിദ്യാഭ്യാസ മേഖലയിലും കുടിയേറ്റ സമൂഹത്തിന്റെ പങ്ക് അവഗണിക്കാനാവില്ലെന്നാണ് സംഘടനകളുടെ നിലപാട്.